Read Chimborazo Highland Quichua SALMOS 81 Bible Online

SALMOS 81 - Chimborazo Highland Quichua bible

SALMOS 81

¹Tocanapi tocanata alli yachaj cantachichun, Asaf rurashca Salmomi. Ñucanchijmanta shayarij Taita Diostaca cushicuihuan cantaichigari. Jacobpaj Taita Diostaca caparishpa cantaichigari.

²Tononchishpa cantaichigari. Panderopi tocaichigari. Uyanajllata huacaj arpapi, salteriopi tocaichigari.

³Mushuj lunapi trompetapi tocaichigari. Luna jundai punllapipish tocaichigari. Ñucanchij jatun fiesta punllapipish tocaichigari.

⁴Cai mandashcaca israelcunapajmari. Jacobpaj Taita Dios mandashcamari.

⁵Josemanmari cai mandashcataca curca. Egiptomanta llujshimucujpimari curca. Mana entendishca rimaitamari uyarcani.

⁶“Ñucami paicunapaj rigramanta llashaj cargataca anchuchircani. Paicunapaj maquimantapish llashajta aisashpa puricujtami cacharichircani.

⁷Jatun llaquipi cashpami caparircangui. Chaita uyashpami quishpichircani. C'ulun nicuj chaupi pacallamantami cutichircani. Cancuna alli crij cashcata mana chashna cashcataca Meriba yacu c'uchupimi ricurcani. Selah

⁸Ñucapaj cajcuna uyaichigari. Ñuca cunashcata uyaichigari. Israelcunaca ñucata cazushpamari alli canguichijman.

⁹Cancunapaj chaupipica shujtaj dioscunaca amataj tiyachun. Shujtajcunapaj dioscunataca amataj cunguringuichijchu.

¹⁰Ñucami Mandaj Dios, cambaj Taita Dios cani. Ñucami Egiptomanta llujshichimurcani. Cambaj shimita pascailla mana nijtami carasha.

¹¹Ashtahuanpish ñucapajlla cajcunaca ñucataca mana uyarcacunachu. Israelcunaca ñucataca mana munarcacunachu.

¹²Chashna cajpimi rumi shungu cachun saquircani. Paicuna yuyashca shina purichunmi saquircani.

¹³¡Ñucapajlla cajcunaca ñucata uyashca cajpica, israelcunaca ñuca yachachishca shina causashca cajpica!

¹⁴Paicunata p'iñajcunataca ñahui quinllaillapimi chingachiman carcani. Paicunata mana ricunachijcunataca ñuca maquihuanmi llaquichiman carcani” nishcami uyarirca.

¹⁵Mandaj Diosta p'iñajcunaca israelcuna mandashcami causanman carca. Israelcunapaj causaica huiñaitami alli canman carca.

¹⁶Diosca ashtahuan alli trigotami caranman carca. Peña urcumanta sacha chuspipaj mishquitami mana nijta caranman carca.