Read Chimborazo Highland Quichua SALMOS 59 Bible Online

SALMOS 59 - Chimborazo Highland Quichua bible

SALMOS 59

¹Ama llaquichihuaichu nishpa cantana tonopi, tonota alli yachaj cantachichun, sumaj shimicunata David quillcashcami. Caitaca paita huañuchingapaj Saúl cachajpi Davidpaj huasipi chapacujpi quishpirishca q'uipa quillcashcami. Ñuca Taita Dioslla, ñucata p'iñajcunamanta quishpichihuai. Ñucata llaquichinapaj p'iñashpa jatarijcunamanta quishpichihuai.

²Millaita rurajcunamanta quishpichihuai. Huañuchij runacunamanta quishpichihuai.

³Mandaj Dios, ima mana allita mana rurashca cajpipish, ima juchata mana rurashca cajpipish, ñucata huañuchingapajmari chaparacuncuna. C'ari c'aricunamari ñucata p'iñashpa tandanacushcacuna.

⁴Ima mana allita ñuca mana rurashca cajpipish llaquichingapajmi callpacuncuna, allichiricuncunamari. Ñucata tupanaman shamungapaj rijchariyari, ricuyari.

⁵Quiquinca Mandaj Diosmi cangui. Tucuita Mandaj Diosmi cangui. Israelcunapaj Taita Diosmi cangui. Tucui llajtacunata llaquichingapaj rijchariyari. Yallitaj millaita rurashpa c'ariyajcunataca ama llaquishpa tucuicunata llaquichiyari. Selah

⁶Chishita tigramungacunami. Allcucuna shinamari ladrangacuna. Pueblo muyundijtamari shayaringacuna.

⁷Paicunapaj shimicunapica espadacunami tiyan. Chaitaca paicunapaj shimillahuantaj huillashpami: “Pi mana uyangachu” nincuna.

⁸Mandaj Dios, quiquinmi paicunataca asingui. Quiquinmi tucui llajtacunataca chanzata rurangui.

⁹Ñucata p'iñaj llaquichisha nicujpipish quiquintami shuyasha. Taita Diosmari ñucata mitsajca.

¹⁰Ñucata llaquij Taita Diosmi ñucapaj ñaupajtaca ringa. Taita Diosca ñucata p'iñajcunataca llaquichingami. Chashna rurashpaca ñuca munashca shinami ñucaman ricuchinga.

¹¹Paicunataca ama huañuchichu. Ashtahuanpish quiquinpaj poderhuan urata janajta cachashpa cumurichi. Chaimi ñucahuan cajcunaca quiquinta yuyaringacuna. Mandaj Dios quiquinca ñucanchij escudomi cangui.

¹²Paicunapaj shimihuan rimashpa juchallishcamantaca paicunapaj jatun tucushcapi prezu cachun. Llaqui tucushca canman nij cashcamanta, llullanallata munashcamanta chashna tucuchun.

¹³¡Nina sindirij shina p'iñarishpa tucuchiyari, tucuchiyari. Ama ashtahuan causachun tucuchiyari! Jacobpica Taita Dios mandacushcata yachachun, tucui cai pacha llajtacunacama Taita Dios mandacushcata yachachun chashna rurayari. Selah

¹⁴Ñucata p'iñajcunaca chishita tigrashca cachun. Allcucuna shina ladrachuncuna. Pueblota muyuchuncuna.

¹⁵Micunata mashcashpa maitapish puricushcalla cachun. Sajsangapaj mana japishpaca, tucui tuta huacarishpa pacarichuncuna.

¹⁶Ashtahuanpish ñucaca, quiquin tucuita rurai tucuj cashcatami cantasha. Tutamantapi cantashami. Quiquin llaquij cashcata cantashami. Ñucamanta shayarijmi cangui. Ñuca miticunami cangui. Llaqui punllapi ñuca miticunami cangui.

¹⁷Ñuca muyundij pircalla quiquintamari cantasha. Ñuca miticuna Taita Diosmari cangui. Ñucata llaquij Taita Diosmari cangui.