Read Chimborazo Highland Quichua SALMOS 18 Bible Online

SALMOS 18 - Chimborazo Highland Quichua bible

SALMOS 18

¹Tonota alli yachaj cantachichun, Mandaj Diospajta ruraj David rurashca Salmomi. Paita p'iñajcunapaj maquimantapish Saulpaj maquimantapish, Mandaj Dios quishpichi punllami, Paitaca cashna nishpa cantarca: Mandaj Dioslla, cantaca c'uyanimi, canca ñucaman fuerzata cujmi cangui.

²Mandaj Dioslla, ñuca jatun rumilla. Ñuca miticuna sinchi huasilla, ñucata quishpichijlla. Ñuca Dioslla, ñucaman fuerzata cujlla, paillapimi shunguta churani. Ñuca paca tucuna escudolla, ñucata quishpichij, ñuca fuerzalla. Jahuajman ñuca paca tucunalla.

³Mandaj Diostami mañasha. Paica alabashca cana Diosmari. Paimantami ñucata p'iñajcunamantapish quishpirisha.

⁴Huañuica huascahuan sipicuj shinami pillurca. Millaicunaca yacu jundai shamuj shina shamushpami ñucataca manchachirca.

⁵Huañuica ñucataca huascahuan sipicuj shinami charicurca. Pambana jutcupi ña pambacushca shinami carcani.

⁶Chashna llaquihuan cashpami, Mandaj Diosta mañarcani. Ñuca Diosta caparircani. Paica ñuca caparishcataca paipaj huasimantami uyahuarca. Ñuca caparishcaca paipaj rinrinmanmi uyarirca.

⁷Allpaca cuyurishpami chujchurca. Urcucunapish cuyurijpica, urcuta charicuj rumicamami cuyurirca. Pai p'iñarijpimi, chashna chujchurca.

⁸Paipaj singamantaca cushnimi llujshirca. Paipaj shimimantaca tucuchij ninami llujshirca. Paica lunyacuj nina brazustami shitarca.

⁹Jahua pachata pascashpami uriyamurca. Sangu amsa p'uyupi sarushcami uriyamurca.

¹⁰Paica shuj querubinpi tiyarishpami volarca. Huairapaj alaspi tiyarishpami volarca.

¹¹Paita pacachunca amsatami churarca. Jahuata purij amsa p'uyutami yacu aparishcata paipaj muyundijpi churarca. Cortina shina cachunmi paipaj muyundijta churarca.

¹²Paica achij nicujmi ricurirca. Paipaj ñaupajpi caj p'uyumantaca rundu, lunyacuj nina brazusmi llujshirca.

¹³Mandaj Diosca jahua pachapimi c'ulun nirca. Jahua pacha Dios rimashcami chashna uyarirca. Chaica rundumi, lunyacuj nina brazusmi carca.

¹⁴P'iñajcunataca paipaj puntajlla caspita shitashpami caita chaita cacharca. Paipaj relampacunata cachashpami chingachirca.

¹⁵Mandaj Dios, can yallitaj p'iñarishpa p'ucujpica, mama cucha yacu ucujpish ricunallami saquirirca. Cai pacha allpapaj shungupish ricunallami tucurca.

¹⁶Diosmi ñucataca jahuamanta maquita chutashpa japihuarca. Millpucuj jatun yacumantami llujshichihuarca.

¹⁷C'ari c'ari ñucata p'iñajmantami quishpichirca. Ñucata p'iñajca ñucata yalli c'ari c'aricunami carca.

¹⁸Paicunaca ñuca llaquihuan cai punllapimari japishpa llaquichircacuna. Chashna cajpipish, Mandaj Diosmi ñucataca ayudahuarca.

¹⁹Ñucataca canmi jatun pambaman llujshichij shina quishpichircangui. Can munashca cajpimi quishpichircangui.

²⁰Ima shinami cashcata rurarcani, chai shinallatajmi Mandaj Diosca curca. Ñuca chuya maqui cashca shinallatajmi paipish ñucaman cuna cashcataca curca.

²¹Ñucaca Mandaj Diospaj ñanpimi purircani. Paita mana manchajcuna shinaca, Diosmantaca mana caruyashcanichu.

²²Can yachachishcacunataca, manataj cungarircanichu. Can mandashcacunamantaca, manataj caruyarcanichu.

²³Mana allita ruranamantaca huaquichirircanimi. Paipaj ñaupajpica ima pandata mana rurarcanichu.

²⁴Ñuca ima shinami cashcata rurarcani, chai shinallatajmi Mandaj Diosca ñucaman cuna cashcataca curca. Paipaj ñaupajpi ima shinami ñuca maqui chuya carcani, chai shinallatajmi cun.

²⁵Llaquij runamanca, canpish llaquij cashcallatatajmi ricuchingui. Tucuita alli rurajpajca, canpish allita ruranguimi.

²⁶Chuya cajmanca, canpish chuya cashcallatatajmi ricuchingui. Llaquichijcunapajca canpish llaquichij cashcallatatajmi ricuchingui.

²⁷Llaquihuan cajcunataca canmi quishpichingui. Jatun tucushcacunataca cumurichinguimi.

²⁸Mandaj Dioslla, canmi ñuca lamparataca japichingui. Ñuca Dioslla, amsapi cajpipish canmi achijyachingui.

²⁹Canhuanca achca soldadocunatapish urata janajta cachashallami. Ñuca Dioshuanca jatun pircacunatapish urmachishpa llaquichingapaj yaicushallami.

³⁰Mandaj Diospaj ñanpica, ima panda mana tiyanchu. Mandaj Diospaj shimica rupachishpa tucui mapata anchuchishca cullqui shinami. Paipi shunguta churashpa shuyajcunapajca escudo shina pacajmi.

³¹Mandaj Diosmanta shujtaj Diosca ¿pitaj tiyangari? Mandaj Diosllamari Diosca. ¿Pitaj rumica cangari? Ñucanchij Diosmari chai rumica.

³²Diosmi paipaj poderhuan chumbillichin. Ñuca ñanta allichijca paimari.

³³Paimi ñuca chaquicunataca taruga chaqui shina callpajta ruran. Jahua urcucunapi cajpipish ima manchai illajllatami charihuan.

³⁴Macanacungapaj ñuca maquicunata yachachijpish paimari. Bronce arcota ñuca rigrahuan chutanata yachachijpish paillatajmari.

³⁵Ñucata quishpichij escudotapish canmi cungui. Cambaj alli ladopimi charihuangui. Cambaj c'uyaihuanmi jatunyachishcangui.

³⁶Ñuca purichunpish ñantaca purinajllatami rurashcangui. Chaimi ñuca chaquicunapish mana lluchcarishca.

³⁷Ñucata p'iñajcunata catishpaca, japingacamami catircani. Tucuita tucuchishpatajmi tigraj carcani.

³⁸Tucuicunami ñuca chaqui ucupi urmarcacuna. Ñutuchircanimi manataj jatari tucungacunachu.

³⁹Jatun macanacuipi macanacuchunpish fuerzatami chumbillichishcangui. Ñucata p'iñajcunataca cumurichishpami ñuca maquipi churashcangui.

⁴⁰Ñucata p'iñajcunataca tigrachishpami cacharcangui. Ñucata p'iñajcunata ñuca tucuchichunmi chashna rurarcangui.

⁴¹Paicuna caparicujpipish pi quishpichij mana tiyarcachu. Mandaj Diosta caparijpipish mana uyarcachu.

⁴²Tucuita cutashpami huaira apana ñutu allpata shina rurarcani. Ñancunapi sirij lodota shinami llujshichishpa shitarcani.

⁴³Ñuca llajtapi causajcuna p'iñacunmantapish quishpichircanguimi. Llajtacunata jatun mandajtami rurarcangui. Mana rijsishca runacunami ñucapajtaca rurarcacuna.

⁴⁴Mana rijsishcacunamari ñucata cazungapaj curincuna. Ñuca rimajta uyashpaca cazunllacunami.

⁴⁵Mana rijsishcacunaca fuerza illajmi tucurcacuna. Paicuna paca tucushca cashcamantapish chujchushpami llujshircacuna.

⁴⁶Mandaj Diosca huiñaita causacuchunlla. Ñuca jatun Rumica alli nishca cachun. Ñucata quishpichij Diosca, jatunyachishca cachun.

⁴⁷Paica ñucata llaquichijcunata llaquichij Diosmi. Gentecunata ñuca ucupi churaj Diosmi.

⁴⁸Paica ñucata p'iñajcunapaj maquimanta quishpichijmi. Ñucata llaquichingapaj huaicashpa jataricujpipish ñucata paicunapaj jahuapi churajmi. Huañuchij runapaj maquimantami quishpichihuarcangui.

⁴⁹Mandaj Dioslla, chaimantami tucui llajtacunapi canmanta huillasha. Cambaj shutitaca cantacushallami.

⁵⁰Pai churashca jatun mandajtaca c'uyanmi. Paitaca jatun macanacuipipish mishachinmi. Davidtapish, paipaj huahua huahuacunatapish huiñaitami chashna pushanga.