Read Chimborazo Highland Quichua SALMOS 45 Bible Online

SALMOS 45 - Chimborazo Highland Quichua bible

SALMOS 45

¹Lirio sisacuna nishca cantota, tonota alli yachaj cantachichun sumaj shimicunata quillcanata yachaj Corepaj huahuacuna rurashca Salmomi. Cazarai punllapi cantanami. Ñuca shunguca alli shimicunahuan jundami. Jatun mandajmanmi ñuca cantota cantani. Ñuca c'alluca alli quillcaj runapaj pluma shinami.

²Tucui c'aricunata yalli sumajmi cangui. Quiquinpaj shimimantaca sumaj shimicunami talliricun. Chaimantami Taita Diosca quiquintaca huiñaipaj alli nishca.

³C'ari c'ari runa, cambaj espadata changa uripi apariyari. Quiquinpaj sumaj cashcahuan, mandaj cashcahuan chumbilliriyari.

⁴Quiquinpaj sumaj canaca mirarishcamari. Mana llulla shimipi, mana jatun tucushca canapi, cashcata ruranapi caballopi tiyarij shina tiyariyari. Quiquinpaj alli lado maquimi mancharinacunata rurashpa poderyuj cashcata ricuchinga.

⁵Quiquinpaj caspicunaca puntajllami. Chaihuanmi llajtacunataca urmachishpa quiquinpaj ucupi churangui. Jatun mandajta p'iñajcunapaj corazonpipish pasajtami yaicunga.

⁶Taita Dios, quiquin mandashpa tiyanaca mana tucurij huiñaipajmi. Quiquin mandana varaca cashcata rurashpa mandana varami.

⁷Quiquinca cashcata ruranatami c'uyangui. Millaita ruranataca p'iñanguimi. Chaimi Taita Diosca quiquintaca agllarca. Quiquinpaj Taita Diosca cushichina aceitehuan churashpami agllarca. Quiquinhuan alli apanacujcunamanta yallipimi churarca.

⁸Tucui quiquinpaj churanacunami mirrahuan, aloehuan, casiahuan mishquijllata ashnacuj. Marfilhuan rurashca mandana huasimantami quiquintaca alabancuna.

⁹Quiquin mandacunpica jatun mandajcunapaj ushushicunami. Quiquinpaj alli ladomanca jatun mandaj huarmimi tiyacun. Paica Ofirmanta curita churarishcami tiyacun.

¹⁰Ñuca ushushi uyaiyari. Riqui, alli uyaiyari. Cambaj llajta gentecunata, cambaj yayapaj familiacunatapish cungarilla.

¹¹Can sumaj huarmitaca jatun mandajmari munanga. Paica cambaj mandaj cashcamanta paitami cazuna cangui.

¹²Tiropi causajcunami convidanacunahuan shamungacuna. Achcata charij gentecunaca paicunahuan can alli cachunmi mañangacuna.

¹³Jatun mandajpaj ushushica, sumajyachishcamari. Pai causana huasipimari. Paipaj churanaca curi puchcahuan sumaj ricunacunayujta ahuashcami.

¹⁴Bordashca churanacunata churachishpami jatun mandajpajman pushashca canga. C'arihuan manaraj chayarishca huarmicunami paita catishca ringacuna. Paihuan purij huarmicunatapish paihuanmi pushamungacuna.

¹⁵Jatun cushicuihuanmi pushamungacuna. Jatun mandaj mandashpa tiyana huasimanca cushicuihuanmi yaicungacuna.

¹⁶Cambaj yayacunapaj randica cambaj churicunami mandanga. Paicunataca tucui llajtacunata mandaj cachun churangui.

¹⁷Quiquinpaj shutitaca huahua huahuacuna yuyarina cachunmi churasha. Chaimi gentecunaca quiquintaca huiñai huiñaita alabangacuna.