Read Chimborazo Highland Quichua SALMOS 85 Bible Online

SALMOS 85 - Chimborazo Highland Quichua bible

SALMOS 85

¹Tonota alli yachaj cantachichun, Corepaj huahuacunapaj rurashca Salmomi. Mandaj Dioslla, quiquinpaj llajtahuanca yallitaj allimari cangui. Jacobpaj huahuacunataca, prezu apashcamanta tigrachimurcanguimari.

²Quiquinpaj agllashcacuna millaita rurashcataca perdonarcanguimari. Paicunapaj tucui juchacunataca tapachircanguimari. Selah

³Quiquin p'iñarishcataca tucuimari anchurircangui. Nina sindirij shina yallitaj p'iñarishca cashpapish anchuchircanguimari.

⁴Ñucanchijta quishpichij Taita Dioslla, mushujyachihuayari. Ñucanchijhuan quiquin p'iñarishcataca cungarihuayari.

⁵¿Ñucanchijhuanca manataj alli tucungapajchu p'iñarcangui imatagari? ¿Ñucanchij huahua huahuacunahuanpish p'iñallachu cagringui imatagari?

⁶¿Manachu quiquinpaj agllashcacuna quiquinpi cushicuchun, cutin causaita cungui?

⁷Mandaj Dioslla, quiquin llaquij cashcata ñucanchijman ricuchiyari. Ñucanchijta quishpichihuayari.

⁸Mandaj Taita Dios rimashcatamari uyasha. Pai agllashcacunamanca sumaj causaitamari huillanga. Paipaj jucha illajcunamanca sumaj causaitamari huillanga. Imapish mana ruranaman cutin ama tigrachunmi chashna huillanga.

⁹Paita manchajcunata quishpichinaca ña c'uchuyamushcatajmi. Ñucanchij llajtapi, pai sumaj cashcahuan causanamari c'uchuyamucun.

¹⁰Llaquij canahuan, mana llulla canahuanca tupanacurcamari. Cashcata ruranahuan, sumaj causaihuanca muchanacurcami.

¹¹Mana llulla canaca allpamantami huiñanga. Cashcata rurajca jahua pachamantami ricunga.

¹²Mandaj Diosmi allicunata cunga. Ñucanchij allpacunaca alli granotami p'ucunga.

¹³Cashcata ruranaca paita ñaupashpami ringa. Pai purishcaca ñanmi saquiringa.