Read Chimborazo Highland Quichua SALMOS 22 Bible Online

SALMOS 22 - Chimborazo Highland Quichua bible

SALMOS 22

¹Ajelet-sahar nishca tonota alli yachaj cantachichun, David rurashca Salmomi. Ñuca Dioslla, ñuca Dioslla, ¿ima nishpataj ñucallata shitashcata saquingui? Ñucata mana quishpichingapajmari caruyashcangui. Ñuca caparishcatapish mana uyangapajmari caruyashcangui.

²Ñuca Dioslla, punlla mañajpipish, mana cutichinguica. Tuta mañajpipish, mana samachinguica.

³Ashtahuanpish quiquinca jucha illajmari cangui. Israelcuna alabacun chaupipimi causangui.

⁴Ñucanchij yayacunaca quiquinpimi shunguta churarcacuna. Quiquinca shunguta churajpica quishpichircanguimi.

⁵Quiquinta mañashpaca quishpichishcami carcacuna. Quiquinpi shunguta churashpaca manataj pingachishca carcacunachu.

⁶Ashtahuanpish ñucaca mana runa shinachu cani. C'uru shinallami cani. Runacuna chanzata rurashcami cani. Llajtapi causajcuna p'iñashcami cani.

⁷Ñucata ricujcunaca tucuicunami ñucataca chanzata rurashpa ricuncuna. Shimita huishtushpa umata cuyuchishpami, cashna nincuna:

⁸“Cai runaca Mandaj Diosmanmi mingarij carca. Pai quishpichinaman shamuchun. Paipi shunguta churajtaca paillataj quishpichichunyari” nincunami.

⁹Ashtahuanpish ñuca mamapaj huijsamantaca quiquinmari llujshichircangui. Ñuca mama marcashca huiñachicujpirajmi canpi shunguta churanata yachachircangui.

¹⁰Manaraj huacharijpimi quiquinman mingashca carcani. Ñuca mamapaj huijsapi cai pachamantami ñuca Dios cangui.

¹¹Ñucamantaca amataj caruyangui, jatun llaquica c'uchullapimi. Pi shujtaj ayudajca mana tiyanchu.

¹²Ñucataca achca huagracunamari muyunchishca. Basán llajta p'iña huagracunami ñucataca muyunchishca.

¹³Paicunaca shimita pascashpami ñucata p'iñashpa c'amincuna. Millpunachicuj león huacarishpa saltanalla shinami tucuncuna.

¹⁴Yacu shinami talliricuni. Ñuca tullucunapish mucucunamanta llujshishca shinami. Ñuca shungupish ñuca ucupica huira shinami yacuyacun.

¹⁵Ñuca shimipish callana shinami chaquishca. Ñuca c'allupish palagrapimi llutarishca. Huañushpa allpa tucuchunmari saquigringui.

¹⁶Allcucunami ñucataca muyunchishca. Mirga millai runacunami ñucataca muyunchishca. Ñuca maquicunatapish, ñuca chaquicunatapish chugrichincunami.

¹⁷Ñuca tullucunapish yupanallami. Chashna rurashpaca, paicunaca ricuracuncunami. Ima tucujta chaparacuncunami.

¹⁸Ñuca churanataca paicunapurami chaupircacuna. Ñuca churanataca sorteashpami japircacuna.

¹⁹Shina cajpipish Mandaj Dioslla, quiquinca ama caruyapaichu. Quiquinca ñucapajca muyundij pircami cangui. Ñucata quishpichingapaj utca shamuyari.

²⁰Ñuca almataca espadamanta quishpichihuai. Allcucuna huañuchicunmanta ñuca causaita quishpichihuai.

²¹Leonpaj shimimanta quishpichihuayari. Búfalo huagracunapaj gachucunamanta huaquichihuayari.

²²Ñuca huauquicunaman quiquinpaj shutita huillashami. Tandanacushcacunapaj chaupipi quiquinta alabashami.

²³Mandaj Diosta manchajcunaca paita alabaichigari. Jacobpaj huahua huahuacuna paitaca jatunyachichigari. Cancunaca Mandaj Diosta manchaichij. Israelpaj huahua huahuacunami canguichij.

²⁴Llaquihuan huañucujpipish yangata shina mana saquircachu, mana shitarcachu. Paipaj ñahuitapish mana shujman churarcachu. Ashtahuanpish paita caparijpica uyarcami.

²⁵Jatun tandanacuicunapica, canmi ñuca alabana cangui. Quiquinta manchajcunapaj ñaupajpimi, ñuca imalla cusha nishcacunataca pajtachisha.

²⁶Mana jatun tucushcacunaca micungacunami. Mana nijtami micungacuna. Mandaj Diosta mashcajcunaca paita alabangacunami. Paicunaca unitami causangacuna.

²⁷Tucui pachapi causajcunami, Mandaj Diosta yuyarishpa paiman cutiringacuna. Tucui laya aillucunami, paipaj ñaupajpi adorangacuna.

²⁸Mandanaca Mandaj Diospajmi. Paimi tucui llajtacunata mandanga.

²⁹Cai allpapi tucui jatuncunami, micungacuna paita adorangacuna. Huañushpa ñutu allpa tucunallacunapish, paipaj ñaupajpimi cunguringacuna. Pipish quiquinllatajca mana causaita charinchu.

³⁰Ñuca huahua huahuacunapish quiquinpajtami rurangacuna. Tucui paicunami Mandaj Diosmanta huillangacuna. Huahua huahua huillacungallacunami.

³¹Q'uipata huacharijcunamanpish pai imalla rurashcataca huillacungallacunami. Pai cashcata ruraj cashcahuan, chashna rurashcataca huahua huahuacunaman huillacungallacunami.