Read Chimborazo Highland Quichua SALMOS 71 Bible Online

SALMOS 71 - Chimborazo Highland Quichua bible

SALMOS 71

¹Mandaj Dios quiquinpimi ñucaca miticurcani. Ñucataca nunca ama pingaichihuangui.

²Cashcata ruraj Taita Dios, ñucata ayudahuai, quishpichihuai. Ñuca mañashcata uyashpa quishpichihuai.

³Quiquinca ñuca miticuna jatun rumi caiyari. Chaimi ñucaca quiquinpi miticunaman callpacushalla. Ñucata quishpichingapajca quiquinpaj mandashcacunatami curcangui. Quiquinca ñuca rumimi cangui. Ñuca muyundij pircami cangui.

⁴Taita Dioslla, Diosta mana rijsijcunapaj maquimanta llujshichihuai. Millaita rurajcunapaj maquicunamanta quishpichihuai. Llaquichijni shitajcunapaj maquimanta quishpichihuai.

⁵Quiquinca Mandaj Jatun Dios, ñuca shuyanami cangui. Huambramanta pacha ñucata huaquichijmi cangui.

⁶Mamapaj huijsapi cai pachamantami, quiquinpi chariracurcani. Ñuca mamapaj huijsamantapish quiquinmi llujshichircangui. Quiquinmi huiñaita ñuca alabana cangui.

⁷Achcacunapajmi jatun mancharina ñucaca carcani. Quiquinca ñucata pacaj, sinchi rumimi cangui.

⁸Ñuca shimica quiquinta alabanahuan junda cachun. Quiquinpaj sumaj cashcahuan tucui punlla junda cachun.

⁹Ñuca ña yuyaj cajpipish ama shitangui. Fuerza illaj tucujpipish ama ñucallata saquingui.

¹⁰Ñucata p'iñajcunaca ñucamantami parlanacucun. Ñucata huañuchishun nicujcunaca paicunapurami yuyarinacucuncuna.

¹¹Paicunaca: “Taita Diosca paitaca shitashcami. Catichigari, japichigari. Paita quishpichijca pi mana tiyanchu” nincunami.

¹²¡Taita Dios, ñucamanta ama caruyaichu. Taita Dioslla, ñucata ayudanaman utca shamuyari!

¹³Ñucata p'iñajcunaca pingaichishca cachun. Ñuca causaita chingachishun nicujcunaca chingarishca cachun. Ñucata llaquichingapaj mashcacujcunataca pingaihuan tapachishca cachun. Musparinahuan tapachishca cachun.

¹⁴Ashtahuanpish ñucaca quiquinllatami shuyasha. Ñucaca quiquinta ashtahuan ashtahuan alabacushallami.

¹⁵Ñuca shimica quiquin cashcata rurashcatami huillanga. Quiquin rurashcacuna mashna cashcatapish mana yachanichu. Shina cashpapish quishpichinapaj quiquin rurashcacunataca tucui punllami huillacushalla.

¹⁶Mandaj Jatun Dios mancharinacunata rurashcatami yuyarisha. Quiquin cashcata rurashcatami yuyarisha. Quiquin rurashcacunallatami yuyarisha.

¹⁷Taita Dios ñucataca huambramanta pachami yachachircangui. Mancharinacunata quiquin rurashcataca cunancama huillacunillami.

¹⁸Taita Dios, ñuca ña yuyaj cajpipish ama shitahuaichu. Yuraj uma cajpipish, ama saquihuaichu. Quiquin tucuita rurai tucuj cashcata, q'uipa huiñaicunaman huillangacama ama saquihuaichu. Quiquin jatun cashcataca, q'uipa huahua huahuacunaman huillangacama ama saquihuaichu.

¹⁹Taita Dios quiquin cashcata rurashcaca jahua pachacamami. ¡Quiquinca jatun allicunatami rurashcangui! Taita Dios ¿pitaj quiquin shinaca rurangari?

²⁰Quiquinca achca llaquicunatami curcangui. Achca nanaicunatami apachircangui. Quiquinllatajmi cutin jatarichingui. Cai pachapi ucujta caj jutcumantapish llujshichinguimi.

²¹Ñuca jatun canataca mirachinguiyari. Ñucataca cutin cushichinguiyari.

²²Ñuca Dioslla ñucapish chashnallatajmi quiquintaca alabasha. Salteriopi tocashpami alabasha. Quiquin pajtachij cashcataca arpapi tocashpami cantasha. Israelcunapaj jucha illaj Diostaca cantashami.

²³Quiquinta cantashpaca ñuca shimica cushicungami. Ñuca causaita quishpichishcamantaca ñuca almaca cushicungami.

²⁴Ñucata llaquichina yuyailla cajcunataca pingaichircanguimi, muspachircanguimi. Chashna cashcata rurashcamantaca ñuca c'alluca tucui punlla huillacungallami.