Read Chimborazo Highland Quichua SALMOS 147 Bible Online

SALMOS 147 - Chimborazo Highland Quichua bible

SALMOS 147

¹Mandaj Diostaca alabaichigari. Ñucanchij Taita Diosta salmocunata cantanaca allimari. Paita alabanaca sumajmari, mishquimari.

²Mandaj Diosca Jerusalenta shayachijmi. Shujtaj llajtaman prezu apashca israelcunataca paimi tandachimunga.

³Paimi shungu p'aquirishcacunataca alliyachin. Paicunapaj chugricunatapish paimi jambishpa pilluchin.

⁴Luzerocuna mashna cashcatapish paimi yupashcata charin. Tucui chaicunataca paicunapaj shutipimi cayan.

⁵Ñucanchij jatun Diosca jatunmi. Pai tucuita rurai tucuj cashcaca yallitaj jatunmi. Pai yachaj cashcaca manataj tucurijmi.

⁶Mandaj Diosca mana jatun tucushcacunataca jatun canapi churajmi. Millaicunataca pambacama cumurichijmi.

⁷Mandaj Diostaca cantashpa alabaichigari. Ñucanchij Diostaca arpahuan cantaichigari.

⁸Paica jahua pachata p'uyuhuan tapachijmi. Paica tamyata allpapaj allichijmi. Paica urcucunapi q'uihuata huiñachijmi.

⁹Paica tucui animalcunaman carajmi. Cuervocunapaj huahuacuna mañajpipish cujmi.

¹⁰Paica caballopaj fuerzapica mana cushicunchu. Fuerzasapa runahuanpish mana cushicunchu.

¹¹Mandaj Diosca paita manchajcunahuanmi cushicun. Pai llaquij cashcata shuyajcunahuanmi cushicun.

¹²Jerusalén, Mandaj Diosta alabaiyari. Sionpish, cambaj Taita Diosta alabaiyari.

¹³Paimi cambaj pueblo pungucunapica, fierro aldabacunata sinchita churarca. Paimi canpi caj huahuacunataca alli cashca cachun nirca.

¹⁴Paimi cambaj llajtapica, sumaj causaita cun. Ashtahuan alli trigota huijsa jundata caranga.

¹⁵Paimi cai pachamanca paipaj shimita cachan. Paipaj shimica utcami tucuita rin.

¹⁶Paimi rasutapish millmata shina urmachin. Casatapish ushpata shinami urmachin.

¹⁷Paimi razutaca mirga mirgata urmachin. Chai chiripica, ¿pitaj ahuantai tucungari?

¹⁸Paipaj shimihuan rimashpaca razutaca yacuyachinllami. Paipaj huaira p'ucujpica yacuca cutin purinllami.

¹⁹Jacobmanca paimi paipaj shimicunata ricuchirca. Israelcunamanpish paimi chaitataj pajtachichun nishcacunata, mandashcacunata curca.

²⁰Shujtaj llajtacunamanca chaicunata mana piman curcachu. Pai mandashcacunataca mana rijsircacunachu. ¡Mandaj Diosta alabaichigari!