Read Chimborazo Highland Quichua SALMOS 30 Bible Online

SALMOS 30 - Chimborazo Highland Quichua bible

SALMOS 30

¹Diospaj huasita mingacui punllapi cantashca Salmomi. David rurashca Salmomi. Mandaj Dioslla, ñucataca jatun canapimi churashcangui. Ñucata p'iñajcuna cushicuchunca manataj saquishcanguichu. Chaimanta quiquintaca sumajmi cangui, allimi cangui nicushallami.

²Mandaj Taita Dioslla, canta mañarcanimi alliyachihuarcanguimi.

³Mandaj Dioslla, ñuca almataca Seolmantami huichiyachircangui. Pambana jutcuman ama uriyachunmi causaita cuhuarcangui.

⁴Jucha illajllacuna Mandaj Diosta cantaichij. Mandaj Diosca jucha illajlla cashcata yuyarishpa tandanacuichij.

⁵Paica ashacamallami p'iñarin. Paica tucui causaipimi c'uyacunlla. Tucui tuta huacai tiyashpapish, pacarijpica cushicuimi tiyan.

⁶Ñuca alli causacushpaca: “Pi mana cuyuchingachu” nircanimi.

⁷Quiquinca Mandaj Diosmi cangui. C'uyashcamantami ñucataca jatun urcuta shina pi mana cuyuchipajta rurashcangui. Quiquinpaj ñahuita anchuchijpica, musparircanimi.

⁸Mandaj Dioslla, quiquintami caparisha. Jatun Diostami rogarisha.

⁹Ñucata huañuchun saquishpaca, ¿imatataj japinguiyari? Pambana jutcuman richun saquishpaca ¿imatataj japinguiyari? ¿Ñutu allpa tucushcaca quiquintaca alabangachu? ¿Ñutu allpa tucushcaca quiquinca mana llulla cashcataca huillangachu?

¹⁰Mandaj Dioslla, uyahuayari. Ñucataca llaquihuayari. Mandaj Dioslla ñucata ayudaj caiyari.

¹¹Ñuca llaquilla cashpa huacacujtaca, bailacuj canamanmi tigrachishcangui. Llaquilla cashpa churarinataca llujshichishcanguimi. Cushicuitami chumbillichishcangui.

¹²Ñuca sumajyarina Dioslla quiquintami cantasha. Manataj upalla cashachu. Mandaj Dios ñuca Dioslla tucui causaipimi quiquintaca alabasha.