Read Chimborazo Highland Quichua SALMOS 69 Bible Online

SALMOS 69 - Chimborazo Highland Quichua bible

SALMOS 69

¹Lirio sisacuna nishca cantota, tonota alli yachaj tocashpa cantachichun, David rurashca Salmomi. ¡Taita Dios quishpichihuai. Ñucataca yacu millpushpa huañuchigrinca!

²Ucujta caj guzupi huashicushcamari cani. Maipi mana shayari tucuipajpimari cani. Yacucuna ucujmanmari cani. Callpacuj yacumari sirijta aisacun.

³Cayanataca shaicunimari. Ñuca cungaca gangozuyanmari. Taita Diosta shuyacushpalla ñuca ñahuicunapish shaicushcamari.

⁴Ñucata p'iñajcunaca ñuca uma ajchatapish yallimari mirarishcacuna. Yangamantamari ñucataca p'iñancuna. Ñucata p'iñajcunaca imatapish rurai tucujcunamari tucushca. Yangamantamari ñucataca llaquichincuna. ¿Manapish shuhuashca cashpapish pagashachu?

⁵Taita Dioslla quiquinca ñuca yuyai illaj cashcataca rijsinguimi. Ñuca juchacunaca quiquinpaj ñaupajpica mana pacallachu.

⁶Jatun Dios, tucuita Mandaj Dios quiquinpi shunguta churajcunaca, ñuca juchamanta ama pingaichishca cachun. Israelcunapaj Taita Diosta mashcajcunaca ñuca juchamanta ama muspachishca cachun.

⁷Quiquinta c'uyashpami llaquicunata aparcani. Ñahuita maipi mana churai tucujtamari pingarini.

⁸Ñuca huauquicunapajca shujtaj llajta runami carcani. Ñuca mamapaj churicunapajca mana rijsishcami carcani.

⁹Quiquinpaj huasimantaca huañuricunica, tucuricunica. Quiquinta p'iñashpa c'amishcacunaca ñuca jahuapimi urmarca.

¹⁰Huacashpa, ayunashpa llaquilla almahuanmi mañarcani. Chaica ñucapajca chanzata rurashpa asinapajmi cashca.

¹¹Cañamazu churanacunatapish churarircanimi. Chaimi ñucaca ch'imbapurashpa parlacunalla tucurcani.

¹²Pueblo pungupi tandanacushcacunapish ñucata p'iñashpa rimarcacunami. Machashcacunapish paicunapaj cantocunahuanmi chanzata rurashpa asincuna.

¹³Ashtahuanpish ñucaca quiquintami mañarcani. Mandaj Dios ñucata quiquin llaquina punlla chayachun nishpa mañacunillami. Taita Dios quiquinca yallitaj llaquijmi cangui. Quiquinca quishpichinguitajmi. Ñucata uyahuayari.

¹⁴Lodomanta llujshichihuai. Lodopi millpurichunca ama saquichu. Ñucata p'iñajcunamanta quishpichihuai. Yacu ucujmanta quishpichihuai.

¹⁵Callpacuj yacucuna aparichun ama saquichu. Ucujta caj jutcu millpuchun ama saquichu. Jutcu paipaj shimita huichcashpa millpuchun ama saquichu.

¹⁶Mandaj Dios quiquinpaj c'uyaica jatunmari. Chaimanta ñuca mañashcata cutichihuai. Quiquinca yallitaj llaquijmari cangui. Chai shinallataj ñucata ricuhuai.

¹⁷Quiquinpajta rurajpaj ñaupajmantaca quiquinpaj ñahuita ama pacahuaichu. Ñucaca achca llaquilla cashcamanta utca uyahuai.

¹⁸¡Ñucapajman c'uchuyamui. Quishpichihuai! ¡Ñucata p'iñajcunamanta quishpichihuai!

¹⁹Quiquinca ñucata c'amishcata yachanguimi. Ñucata pingaichishcata yachanguimi. Ñucata llaquichishcata yachanguimi. Ñucata p'iñajcunaca tucuicunamari quiquinpaj ñaupajpi.

²⁰C'amishcamari ñuca shungutaca p'aquirca. Ñucaca yallitaj llaquihuanmari cani. Ñucata pi llaquingapishchari nishpa shuyarcanimi. Pi mana tiyarcachu. Cushichijcunata mashcashpapish pita mana japircanichu.

²¹Ashtahuanpish micunata caranapaj randica, hieltami curcacuna. Yacunaihuan ñuca cajpipish vinagretami ubyachircacuna.

²²Jatun micuita paicuna rurashcapish paicunallataj laziyarinapaj cashca cachun. Allipajmi ruracunchij nishcapish ñitcarinapajlla cashca cachun.

²³Paicunapaj ñahuicunata amsayachishca cachun. Imata ama ricuchun amsayachishca cachun. Paicunapaj huasha tullucunatapish punllanta chujchuchicuilla.

²⁴Quiquinpaj p'iñaritaca paicunapaj jahuapi talliyari. Nina sindirij shina quiquin p'iñarishcaca paicunata tucuchishca cachun.

²⁵Pai causacunca shitashca saquirishca cachun. Paipaj carpa huasicunapica pi ama causashca cachun.

²⁶Quiquin chugrichishca runata catirashpa llaquichishcamanta chashna tucuchun. Quiquin carachayachijpi nanaihuan cajta parlanacushpa ashtahuan nanaita mirachishcamanta chashna tucuchun.

²⁷¡Quiquinpaj cashcata ruracunta ama chasquichun, pai millaita rurashca shinallataj llaquichiyari!

²⁸¡Causajcunapaj libromantaca p'ichashca cachun. Cashcata rurajcunahuanca ama quillcashca cachun!

²⁹Ashtahuanpish llaquihuan, nanaihuan caj ñucataca quiquinpaj quishpichinahuan quishpichihuayari. Taita Dios, jahuajman churahuayari.

³⁰Ñucaca Taita Diospaj shutitami alabasha. Cantocunahuanmi alabasha. Alabashpami jatunyachisha.

³¹Chaicunaca huagrata cushpa rupachishcatapish yallimari, Mandaj Diostaca cushichinga. Mana cashpaca gachucunayuj, pallca sillucunayuj bizita cushcatapish yallimari cushichinga.

³²Mana jatun tucushcacuna chaita ricushpaca cushicungacunami. Taita Diosta mashcaichij, quiquin shungupi causaita charinguichijmi.

³³Mandaj Diosca huajchacunata uyanmi. Paipaj cajcuna prezu cajpipish, mana yanganchinchu.

³⁴¡Jahua pachapish, cai pachapish alabaichij. Mama cuchapish, chaipi tucui imalla tiyajcunapish alabaichij!

³⁵Taita Diosmari Siontaca quishpichinga. Judá pueblocunatapish cutinmari shayachinga. Chaipi causachunmi shayachinga. Chai pueblotaca paicunami japingacuna.

³⁶Quiquinpajta rurajcunapaj huahua huahuacunami chaitaca japingacuna. Quiquinpaj shutita c'uyajcunami chaipica causangacuna.