Read Chimborazo Highland Quichua SALMOS 35 Bible Online

SALMOS 35 - Chimborazo Highland Quichua bible

SALMOS 35

¹David rurashca Salmomi. Mandaj Dioslla, ñucata p'iñajcunapaj ñaupajpi shayariyari. Ñucata huaicacujcunahuan macanacuiyari.

²Macanacuna churanata churariyari. Escudota japiyari. Ñucata ayudangapaj shayariyari.

³Lanzata llujshichi. Ñucata llaquisha nicujcunataca jarcashpa shayariyari. Ñuca almamanca: “Ñucami canta quishpichij cani” niyari.

⁴Ñucata huañuchingapaj mashcajcunaca pingachishca cachun, muspachishca cachun. Ñucata urmachingapaj yuyaricujcunataca huashaman tigrachishca cachun. Pingachishca cachun.

⁵Mandaj Diospaj ángel callpachichun. T'amuta huaira ñaupachishpa rij shina callpachichun.

⁶Paipaj ñanca amsa cachun. Lluchcaricuj cachun. Mandaj Diospaj ángel catishpa llaquichichun.

⁷Manapish ima millaita rurajpimari, ñuca urmachun jutcupi linchita churarcacuna. Yangamantamari ñuca urmachun jutcuta rurarcacuna.

⁸Mana yachashcapi paicunallatataj llaquichichun. Pacallapi churashca linchipica, paillataj urmashca cachun. Paillataj rurashca jutcullapitaj urmashpa llaqui tucushca cachun.

⁹Chashna tucujpica ñuca almaca Mandaj Diospimi cushicunga. Quishpichij Mandaj Diospimi cushicunga.

¹⁰Tucui ñuca tullucunami: “Mandaj Dioslla, quiquin shinaca ¿pitaj tiyangari? Quiquinca llaquilla caj runatapish paita yalli c'ari c'ari runa llaquichicujpi quishpichijmi cangui. Huajcha, imata mana charijcunatapish, quichujcunapaj maquimanta quishpichijmi cangui” nishami.

¹¹Yallitaj millaicunami ñucata juchachishpa huillangapaj jatarincuna. Paicunaca ñuca mana yachashcatami tapuncuna.

¹²Paicunaca ñuca almata llaquichingapajmi paicunapaj allita rurashcamantaca, millaita rurashcahuan ñucaman cutichincuna.

¹³Ashtahuanpish ñucaca paicuna ungushca cajpica, llaquilla cashcata ricuchij churanatami churarircani. Llaquilla shungumi ayunashpa mañarcani. Ñuca shungumanca paicunamanta mañana yuyaica mana illarcachu.

¹⁴Ñucahuan alli apanacujmanta shinami llaquilla purircani. Ñuca quiquin huauquimanta shinami llaquilla purircani. Ñuca mama huañujpi shinami llaquilla churanata churashca llaquilla purircani.

¹⁵Ashtahuanpish ñuca ñitcashpa urmajpica paicunaca cushicushpami tandanacurcacuna. Ñucata p'iñashpa llaquichingapajca millanayaj gentecunami tandanacurcacuna. Mana rijsishcacuna shinami tandanacurcacuna. Paicunaca mana samarishpami yallitaj llaquichircacuna.

¹⁶Millaita rurajcuna, chanzata rurajcuna, umajcunaca ñucata p'iñashpami quirucunata canirircacuna.

¹⁷Jatun Dioslla, ¿maicamataj chaicunataca ricucunguillari? Ñucata chingachisha nicujcunamantaca llujshichihuayari. Leoncunamantaca ñuca causaita quishpichihuayari.

¹⁸Chashna rurajpica, jatun tandanacuipimi quiquinmantaca huillasha. Achca gentecunapaj chaupipimi quiquintaca alabasha.

¹⁹Ñuca manapish imata rurajpi ñucata p'iñajcunaca amataj cushicuchun. Yangamanta ñucata p'iñajcunaca ñahuita sipushpa ama chanzata rurachun.

²⁰Paicunaca sumaj causaimantaca mana rimanchu. Llajtapi sumajta causajcunata p'iñashpami umanata yuyarincuna.

²¹Shimita pascashpami ñucataca: “Jajai, jajai, canllataj urmajtaca ñucanchij ñahuihuantajmi ricunchij” nincuna.

²²¡Mandaj Dios quiquinllataj ricunguimi! ¡Ama upalla saquichu! ¡Jatun Dioslla ñucamantaca ama caruyaichu!

²³¡Ñuca Dioslla, rijchariyari. Ñucata imamanta llaquichicujta ricungapaj utca shamuyari. Jatun Dioslla llaquipi ñuca cajpi mitsangapaj utca shamuyari!

²⁴Mandaj ñuca Dioslla, quiquin cashcata ruraj cashcahuan ñucata ricuhuayari. Llaquihuan ñuca cajpi paicuna cushicuchun ama saquihuaichu.

²⁵Paicunapaj shungupica: “Ñucanchij yuyashcatamari ruranchij nichunca ama saquichu. Ashta millpunchijtajmari” nichunca ama saquichu.

²⁶Llaquihuan ñuca cajpi cushicujcunaca shuj cutintaj pingai tucushca, muspachishca cachun. Ñucata p'iñashpa jatun tucujcunaca, shuj cutintaj pingai tucushca cachun musparishca cachun.

²⁷Ashtahuanpish manapish imata rurajpi ñucata mitsajcunaca cantaichij, cushicuichij. “Mandaj Diostaca jatunyachishca cachun” nishpa huiñaita nicuchunlla. Mandaj Diosca paipajta rurashpa causajtaca sumajta causachun munajmi.

²⁸Ñuca c'alluca quiquinca cashcata ruraj cashcatami huillanga. Punllantami quiquinta alabasha.