Read Chimborazo Highland Quichua SALMOS 38 Bible Online

SALMOS 38 - Chimborazo Highland Quichua bible

SALMOS 38

¹Dios yuyarichun David rurashca Salmomi. Mandaj Dioslla, p'iñarishcahuan ama huanachihuaichu. P'iñarishcahuan ama llaquichihuaichu.

²Quiquinpaj puntajlla caspicunaca ñucapimari urmarca. Quiquinpaj maquipish ñuca jahuamanmi uriyamushca.

³Quiquin p'iñarishcamantaca ñuca aichaca maipi mana sano canica. Ñuca juchacunamantaca ñuca tullucunapish mana casijlla cai tucunchu.

⁴Ñucallataj millaita rurashcamari ñuca uma jahuapi llapishpa caticun. Llashaj quipi shinamari ñuca jahuapi llapishca caticun.

⁵Ñucaca rumi shungumi tucushcani. Chaimi carachahuan ismushpa ashnacuni.

⁶Curcumi tucushcani. Pingachishcami cani. Yallitaj llaquihuanmi cani. Punllantami llaqui churanallata churashca purini.

⁷Chashna cashpami ñuca tucui huasha ruparishpa huañucuni. Ñuca aichaca ima mana sanochu.

⁸Tucui aicha ñutushca shinami cani, yallitaj irquiyanica. Ñuca shungupica yallitaj llaquihuan canica. Caparicunica.

⁹Jatun Dioslla, tucui ñuca ima yuyashcacunaca tucuimi quiquinpaj ñaupajpi. Ñuca shungu llujshishcapish quiquinpica mana pacallachu.

¹⁰Ñuca shunguca manchanayajtami t'inyacun. Ñuca fuerzapish anchurinmari. Ñuca ñahuipish ña mana achijllata ricunchu.

¹¹Ñucahuan alli apanacujcunapish, ñucahuan purijcunapish, ñuca carachahuan cashcamantaca caruyancunami. Ñuca familiacunapish caruyancunami.

¹²Ñucata huañuchishun nicujcunaca, laziyanapaj angutami rurancuna. Ñucata llaquichishun yuyacujcunaca, millaitami rimancuna. Ñucata ima shina umanatami punllanta yuyarincuna.

¹³Ashtahuanpish ñucaca rinrin mana uyaj shinami mana uyani. Mana rimaj shinami imata mana rimani.

¹⁴Ñucaca shuj mana uyaj runa shinami cani. Chai runa shina mana cutichi tucunichu.

¹⁵Mandaj Dioslla, quiquinllapimi shunguta churani. Mandaj ñuca Dioslla, quiquinmi ñuca randi cutichingui.

¹⁶Ñucaca: “Ñucamantaca ama cushicuichijchu. Ñuca chaqui llushpirijpipish ama jatun tucuichijchu” nircanimi.

¹⁷Ashtahuanpish ñucaca ña huañunallami cani. Ñucataca nanaica punllantamari nanachicunlla.

¹⁸Chaimanta cunanca millaita ñuca rurashcataca quiquinmanmi huillasha. Juchallishcamantaca llaquirishami.

¹⁹Ñucata p'iñajcunaca, c'ari c'ari sinchi runacunami. Manapish millaita rurajpi ñucata p'iñajcunaca achcacunami tucushcacuna.

²⁰Allita rurashcamantaca millaita rurashpami cutichincuna. Paicunaca ñucata p'iñajcunami. Allita rurashpa catishcamantami ñucataca p'iñancuna.

²¹Mandaj Dioslla, ama ñucallata saquihuaichu. Ñuca Dioslla, ñucamanta ama caruyapaichu.

²²¡Jatun Dioslla, ñucata quishpichij Dioslla. Utca ayudanaman shamupai!