Read Chimborazo Highland Quichua SALMOS 66 Bible Online

SALMOS 66 - Chimborazo Highland Quichua bible

SALMOS 66

¹Tonota alli yachaj cantachichun. Cantanapaj rurashca Salmomi. Taita Diostaca cushicuihuan caparichigari. Tucui cai pachapi causajcuna caparichigari.

²Paipaj sumaj shutita cantaichigari. Alabashcacunahuan jatunyachichigari.

³Taita Diostaca: “Quiquin rurashcacunaca jatun mancharinamari. Quiquin tucuita rurai tucuj cashcamanta, quiquinta p'iñajcunaca quiquinpaj ucupimari tucungacuna.

⁴Tucui cai pachapi causajcunamari quiquintaca adorangacuna. Quiquintaca cantangacunamari. Quiquinpaj shutitaca cantangacunamari” nichigari. Selah

⁵¡Shamuichigari. Taita Dios imalla rurashcata ricuichigari. Huañujlla runacunapajca jatun mancharinacunatamari rurashca!

⁶Mama cuchaca chaquishca allpamanmi tigrarca. Jatun yacu chaupitaca chaquillahuanmi ch'imbarcacuna. Chaimantami Taita Diospi cushicunchij.

⁷Paica tucuita rurai tucuj cashcahuanmi huiñaita mandacun. Paipaj ñahuicunaca torremanta chapaj shinami tucui llajtacunata chaparacun. C'ariyajcuna ama jatun tucuchunmi chashna chapacun. Selah

⁸¡Llajtacuna alli nichigari. Ñucanchij Taita Diosta alli nichigari. Cantocunata cantashpa uyachichigari!

⁹Paimari ñucanchij causaita huaquichijca. Ñucanchij chaquicuna lluchcarichunpish mana saquircachu.

¹⁰Taita Dios ñucanchij ima shina cajta ricurcanguimi. Cullquita chuyayachij shinami chuyayachircangui.

¹¹Linchipi urmachunmari saquircangui. Llashaj quipitamari apachircangui.

¹²Runacuna ñucanchij umapi montachunmi saquircangui. ¡Nina lunyacuntamari pasarcanchij. Yacutamari ch'imbachircangui. Chashna rurashpaca, tucui imapish yallitaj tiyanmanmi llujshichircangui!

¹³Quiquinpaj huasimanca cushpa tucui rupachinacunahuanmi yaicusha. Quiquinman cuna tucushcacunataca pajtachishami.

¹⁴Llaquihuan cashpa ñuca shimihuan cusha nishcataca cushami. Ñuca shimi llujshishcataca pajtachishami.

¹⁵Tucuita cushpa rupachina animalcunata, huirayashca animalcunata cushami. Mishquijllata ashnacuj quiquinpajman chayachunca carnerocunata cushami. Quiquinman cushpa rupachinacunataca torocunatapish, c'ari chivocunatapish cushami. Selah

¹⁶¡Taita Diosta manchajcuna tucuicuna shamuichij, uyaichij. Ñuca causaipi Taita Dios imallata rurashcatami parlasha!

¹⁷Ñuca shimihuanca paitami caparircani. Ñuca c'alluhuanca paitami jatunyachircani.

¹⁸Ñuca shungupi millaita huaquichij cajpica, Jatun Diosca mana uyanmanchu carca.

¹⁹Ashtahuanpish Taita Diosca uyarcami. Caparishpa ñuca rogashcataca uyarcami.

²⁰¡Ñuca mañashcata paimanta mana anchuchij, paipaj c'uyaita ñucamanta mana anchuchij Taita Diosca alli nishca cachun!