Read Chimborazo Highland Quichua SALMOS 52 Bible Online

SALMOS 52 - Chimborazo Highland Quichua bible

SALMOS 52

¹Tonota alli yachaj cantachichun sumaj shimicunata David quillcashca Salmomi. Edom llajtamanta caj Doeg runa Saulpajman shamushpa, Davidca Ahimelecpaj huasimanmi shamurca nishpa huillashcami. Imatapish rurai tucuj ¿ima nishpataj millaita rurashcahuan jatun tucunguiyari? Taita Diospaj c'uyaica manataj tucuringachu.

²Cambaj c'alluca llaquipi churanllami. Umangapajca afilashca navaja shinami.

³Allita ruranata c'uyanapaj randica, millaita ruranatarajmari c'uyangui. Mana llullaj canapaj randica, llullaj canatarajmari munangui. Selah

⁴Tucui laya millai shimicunata rimanatami c'uyangui. Cambaj c'alluca umajllami.

⁵Chashna cashcamantaca Taita Diosca huiñaipajmi cantaca chingachinga. Cantaca ñutungami. Cambaj huasi ucupuracunamantapish llujshichishpami cachanga. Cai pachapi causajcunapaj chaupimantaca sapimanta aisashpa shitaj shinami chingachinga. Selah

⁶Cashcata rurajcuna chaita ricushpaca mancharingacunami. Paimantaca cashna nishpami asingacuna:

⁷“Chaica Taita Dios paipaj muyundij pirca shina cashcata mana yuyaj runamari. Ashtahuanpish pai achcata charishcacunallapimari shunguta churarca. Paica millaillapimari causarca” ningacunami.

⁸Ashtahuanpish ñucaca Taita Diospaj huasipica, verdijlla olivo shinamari cani. Taita Dios c'uyaj cashcapimi huiñaimanta huiñaicama shunguta churasha.

⁹Quiquin chashna rurashcamantaca, huiñaitamari alabacushalla. Quiquinpaj shutillapimi shunguta churasha. Quiquin agllashcacunapaj ñaupajpi alli cashcamantaca quiquinpaj shutillatamari shuyasha.