Read Chimborazo Highland Quichua SALMOS 97 Bible Online

SALMOS 97 - Chimborazo Highland Quichua bible

SALMOS 97

¹¡Mandaj Diosmari mandacun! ¡Tucui cai pachapi causajcuna jatunta cushicuichigari! ¡Mama cucha c'uchullapi achca llajtacuna cushicuichigari!

²P'uyupish, amsapish paita muyunchishcamari. Cashcata rurashpa mandashcahuan, mandana shinataj mandashcahuanmi paipaj tiyanataca callari rumita sinchita churashca shina sinchita charicun.

³Lunyacuj ninamari paitaca ñaupashpa ringa. Chaimi paipaj muyundijpi caj p'iñajcunataca tucuchinga.

⁴Paipaj relampacunami cai pachataca achijyachirca. Cai pacha ricushpaca manchaihuan chujchurcami.

⁵Mandaj Diospaj ñaupajpica, urcucunapish huira shinami yacuyarca. Tucui cai pachata Mandaj Diospaj ñaupajpimari chashna tucurca.

⁶Jahua pachacunaca pai cashcata ruraj cashcatami ricuchincuna. Pai sumaj cashcataca tucui gentecunami ricuncuna.

⁷Imamanpish rijchajta labrashpa rurashca dioscunapajta rurajcuna pingarichigari. Rurashcalla dioscunahuan jatun tucujcuna pingarichigari. Taita Diospaj ñaupajpica tucui dioscuna cumurichigari.

⁸Mandaj Dioslla quiquin cashcata ruraj cashcata Judapaj ushushicuna uyashpaca cushicurcamari. Chaita Sión uyashpaca cushicurcamari.

⁹Quiquin Mandaj Diosca, tucui cai pachapaj jahuapi caj Taita Diosmari cangui. Tucui dioscunata yalli jatunmari cangui.

¹⁰Mandaj Diosta c'uyajcunaca, millaita ruranataca p'iñaichigari. Paipajlla caj jucha illajcunapaj almataca paimi huaquichin. Paita mana rijsijcunapaj maquimantapish paimi quishpichin.

¹¹Cashcata rurajcunapajca, achij luzmi tarpushca tiyacun. Shungupi ima millai yuyaita mana charijcunapajca cushicunami tarpushca tiyacun.

¹²Cashcata rurajcuna, Mandaj Dioshuan cushicuichigari. Paica jucha illajlla cashcata yuyarishpa alabaichigari.