Read Chimborazo Highland Quichua SALMOS 68 Bible Online

SALMOS 68 - Chimborazo Highland Quichua bible

SALMOS 68

¹Tonota alli yachaj cantachichun, David rurashca Salmomi. Quiquinta p'iñajcuna caita chaita richun, quiquinta mana ricunachijcuna quiquinpaj ñaupajmanta callpachuncuna, Taita Dios jatariyari.

²Paicunaca huairapi cushni rij shinami chingaringacuna. Chashna chingachiyari. Ninapi huira yacuyaj shinami yacuyangacuna. Diosta mana rijsijcunaca Taita Diospaj ñaupajpica chashnami chingaringacuna.

³Ashtahuanpish cashcata rurajcunaca cushicungami. Taita Diospaj ñaupajpimi cushicungacuna. Cushicuihuan cashcamantami saltangacuna.

⁴Taita Diosta cantaichij. Paipaj shutipi salmocunata cantaichij. Caballopi tiyarishca jahua pachata puricujta jatunyachichij. Paipaj shutica Jahmi: Paipaj ñaupajpi cushicuichij.

⁵Paica yaya mama illajcunapaj yayami, viudacunapaj randi shayarijmi. Taita Diosca paipajlla huasipi causajmi.

⁶Taita Diosca sapalla cajcunatapish familiapi causachunmi churan. Prezu apashcacunatapish llujshichishpa alli causaipimi churan. Ashtahuanpish c'ariyajcunaca tullu allpacunapimi causan.

⁷Taita Dios, quiquin agllashcacunata ñaupashpa llujshijpica, shitashca pambata quiquin ñaupashpa purijpica, Selah

⁸allpaca chujchurcami. Jahua pachamantapish tamyami urmarca. Chai Sinaí urcuca Taita Diospaj ñaupajpica chujchurcami. Taita Diospaj, israelcunapaj Taita Diospaj ñaupajpimi chashna tucurca.

⁹Taita Dios, achcatami tamyachircangui. Chaquishca quiquinpaj allpatapish nuyuchircanguimi.

¹⁰Quiquinpaj caj canllami chaipica causarca. Taita Dios, quiquin c'uyaj cashcamantami huajchacunaman cushcangui.

¹¹Jatun Diosca huillanatamari curca. Yallitaj achca huarmicunamari alli huillaitaca huillarcacuna.

¹²Jatun mandajcunaca soldadocunandijmi callpashpa miticugrincuna, callpashpa miticugrincuna. Huasipi saquirij huarmicunaca quichumushcacunatami chaupinacuncuna.

¹³Allitajchari callana jahuacunapi chutajllata sirina tucurcanguichij. Cancunaca cullquihuan llihuishca palomapaj alascuna shinami canguichij. Cancunapaj plumacunaca curi shina quillujllami.

¹⁴Pailla Tucuita Rurai Tucuj, jatun mandajcunata urata janajta tsirapajpica, Salmón urcupica rasu urmashca shinami chai jatun mandajcunaca carca.

¹⁵Basán urcucunaca, yallitaj jatuncunamari. Chai urcupaj puntacunaca yallitaj shayacuj puntamari.

¹⁶Jatun urcucuna, ¿ima nishpataj Taita Dios pai causanapaj munashca urcutaca p'iña chaparacunguichigari? Mandaj Diosmari chai urcupica huiñaita causanga.

¹⁷Taita Diospaj carrocunaca huaranga, huarangacunamari. Jatun Diosca Sinaí urcumantami paipajlla huasimanca shamun.

¹⁸Taita Dios, jahuamanmi huichiyarcangui. Prezu cajcunataca quiquinhuanmi pusharcangui. Runacunamantami aichayuj tucurcangui. C'ariyajcunamantami aichayuj tucurcangui. Mandaj Dioslla paicunapurapi causangapajmi chashna rurarcangui.

¹⁹¡Jatun Diosca alli nishca cachun! ¡Ñucanchijta quishpichij Taita Diosca punllantamari tucui imatapish ñucanchijpaj allipaj cun! Selah

²⁰Dios, ñucanchij Dioslla, paimi quishpichinga. Huañuimanta quishpichinapish Mandaj Jatun Diospajmi.

²¹Taita Diosca paita p'iñajcunapaj umataca chugrichingami. Juchacunallapi purijpaj ajcha sapa umatapish chugrichingami.

²²Jatun Diosca: “Basanmantami cantaca tigrachisha. Mama cucha yacu ucujmantami cantaca tigrachisha.

²³Cambaj chaquicunaca pucajllami tucunga. Canta p'iñajcunapaj yahuarhuanmi chashna tucunga. Cambaj allcucunapaj c'allucunapish chashnallatajmi tucunga” nircami.

²⁴¡Taita Dioslla, quiquinpaj ñancunataca ricurcacunami. Diospajlla huasipimi Taita Diospaj, ñucata Mandajpaj ñancunataca ricurcacuna!

²⁵Cantajcunaca ñaupashpami rincuna. Tocajcunaca huashatami catincuna. Chaupipica solteracunami panderocunahuan rincuna.

²⁶¡Taita Diosta alli nichigari. Tandanacushcacunapi alli nichigari. Jatun Diostaca alli nichigari. Israelpaj huahua huahuacuna alli nichigari!

²⁷Q'uipa huiñai Benjaminmi chaipi carca. Paica paicunata mandajmi carca. Judata mandajcunaca paicunapaj tandanacuipimi carca. Zabulonta mandajcunapish paicunapaj tandanacuipimi carca. Neftalita mandajcunapish paicunapaj tandanacuipimi carca.

²⁸Quiquinpaj Taita Diosmari canmanca fuerzata curca. Taita Dios, ñucanchijpaj imata rurashcataca cutin ricuchiyari.

²⁹Quiquin Taita Diospaj huasi Jerusalenpi cashcamantami, jatun mandajcunaca convidanacunata quiquinman cungacuna.

³⁰Macanacunalla tucushpa tandanacushcacunataca sinchita rimayari. Achca torocunata, llajtapi caj achca bizicunatapish rimayari. Tucuicuna paicunapaj cullquindij quiquinpaj ucupi tucungacama rimayari. Macanacushpa cushicujcunataca caita chaita cachayari.

³¹Egipto mandajcunami shamungacuna. Etiopiacunaca Taita Diosmanmi paicunapaj maquicunata utca chutangacuna.

³²¡Cai pachapi mandajcuna, Taita Diosta cantaichij. Jatun Diosta cantaichij! Selah

³³Jahua pachamanta ashtahuan jahua pachapi, caballopi tiyarishca puricujta cantaichigari. Jahua pachaca ñaupamanta tiyajmi. Chaipi tiyajmi pai rimashcata uyachinga. Tucuita rurai tucuj rimashcatami uyachinga.

³⁴Taita Diosca tucuita rurai tucuj cashcata ricuichigari. Pai tucuita rurai tucuj cashcaca israelcunapaj jahuapimi. Pai tucuita rurai tucuj cashcaca jahua pachacamami.

³⁵Taita Dios quiquinpaj huasimantaca mancharina Diosmi ricuringui. Israelcunapaj Taita Diosca, pai agllashcamanca fuerzata cujmi. C'ari c'ari fuerzasapa canata cujmi. Taita Diosca alli nishca cachun.