Read Chimborazo Highland Quichua SALMOS 56 Bible Online

SALMOS 56 - Chimborazo Highland Quichua bible

SALMOS 56

¹Caru urcupi llaquijlla puricuj palomita cantana tonopi, tonota alli yachaj cantachichun quillcashcami. Gat pueblopi filisteocuna Davidta prezu japijpi sumaj shimicunata David quillcashcami. Taita Dios ñucata llaquihuayari. Gentecunaca ñucata millpugrinmari. Punllantamari catirashpa llaquichin.

²Ñucata p'iñajcunaca punllantamari ñucata saruncuna. Jatun tucushpa ñucahuan macanacujcunaca achcacunamari.

³Manchaihuan cai punllapica quiquinpimi shunguta churani.

⁴Taita Dios quiquinpaj shimitaca alli ninimi. Mana manchashachu. Taita Diospimi shunguta churani. Runaca ¿imatataj rurai tucungari?

⁵Paicunaca punllantami ñucataca mana alli nishpa llaquichincuna. Paicunapaj yuyaicunaca ñucata llaquichina yuyaillami.

⁶Tandanacushpa miticushpami, ñuca maita rijtaca chaparancuna. Ñucata huañuchingapajmi chapancuna.

⁷Taita Dios paicuna millaita rurashca shinallataj llaquichiyari. Paicunataca jatunta p'iñarishpa urmachiyari.

⁸Miticushpa ñuca purishcacunataca quiquinllataj yachanguimi. Ñuca huiquicunatapish quiquinllatajmi vidrio huallupi churashpa charicungui. Chaicunaca ¿manachu quiquinpaj libropi quillcashca?

⁹Taita Diosta ñuca mañai punllapica, ñucata p'iñajcunaca huashamanmi tigrangacuna. Taita Dios ñucata ayudana cashcataca yachanitajmi.

¹⁰Taita Dios quiquinpaj shimitaca alli ninimi. Mandaj Dios quiquinpaj shimitaca alli ninimi.

¹¹Mana manchashachu Taita Diospimi shunguta churani. Runaca ¿imatataj rurai tucungari?

¹²Taita Dios quiquinman cusha nishcacunataca cushatajmi. Animalcunata huañuchishpa cuj shinaca quiquintami alabasha.

¹³Huañuimantaca quiquinmari quishpichircangui. Urmagrijpipish charihuarcanguimi. Taita Diospaj ñaupajpi, luzpi causajcunahuan causachunmi chashna rurarcangui.