Read Chimborazo Highland Quichua SALMOS 41 Bible Online

SALMOS 41 - Chimborazo Highland Quichua bible

SALMOS 41

¹Tonota alli yachaj cantachichun, David rurashca Salmomi. Huajcha runa yuyailla cajca cushichishcami. Paitaca llaqui punllapica Mandaj Diosmi llaquimanta llujshichinga.

²Paitaca Mandaj Diosmi huaquichinga. Paimi causaita cunga. Cai allpapipish cushichishcami canga. Paita p'iñajcuna paicuna munashcata rurachunpish paicunamanca mana cunguichu.

³Camapi nanaihuan cajpipish, Mandaj Diosmi fuerzata cunga. Ungushca siricujpipish, camataca ñutujllatami ruranga.

⁴Ñucaca: “Mandaj Dioslla, ñucata llaquihuayari. Ñuca almata alliyachihuai. Quiquinta p'iñachishpami juchallishcani” nircanimi.

⁵Ñucata p'iñajcunaca ñucataca llaqui tucushca canman nincunami. “Cai runaca ¿ima horastaj huañungari, ima horastaj paipaj shutica chingaringari”? nishpami tapunacuncuna.

⁶Ñucata ricunaman shamushpapish llullashpallami parlancuna. Paicunapaj llaquipajllatajmi paicunapaj shungupica, millai yuyaicunata japincuna. Canllaman llujshishpaca, chaitami tucuicunaman huillancuna.

⁷Ñucata llaquichingapajmi tandanacushpa huashalla parlanacuncuna. Tucui ñucata p'iñajcunami chashna parlanacuncuna. Ñucata llaquichingapajca cashnami yuyarincuna:

⁸“Paitaca millaimari macashca. Chai ungüimari tucuita tapashca. Chai ungüihuan camapi siricujca manataj jataringachu” nincunami.

⁹Ñucahuan alli apanacuj runa, ñuca paipi shunguta churashca runa, ñuca micunata micujllatajmi, ñucata p'iñashpa chaqui talonhuan jaitarca.

¹⁰Shina cajpipish Mandaj Dioslla, quiquinca ñucata llaquihuayari. Ñucata jatarichihuayari. Paitapish chashnallataj rurangapaj.

¹¹Ñucata p'iñaj ñucamanta cushicuchun ama saquihuaichu. Chaimi ñucaca quiquin munashca cashcata yachasha.

¹²Ñucaca tucuipi allimi carcani. Ñucataca quiquinpaj maquipi charihuai. Ñucataca quiquinpaj ñaupajpi huiñaipaj cachunmi churahuashcangui.

¹³Mandaj Diostaca alli nishca cachun. Israelcunapaj Diostaca huiñai huiñaita alli nishca cachun. Chashna cachun. Chashna cachun.