Read Chimborazo Highland Quichua SALMOS 145 Bible Online

SALMOS 145 - Chimborazo Highland Quichua bible

SALMOS 145

¹Diosta alabanapaj David rurashca Salmomi. Jatun Mandaj ñuca Dioslla, quiquintami jatunyachisha. Quiquinpaj shutitaca huiñai huiñaitami alli nisha.

²Punllantami alli nisha. Quiquinpaj shutitaca huiñai huiñaitami alabasha.

³Mandaj Diosca jatunmari. Tucuimanta yalli jatunmi cangui nishpa alabana Taita Diosmari. Paica ñuca mana entendi tucuipaj jatunmari.

⁴Quiquin rurashcacunataca huahua huahuacuna alabacungallacunami. Tucuita rurai tucuj quiquin rurashcacunatami huillangacuna.

⁵Quiquinca achij nicuj sumaj cashcata, quiquinca tucuimanta yalli alli nishca canata, mancharinacunata quiquin rurashcacunataca yuyaricushallami.

⁶Quiquinpaj jatun allicunata rurashcacunatami runacunaca huillangacuna. Ñucaca quiquin jatun cashcatami, tucuicunaman huillasha.

⁷Quiquinca jatun c'uyaj cashcatami yuyachinacunga. Quiquinpaj cashcata ruranamantami cantangacuna.

⁸Alli shungu, jatunta llaquijca Mandaj Diosmari. Paica mana utca p'iñarijmari, yallitaj llaquijmari.

⁹Mandaj Diosca tucuicunahuan allimari. Pai llaquij canaca tucui rurashcacunapaj jahuapimari.

¹⁰Mandaj Dioslla, tucui quiquin rurashcacuna quiquintaca alabachun. Quiquinpaj jucha illajcuna alli nishca nichun.

¹¹Quiquinpaj sumaj mandanata huillachuncuna. Quiquin tucuita rurai tucuj cashcata parlachuncuna.

¹²Huañujlla runacunaman quiquin tucuita rurai tucuj cashcahuan rurashcata yachaj chayachingapaj, quiquin mandanaca jatun sumaj achij nicuj cashcata yachaj chayachingapajmi huillangacuna.

¹³Quiquin mandanaca huiñaita mandacunallami. Quiquin mandanaca huahua huahuata mandacunallami.

¹⁴Mandaj Diosca tucui urmaricujcunata charirajmi. Tucui llaquilla cajcunata jatarichijmi.

¹⁵Tucuicunami quiquintaca chaparashpa shuyancuna. Quiquinmi paicunamanca carana horaspitaj carangui.

¹⁶Tucui causaita charijcunamanmi, quiquinca maquita cacharishpa carangui.

¹⁷Mandaj Diospaj ñanca tucui imapipish cashcata rurajmi. Imata rurashpapish llaquij cashcahuanmi ruran.

¹⁸Mandaj Diosca, tucui paita mañajcunapajca c'uchullapimi. Tucui shunguhuan paita mañajcunapajca c'uchullapimi.

¹⁹Paita manchajcuna imata yuyarishcataca pajtachingami. Paicuna mañashcata uyangami. Paicunataca quishpichingami.

²⁰Mandaj Diosca tucui paita c'uyajcunatami huaquichin. Ashtahuanpish tucui millaicunataca chingachingami.

²¹Mandaj Diosta alabanatami ñuca shimihuanca huillasha. Paipaj jucha illaj shutitaca tucuicuna alabashca cachun. Huiñai huiñaita alli nishca cachun.