Read Chimborazo Highland Quichua SALMOS 76 Bible Online

SALMOS 76 - Chimborazo Highland Quichua bible

SALMOS 76

¹Tocanacunapi tocashpa tonota alli yachaj cantachichun, Asaf rurashca cantana Salmomi. Taita Diosca Judapica rijsishcamari. Israelpica paipaj shutica jatunmari.

²Paipaj carpa huasica, Salempimari. Pai causana huasica Sionpimari.

³Chaipimi paita p'iñajcunapaj arcopi caj puntajlla caspicunataca p'aquirca. Escudotapish, espadatapish, macanacunacunatapishmi p'aquirca. Selah

⁴Quiquinca achij nicuj sumajmari cangui. Tucuita rurai tucujmari cangui. Sacha animalcunata japigrina urcucunatapish yalli jatunmari cangui.

⁵C'ari c'ari tucushca shungucunaca tucuita quichushcami saquirishca. Manataj rijcharingapajmi dormicuncuna. C'ari c'ari runacunapish paicunapaj maquitaca mana alzai tucurcacunachu.

⁶Jacobpaj Taita Dioslla, quiquin sinchita rimajpica carropish, caballopish mana cuyuri tucurcachu.

⁷Quiquinca manchana Diosmari cangui. Nina sindirij shina quiquin p'iñarijpica ¿pitaj quiquinpaj ñaupajpi shayari tucungari?

⁸Jahua pachamantami llaquichinataca huillarcangui. Cai pachaca manchaihuanmi casijlla saquiringa.

⁹Cai pachapi causaj alli shungucunata quishpichingapaj quiquin Dios paicunapaj cashcata ruranaman jatarijpimi chashna tucungacuna. Selah

¹⁰Runacuna p'iñarijpica quiquinca ashtahuan jatun nishcami tucungui. Quiquin p'iñarishpa llaquichijpi saquirishcacunatapish cumurichinguirajmi.

¹¹Cancunapaj Taita Diosman cuna tucushcataca pajtachichigari. Paipaj muyundijpi cajcunaca manchana Diosman cuna cashcataca tucuicuna cuichigari.

¹²Paica mandajcunapaj causaita quichujmi. Paica cai pachata jatun mandajcunapaj manchanami.