Read Chimborazo Highland Quichua SALMOS 92 Bible Online

SALMOS 92 - Chimborazo Highland Quichua bible

SALMOS 92

¹Samana punllapi cantana Salmomi. Mandaj Dioslla, quiquinta alabanaca allimari. Jahua pacha Taita Dioslla, quiquinpaj shutita salmocunata cantanaca allimari.

²Quiquin llaquij cashcataca cada tutamantami huillani. Quiquin pajtachij cashcataca cada tutami huillani.

³Chunga cuerdayuj tocanapi, salteriopi, tocashpa cantanaca allimari. Arpapi sumajta tocashpa cantanapish allimari.

⁴Mandaj Dioslla, quiquin rurashcacunami ñucataca cushichin. Quiquinpaj maquihuan rurashcacunapimi ñucaca cushicuni.

⁵¡Mandaj Dioslla, quiquin rurashcacunaca tucuita yalli jatunmari! Quiquinpaj yuyaica yallitaj mana jahuallamari.

⁶Rumi shungu runaca, chaitaca mana yachanchu. Ch'ahuanyashca runapish chaitaca mana entendinchu.

⁷Diosta mana rijsijcunaca q'uihua shina yallitaj huiñashpapish huiñaipaj chingachishca canapajllami. Millaita tucui rurajcunaca mana jahualla sumajtami sisan. Ashtahuanpish huiñaipaj chingachishca canapajllamari.

⁸Ashtahuanpish quiquin Mandaj Diosmi huiñaipaj jahua pachapi caj cangui.

⁹Mandaj Dioslla, quiquinta p'iñajcunaca caipimari. Quiquinta p'iñajcunaca chingaringapajllamari. Millaita rurajcunataca tucuicunatami urajta janajta cachashca canga.

¹⁰Quiquinmi ñucamanca fuerzata mirachingui. Sacha huagra shina fuerzayujtami rurangui. Cunanlla rurashca aceitehuan churashpa ch'icanchishcami casha.

¹¹Ñucata p'iñajcunataca ñuca ñahuica ricungami. Ñucata p'iñashpa jatarijcuna aij nicujtapish ñuca rinrintajmi uyanga.

¹²Ashtahuanpish cashcata rurajca, palmera yura sisaj shinami sisanga. Líbano urcupi cedro yura huiñaj shinami huiñanga.

¹³Mandaj Diospaj huasipi tarpushcacunamari. Ñucanchij Taita Diospaj huasi canllapimi sisanga.

¹⁴Yuyaj cashpapish, miraricungarajmi. Fuerzasapa, verdijllacunami cangacuna.

¹⁵Paicunaca: “Ñucanchijman fuerzata cuj Mandaj Diosca imata mana pandajchu. Paipica cashcata mana ruranaca mana tiyanchu” nishpa huillangapajmi chashna canga.