Read Chimborazo Highland Quichua SALMOS 42 Bible Online

SALMOS 42 - Chimborazo Highland Quichua bible

SALMOS 42

¹Tonota alli yachaj, sumaj shimicunata quillcanata yachaj Corepaj huahuacuna rurashca Salmomi. Taita Dios taruga ima shinami yacunachishpa huacarishpa callpacun yacucunata mashcashpa purin. Chashnallatajmi ñuca almapish quiquinta mashcashpa caparin.

²Ñuca almaca Taita Diostami yacunachin. Causaj Diostami yacunachin. ¿Ima horataj Taita Diospaj ñaupajpica, ñahui ñahui ricurigrishari?

³Tutapish, punllapish ñuca micunaca huiquillami carca. Punllantami ñucataca: “¿Maitagari cambaj Taita Diosca?” nincuna.

⁴Caicunata ñuca yuyarishpaca, shungumantami llaquirini. Achcacunahuan ricuj cashcata, Taita Diospaj huasiman achcacunata pushacuj cashcata, jatun fiestapi achcacuna cushicushpa cantashpa alabacujcunapaj chaupipi caj cashcata yuyarishpami llaquirini.

⁵Ñuca almalla ¿ima nishpataj shaicuringuiyari? ¿Ima nishpataj ñuca ucupica yallitaj muspachinguiyari? Taita Diosta shuyailla. Paitaca alabasharajmi. Paica ñucata quishpichijmi. Ñuca Diosmi.

⁶Ñuca Dioslla, ñuca almaca yallitaj llaquillami. Chaimi quiquinta yuyarini. Jordán yacu c'uchupi caj llajtamantami, Hermón urcumantami, Mizar urcumantami quiquintaca yuyarini.

⁷Quiquin churashca pajchacuj yacucuna ucujman pajchashpaca, caishuj ucujman pajchacuj yacucunatami huajiashpa cayacun. Quiquin churashca tucui yacucunaca jatarishpami, ñuca jahuata pasan.

⁸Shina cajpipish punllaca, Mandaj Diosca paipaj c'uyaitami cacharca. Tutaca, paitami cantasha. Ñucaman causaita cuj Taita Diostaca mañacushallami.

⁹Taita Diostaca cashnami nisha: “Ñuca jatun rumilla ¿ima nishpataj ñucata cungarircanguiyari? ¿Ima nishpataj llaquilla cashcata ricuchij churanata churashca purina caniyari? ¿Ima nishpataj ñucata p'iñaj llaquichishca cana carcaniyari?” nishami.

¹⁰Ñucata p'iñajcunaca punllantami: “¿Maitagari cambaj Taita Diosca?” nincuna. Chashna nishpaca ñuca tullucunata p'aquij shinami ñucataca llaquichincuna.

¹¹Ñuca almalla ¿ima nishpataj shaicuringuiyari? ¿Ima nishpataj ñuca ucupica yallitaj muspachinguiyari? Taita Diosta shuyailla. Paitaca alabasharajmi. Paica ñucata quishpichijmi. Ñuca Diosmi.