Read Chimborazo Highland Quichua SALMOS 118 Bible Online

SALMOS 118 - Chimborazo Highland Quichua bible

SALMOS 118

¹Mandaj Diosta alabaichigari. Paica allimari. Pai llaquij canaca huiñaipajmari.

²Israelcuna: “Mandaj Dios quiquinpaj llaquij canaca huiñaipajmari” nichigari.

³Aaronpaj huahuacuna: “Mandaj Dios, quiquinpaj llaquij canaca huiñaipajmari” nichigari.

⁴Mandaj Diosta manchajcuna: “Mandaj Dios, quiquinpaj llaquij canaca huiñaipajmari” nichigari.

⁵Llaquihuan cashpami, Mandaj Diosta mañarcani. Mandaj Diosca llaquimanta llujshichircami.

⁶Mandaj Diosca ñucahuanmari, mana manchanichu. Runacuna imata ruranataca mana manchanichu.

⁷Mandaj Diosca ñucahuanmari. Paica ñucata ayudajmari. Chaimantami ñucata p'iñajcunaraj, ñuca yuyashca shina tucujta ricusha.

⁸Mandaj Diospi shunguta churanamari runapi shunguta churanata ashtahuan yalli alli.

⁹Mandaj Diospi shunguta churanamari mandajcunapi shunguta churanata ashtahuan yalli alli.

¹⁰Ñucataca tucui llajtacunamari muyunchircacuna. Ashtahuanpish ñucami Mandaj Diospaj shutipi chingachircani.

¹¹Ñucataca muyuchircacunamari, yallitajmi muyunchircacuna. Ashtahuanpish ñucarajmari paicunataca Mandaj Diospaj shutipi chingachircani.

¹²Avejacuna shinamari ñucataca muyunchincuna. Chashna cashpapish casha rupaj shinallamari chingarincuna. Mandaj Diospaj shutipimi chashna chingachini.

¹³Maipish cachunmari t'angashpa shitarca. Urmachunmari t'angashpa shitarca. Ashtahuanpish Mandaj Diosmi ñucataca ayudarca.

¹⁴Mandaj Diosca ñucaman fuerzata cujmi, ñuca cantanami. Paica ñucata quishpichijmi.

¹⁵Cashcata rurajcunapaj carpa huasicunapica jatunta cushicushpa cantana, quishpirishcamanta cantanami tiyan. Mandaj Diospaj alli maquica, pi mana rurai tucuipajta rurajmi.

¹⁶Mandaj Diospaj alli maquica, tucuita yalli jatunmi. Mandaj Diospaj alli maquica mishana cashcata mishajmi.

¹⁷Mana huañushachu, ashtahuanpish causashamari. Mandaj Dios imalla rurashcacunataca huillashamari.

¹⁸Mandaj Diosca ñucataca sinchitami llaquichirca. Ashtahuanpish huañuchunca, mana saquihuarcachu.

¹⁹Cashcata rurajcuna yaicuna punguta pascaichigari. Chaita yaicushpamari, Mandaj Diosta alabasha.

²⁰Cai punguca Mandaj Diospajmi. Chaitami cashcata rurajcunaca yaicunga.

²¹Quiquin ñucata uyashcamantaca, alabashami. Quiquinmi ñucata quishpichij cangui.

²²Huasita shayachijcuna yanganchishpa shitashca rumillatajmi, callaripi churana rumi tucushca.

²³Chaitaca Mandaj Diosllatajmi chashna rurashca. Chaica ñucanchij ricuipica mancharinami.

²⁴Cai punllaca Mandaj Dios allita rurashca punllamari. Chai punllapica jatunta cushicushunchigari.

²⁵Mandaj Dioslla, quishpichihuayari. Mandaj Dioslla, quiquinta rogapanica. Ñucanchijta ñaupajman pushahuayari.

²⁶Mandaj Diospaj shutipi shamujca, alli nishca cachun. Mandaj Diospaj huasimantami cancunataca alli ninchij.

²⁷Mandaj Diosca Taita Diosmari. Paimi ñucanchijtaca achijyachin. Ramacunata apashpa altar gachucunacama chayaichij.

²⁸Quiquinmari ñuca Taita Dios cangui. Quiquintami alabasha. Ñuca Taita Dioslla, quiquintami jatunyachisha.

²⁹Mandaj Diostaca alabaichigari. Paica allimari. Paipaj llaquij canaca huiñaipajmari.