Read Chimborazo Highland Quichua SALMOS 31 Bible Online

SALMOS 31 - Chimborazo Highland Quichua bible

SALMOS 31

¹Tonota alli yachaj cantachichun, David rurashca Salmomi. Mandaj Dioslla, quiquinpimi shunguta churani. Ñuca musparichun amataj saquingui. Quiquinpaj cashcata rurashcahuan quishpichihuai.

²Quiquinpaj rinrinta mañachishpa ñucata uyahuayari. Utca quishpichihuayari. Quiquinca ñucapaj sinchi rumi cayari. Muyundijta pirca shina quishpichij cayari.

³Quiquinca ñuca jatun rumimi cangui. Ñuca miticuna sinchi huasimi cangui. Quiquinpaj shutihuan ñucata pushahuangui. Quiquinpaj ñanpi purichihuangui.

⁴Linchitamari tindishca, chai linchimanta ñucata llujshichihuayari. Quiquinca ñuca miticunami cangui.

⁵Ñuca espiritutaca quiquinpaj maquipimi mingani. Mandaj Diosca cashcata rurajmi cangui. Quiquinmi ñucata quishpichij cangui.

⁶Rurashcalla manapish dios cajcunapi shunguta churajcunataca p'iñanimi. Ashtahuanpish ñucaca Mandaj Diospimi shunguta churani.

⁷Quiquinca ñuca llaquihuan cajtami ricushcangui. Ñuca alma llaquihuan huañucujtami rijsingui. Mandaj Dioslla quiquinpaj c'uyaihuan cushichijpimi cushicuni.

⁸P'iñajpaj maquipica mana churarcanguichu. Ñucataca ancho pambapimi shayachircangui.

⁹Mandaj Dioslla, ñucata llaquihuayari. Jatun llaquipimari cani. Llaquihuanmari ñuca ñahuicunapish tucuricun. Ñuca almapish, ñuca cuerpopish tucuricunmari.

¹⁰Ñuca causaica cai nanaicunahuanmi utca tucuricun. Aij nicujllapica, achca huatata causanapish utcamari tucuricun. Millaita ñuca rurashcamantaca ñuca fuerzapish tucurimunmi. Ñuca tullucunapish tucuricunmi.

¹¹Ñucata p'iñajcunapaj chanzata ruranami tucushcani. Ñuca c'uchullapi causajcunapajcarin ashtahuan chanzata ruranami tucushcani. Ñucata rijsijcunapajpish mancharinami tucushcani. Ñanpi ñucata ricujcunapish miticushpami callpancuna.

¹²Huañushcata shina paicunapaj shungullapipish ña mana yuyarinchu. P'aquirishca vasota shinami cungarishcacuna.

¹³Achcacuna llullashpa ñucata llaquichisha nicujtami uyani. Maipi ñuca cajpipish manchaimi japin. Ñucata llaquichingapajmi tandanacushpa parlanacuncuna. Huañuchinatapishmi yuyancuna.

¹⁴Ashtahuanpish ñucaca Mandaj Dioslla, quiquinpimi shunguta churani. “Quiquinmi ñuca Dios cangui” ninimi.

¹⁵Ñuca causaica quiquinpaj maquipimi. Ñucata p'iñajcunapaj maquimanta quishpichihuai. Ñucata llaquichina yuyailla llaquichisha nicujcunapaj maquimanta quishpichihuai.

¹⁶Quiquinpaj ñahuihuan quiquinpajta rurajtaca achijyachihuai. Quiquinpaj c'uyaihuan quishpichihuai.

¹⁷Mandaj Dioslla, ñucaca quiquinta mañashpa causajmi cani. Ñuca pingai tucuchun ama saquihuaichu. Quiquinta mana rijsijcunataca pingachishca cachun. Seolman shitashca cachun.

¹⁸Cashcata rurajta yallitaj llaquichishpa rimajcunata, cashcata rurajta jatun tucushpa yangapi churajcunata, llullaj shimicunataca ama rimajta rurashca cachun.

¹⁹Quiquinpaj c'uyaica yallitaj jatunmi. Chaitaca quiquinta manchajcunapajmi huaquichishcangui. Quiquinpi shunguta churajcunapimi ricuchishcangui. Chaitaca huañujlla aichayuj runacunapaj ñaupajpimi ricuchishcangui.

²⁰Runaca ñucata llaquichinapajca pacallapimi yuyaricun. Mandaj Dioslla quiquinpaj pacallapi ñucata pacangui. Millaita rimaj c'allucunamanta quiquinpaj carpa huasipi pacashpa churai.

²¹Muyushpa sinchi pircayuj pueblopimi, paipaj llaquishcahuan ñucapaj allita rurarca. Paipaj c'uyaihuanmi mancharinacunata rurarca. Chaimanta Mandaj Diostaca alli nishca cachun.

²²Llaquihuan ñuca musparicushpaca: “Quiquinpaj ñahuimantaca anchuchishca cashcatami” yuyarcani. Ashtahuanpish ñuca quiquinta rogashpa mañashcataca uyashcanguimi. Quiquinta ñuca caparishcata uyashcanguimi.

²³Mandaj Diospajlla cajcuna, tucuicuna paita c'uyaichij. Paillapi shunguta churajcunataca Mandaj Diosmi huaquichin. Imapipish jatun tucushca cajcunamanca, paicuna rurashca shinallatajmi llaquichinga.

²⁴Mandaj Diospi shunguta churajcunaca tucuicuna fuerzarichijlla. Cancunapaj shungupica, ashtahuan fuerzarichijlla.