Read Chimborazo Highland Quichua SALMOS 79 Bible Online

SALMOS 79 - Chimborazo Highland Quichua bible

SALMOS 79

¹Asaf rurashca Salmomi. Taita Dioslla, cambajlla allpamanca shujtaj llajtacunami shamurcacuna. Cambajlla huasitami mapayachircacuna. Jerusalentaca chingachishpami rumi montonllata saquircacuna.

²Quiquinpajta rurajcunapaj cuerpocunataca jahuata purij angacuna micuchunmari cushcacuna. Quiquinpaj cajcunapaj aichataca animalcuna micuchunmari cushcacuna.

³Paicunapaj yahuartaca yacuta shinami jicharcacuna. Jerusalén muyundijpimi jicharcacuna. Paicunata pambajcunaca pi mana tiyarcachu.

⁴Ñucanchij c'uchullapi causajcuna yanganchishcamari canchij. Ñucanchij muyundijpi cajcuna chanzata rurashpa asishcamari canchij.

⁵Mandaj Dioslla, ¿maicamataj chashna cangari? ¿Huiñaitachu chashna p'iñalla cagringui? ¿Nina rupacuj shina quiquin p'iñarishcaca caticungallachu?

⁶Quiquin p'iñarishcataca quiquinta mana rijsij llajtacunapaj jahuapi cachariyari. Quiquinpaj shutipi mana mañaj mandanacuna jahuapi cachariyari.

⁷Paicunami Jacobtaca tucuchircacuna. Pai causanatapish chingachircacunami.

⁸Ñucanchij ñaupa yayacuna millaita rurashcamanta ñucanchij llaquichinataca ama yuyarihuaichu. Quiquin llaquij cashcahuan ñucanchijta tupanaman utca shamupayari. Ñucanchijca yallitaj llaquihuanmari canchij.

⁹Ñucanchijta quishpichij Taita Dioslla quiquinpaj shutica sumajmi. Ñucanchijta ayudahuayari. Quiquinpaj shutita c'uyashcamanta ñucanchijta quishpichihuayari. Quiquinpaj shutita c'uyashcamanta ñucanchij juchacunata perdonahuayari.

¹⁰Diosta mana rijsijcunaca: “¿Maitagari cancunapaj Taita Diosca?” ningacunami. Tucui chai llajtacuna ricuna cachun quiquinpajta rurajcunata huañuchishpa yahuarta jichashcamantaca, ñucanchij ricuipi paicunatapish huañuchiyari. Chaitaca tucui shujtajcunapish yachashca cachun chashna rurayari.

¹¹Prezu apashcacuna aij nishcacunaca quiquinpaj ñaupajman chayashca cachun. Huañuchingapajtaj charicushcamanta quiquinpaj tucui rurai tucuj rigrahuan quishpichihuayari.

¹²Mandaj Dioslla, ñucanchij c'uchulla llajtacunataca canchis cutinhuan llaquichihuayari. Mandaj Diosta paicuna ima shinalla yanganchishca shinallataj paicunatapish llaquichihuayari.

¹³Ñucanchijca quiquinpajcunami canchij. Quiquinpaj michina pambacunapi micuj ovejacunami canchij. Quiquintaca huiñaitami alabacushunlla. Ñucanchijca huahua huahuacunami quiquinta cantanacunataca cantacushunlla.