Read Chimborazo Highland Quichua PROVERBIOS 10 Bible Online

PROVERBIOS 10 - Chimborazo Highland Quichua bible

PROVERBIOS 10

¹Yuyachij cai sumaj shimicunaca, Salomonllataj quillcashcami. Yachaisapa churica, yaya mamata cushichinmi. Ashtahuanpish rumi shungu churica, llaquichishpallami causan.

²Millaita rurashpa charijyashcacunaca, ima allita mana cunchu. Ashtahuanpish cashcata ruranaca huañuimantapish quishpichinmi.

³Mandaj Diosca cashcata rurajtaca, yaricaillahuanpish mana charinchu. Ashtahuanpish paita mana manchajcunataca, paicuna millaita rurashcallatajmi llaquipi urmachinga.

⁴Q'uillacunapaj maquica huajchayachinmi. Ashtahuanpish mana q'uillacunapaj maquica charijyanmi.

⁵Yuyaisapacunaca, usya punllacunapimi chagrataca tandancuna. Ashtahuanpish chagra tandai punllacunapish dormicujlla churica, paipaj yayatami pingaipi churan.

⁶Cashcata rurajpajca, ima allicunapish jahuanpi jahuanpimi shamun. Ashtahuanpish mana manchajcunataca, millaita rurashcallatajmi shimita tapanga.

⁷Cashcata rurajtaca allicuna cashcamantami, yuyarishcapi alli nincuna. Ashtahuanpish mana manchajcunataca, mana yuyarincunallapishchu.

⁸Yachaisapacunallami mandashcacunataca, shungupi chasquin. Ashtahuanpish millaita rimaj rumi shungu runaca urmangatajmi.

⁹Ima pandata mana ruraj runaca, imamanta mana manchanchu. Ashtahuanpish mana allita rurashpa purijcunaca, jatun llaquimi tucun.

¹⁰Millaita rurangapaj ñahuita quimllajca, llaquitami apamun. Millaita rimaj rumi shungu runaca, llaquichishca cangatajmi.

¹¹Cashcata ruraj runa yachachishca shimicunaca, causaita cuj yacu shinami. Ashtahuanpish mana manchajcunataca, paicuna rimashcallatajmi shimita tapanga.

¹²P'iña yuyaica, p'iñanacuipi churanllami. Ashtahuanpish c'uyaica, ima shina llaquichijpipish cungachinllami.

¹³Alli yuyaiyujpaj shimimantaca, alli yachanacunami llujshin. Ashtahuanpish ima alli yuyai illajca, varahuan huashapi azotishcami purin.

¹⁴Yachaisapacunaca alli yachashcataca, shungupimi huaquichincuna. Ashtahuanpish rumi shungu runapaj shimica, ñapish ima llaquipi churanllami.

¹⁵Charij runapajca, achcata charishcaca, jatun pircayuj pueblo shinami. Huajchacunaca imata mana charishcamantaca urmarinllami.

¹⁶Cashcata ruraj runaca, causaipajmi imatapish ruran. Ashtahuanpish mana manchaj runaca, juchapajllami imatapish charin.

¹⁷Yachachishcata cazunaca causaiman chayachij ñanmi. Ashtahuanpish jarcashcata mana cazujca pandarinmi.

¹⁸Shungupi p'iñacuj runaca, mishqui shimi tucushca llulla runami. Pita yanga juchachishpa uraman, janajman parlarijca rumi shungu runami.

¹⁹Imatapish yalli rimarijpica, juchapish tiyantajmi. Ashtahuanpish shimita jarcarijca, alli yuyaiyujmi.

²⁰Cashcata ruraj runapaj shimicunaca, ashtahuan alli cullquimari. Ashtahuanpish Diosta mana manchajcunapaj shunguca mana allichu.

²¹Cashcata ruraj runaca paipaj shimihuanca, achcacunatami michin. Ashtahuanpish rumi shungucunaca, yuyaita mana japishcamantami huañuncuna.

²²Mandaj Diostaj cushca allicunaca charijyachinmi. Chaica ima llaquipipish mana churanchu.

²³Ch'ahuanyashca runapajca millaita ruranaca, cushicuna pugllai shinami. Ashtahuanpish yuyaisapacunataca, alli yachaimi cushichin.

²⁴Diosta mana manchaj runaca imata manchashpapish, chaitajmi tucunga. Ashtahuanpish cashcata rurajcunamanca, paicuna munashcatatajmi cunga.

²⁵Millai runaca jatun acapana jatarishcahuan, chingarij shina utca chingarinllami. Ashtahuanpish cashcata ruraj runaca, unita causacunllami.

²⁶Q'uilla runata imata ruranaman cachanaca, vinagreta amullishca shinapish, ñahuita cushni japishca shinapishmi.

²⁷Mandaj Diosta tucui shunguhuan manchajpica, uni causaitami cunga. Ashtahuanpish paita mana manchajcunataca, utcami causaita quichunga.

²⁸Cashcata rurajcunallami shuyacushca cushicuitaca japincuna. Ashtahuanpish mana manchajcunaca, paicuna shuyacushcataca mana japincunachu.

²⁹Mandaj Diospaj ñanca ima pandata mana rurashpa causajtaca, torre shinami huaquichin. Ashtahuanpish millaita rurajcunataca chingachinllami.

³⁰Cashcata rurajtaca, pi mana cuyuchingachu. Ashtahuanpish mana manchajcunaca, cai llajtapica mana causacungallachu.

³¹Cashcata rurajpaj shimica, alli yachaitami mirachin. Ashtahuanpish millaita rimajtaca, c'allutami p'itinga.

³²Cashcata rurajca cushicunatami riman. Ashtahuanpish mana manchajcunaca, tucui laya millaitami rimancuna.