Read Chimborazo Highland Quichua SALMOS 72 Bible Online

SALMOS 72 - Chimborazo Highland Quichua bible

SALMOS 72

¹Salomonpaj rurashca Salmomi. Taita Dios, jatun mandajmanca cashcata rurashpa mandaj canata cuhuai. Jatun mandajpaj churimanpish cashcata rurashpa mandaj canata cuhuai.

²Quiquinpaj cajcunataca cashcata rurashpa mandaj canata cuhuai. Quiquinpaj cajcuna llaquilla cajcunatapish cashcata rurashpa mandaj canata cuhuai.

³Urcucunapish llajtacunamanca sumaj causaita cuchun. Lomacunapish cashcata ruranata cuchun.

⁴Llajtacunapi llaquilla cajcunataca cashcata rurashpa mandaj canata rurangui. Huajchacunapaj huahuacunatapish llaquimanta llujshichijta rurangui. Chaimi paica llaquichijcunataca llapinga.

⁵Intipish, lunapish tiyajpiraj quiquintaca manchachuncuna. Huahua huahuacuna quiquintaca manchachuncuna.

⁶Jatun mandajca, q'uihuata cuchushca pambata tamya urmaj shinami uriyamunga. Allpata garhua nuyuchij shinami canga.

⁷Paipaj punllacunapica cashcata ruranacunallami sisanga. Sumaj causaillami yallitaj tiyanga. Luna mana tiyangacamami chashnaca canga.

⁸¡Paica mama cucha shuj ladomantaca, caishuj ladocamami mandanga. Jatun yacumanta callarishpaca tucui cai pachatami mandanga!

⁹Paipaj ñaupajpica, shitashca pambapi causajcunami cunguringacuna. Paita p'iñajcunaca ñutu allpatami lambingacuna.

¹⁰Tarsis llajtata jatun mandajcunaca convidanacunatami apamunga. Mama cucha uripi cajcunapish convidanacunatami apamunga. Sabá llajtata jatun mandajcuna, Seba llajtata jatun mandajcunapish convidanacunatami paipajman apamunga.

¹¹Tucui jatun mandajcunami paipaj ñaupajpi cumuringacuna. Tucui llajtacunami paipajta rurangacuna.

¹²Huajchacuna caparijpica, paimi quishpichinga. Llaquilla caj pi ayudaj illajlla cajtapish paimi ayudanga.

¹³Huajchataca llaquingami. Imata mana charijtaca llaquingami. Huajchacunapaj causaitaca quishpichingami.

¹⁴Paicunapaj causaitaca umashca canamanta, llaquichijni shitashca canamanta quishpichingami. Paicunapaj yahuarca paipaj ñahuipica valijmi canga.

¹⁵Jatun mandajca causacuchunlla. Paimanca Sabá llajtamanta curita cuchun. Jatun mandajmantaca mana samarishpa mañacuchunlla. Paitaca tucui punlla alli nicuchunlla.

¹⁶Allpapica lutsai muyullatami tarpunga. Chaica tucui urcu puntacunacama tucuita grano p'ucushpami, Líbano urcu yuracuna shina huajiacunga. Pueblopi causajcunaca q'uihua sisaj shinami sisangacuna.

¹⁷Paipaj shutica huiñaipajmi canga. Inti tiyashcacama paipaj shutica ama chingarichun. Tucui llajtacunami paimanta alli nishca cangacuna. Paica alli nishcami canga.

¹⁸Mandaj Taita Diosca alli nishca cachun. Israelcunapaj Taita Diosca alli nishca cachun. Mancharinacunata rurajca paillamari.

¹⁹¡Paipaj sumaj shutica huiñaita alli nishca cachun! ¡Tucui cai pachapi paipaj sumaj cashcahuan junda cachun! ¡Chashna cachun, chashna cachun!

²⁰Isaipaj churi David mañashca shimicunaca caipimi tucurin.