Read Chimborazo Highland Quichua SALMOS 144 Bible Online

SALMOS 144 - Chimborazo Highland Quichua bible

SALMOS 144

¹David rurashca Salmomi. Mandaj Diosca ñuca miticuna jatun rumimari. Paica alli nishca cachun. Macanacuipaj ñuca maquicunata alli yachachijmi. Macanacuipaj ñuca dedocunata alli yachachijmi.

²Paica ñucata llaquijmi, ñuca miticuna jatun torremi. Ñucaman fuerzata cujmi, ñucata quishpichijmi, ñuca paca tucuna escudomi, paillapimi shunguta churani. Paica ñuca mandacushca runacunata ñucata cazuchun churajmi.

³Mandaj Dioslla, ¿Runaca ima cajpitaj paitaca chaparacungui? Huañujlla runaca ¿ima cajpitaj paitaca c'uyangui?

⁴Samaita aisashpa cacharijpi shinallami runapaj causaica chingaringa. Paipaj causai punllacunaca llandu ricurishpa chingarij shinallamari.

⁵Mandaj Dioslla, quiquinpaj jahua pachata pascashpa uriyamuiyari. Urcucunapi tuparishpa cushnichiyari.

⁶Quiquinpaj relampacunahuan chingachiyari. Quiquinpaj puntajlla caspicunahuan muspachiyari.

⁷Jahuajmanta quiquinpaj maquita chutahuayari. Jatun yacucunamanta quishpichishpa llujshichihuayari. Mana rijsishca runacunapaj maquimanta llujshichihuayari.

⁸Paicunaca llullashpallami rimancuna. Paicunapaj alli maquipish llulla maquicunami.

⁹Taita Dioslla, quiquintaca mushuj cantohuanmi cantasha. Quiquintaca salteriopi tocashpami cantasha.

¹⁰Quiquinmi jatun mandajcunataca mishachij cangui. Quiquinpajta ruraj Davidtaca, quiquinmi millai espadapi huañunamanta llujshichingui.

¹¹Mana rijsishca runacunapaj maquimanta quishpichihuayari, llujshichihuayari. Paicunaca llullashpallami rimancuna. Paicunapaj alli maquipish llulla maquicunami.

¹²Ñucanchij churicunaca paicuna huiñacui punllapica sumajta huiñacuj yuracuna shina jatunyashca cachun. Ñucanchij ushushicunapish mandana huasipaj esquinapi churashca sumaj rumi shina cachun.

¹³Ñucanchij granocunata huaquichinacunaca tucui laya granocunahuan junda cashca cachun. Ñucanchij animalcunapish huaranga huaranga mirarishca cachun. Ñucanchij michina pambacunapica chunga cutinhuan huaranga huaranga mirarishca cachun.

¹⁴Ñucanchij huagracunapish trabajanapaj sinchicuna cashca cachun. Ñucanchijta quichushpa rijcunapish, ñucanchij llujshishpa rinapish ama tiyashca cachun. Ñucanchij plazacunapica macanacuiman llujshinata caparinapish ama tiyashca cachun.

¹⁵¡Tucui caicunata charij puebloca cushichishcami! ¡Ñucanchij Taita Diosca Mandaj Diosmi nij puebloca cushichishcami!