Read Chimborazo Highland Quichua PROVERBIOS 11 Bible Online

PROVERBIOS 11 - Chimborazo Highland Quichua bible

PROVERBIOS 11

¹Mana alli pezanapi pezashpa shuhuajtaca, Mandaj Diosca manataj ricunachinchu. Alli pezashpa c'atujmantaca cushicunmi.

²Jatun tucushcacunaca pingachishcami canga. Ashtahuanpish alli yachaica mana jatun tucushcacunahuanmi tiyan.

³Alli runacunataca ima pandata mana rurashpa causashcallatajmi alli ñanta pushanga. Ashtahuanpish juchata rurajcunataca, paicuna millai cashcallatajmi tucuchinga.

⁴Taita Dios p'iñarishpa llaquichi punllapica, imata charishcapish mana quishpichingachu. Ashtahuanpish cashcata rurashcaca, huañuimanta quishpichingami.

⁵Ima pandata mana rurajtaca, cashcata pai rurashcallatajmi causaipica alli pushan. Ashtahuanpish Diosta mana manchaj runaca, paillataj mana manchashcamantami urmanga.

⁶Alli runacunataca cashcata rurashcallatajmi llaquimanta huaquichinga. Ashtahuanpish juchata rurajcunaca, juchapi japi tucungatajmi.

⁷Millai runa huañujpica, pai shuyacushcapish tucurinmi. Millai runacuna yuyacushcapish chingarinmi.

⁸Cashcata rurajtaca ima llaquimantapish, Taita Diosmi huaquichin. Ashtahuanpish paita mana manchajmi, paipaj randi chai llaquipi japi tucun.

⁹Mishqui shimi jayaj shungu runaca, shujtajcunata llaquipi churangapajmi imatapish ninlla. Ashtahuanpish cashcata rurajcunaca, alli yuyaiyuj cashpami quishpirinllacuna.

¹⁰Cashcata rurajcuna charij tucujpica, pueblopi causajcunaca tucuicunami cushicuncuna. Diosta mana manchajcuna huañujpicarin, jatun micuita rurashpami cushicuncuna.

¹¹Allita rurajcunamanta bendiciajpimi, pueblopish ashtahuan jatunyachishca canga. Ashtahuanpish mana manchajcunapaj shimica, llaquipimi churan.

¹²Yuyaita mana japijcunallami, pitapish mana alli nishpa rimancuna. Ashtahuanpish alli yuyaiyuj runaca, ima cajpipish shungupi chingachinllami.

¹³Parlarishpa purijca, mana parlana cashcatapish tucui parlanllami. Ashtahuanpish shunguta churaipaj runaca, ima cajpipish quiquin shungupimi chingachin.

¹⁴Alli yachaj pushaj mana tiyajpica, llajtaca urmanllami. Ashtahuanpish achca cunajcuna tiyajpica, ima llaquipish mana japinchu.

¹⁵Mana rijsishca runapaj garante tucujca, llaqui tucuntajmi. Ashtahuanpish diviyanata mana munajca, manchai illajmi causanga.

¹⁶Alli shungu huarmica, alli nishcami canga. Sinchi sinchita trabajajcunaca charijyangami.

¹⁷Pitapish llaquij runaca quiquin causaipajmari allita ruran. Ashtahuanpish p'iñashpa llaquichij runaca, paillatajmi llaquipi yaicun.

¹⁸Diosta mana manchaj runaca, umarishpami causan. Ashtahuanpish allita tarpucujca, mana tucurij allicunatami japinga.

¹⁹Cashcata ruraj canaca, alli causaimanmi pushacun. Millai cajcunatapish millaita ruranallatajmi, huañuiman chayachin.

²⁰Mandaj Diosca millai shungucunataca, manataj ricunachinchu. Ashtahuanpish ima pandata mana rurajcunatami, cushicuihuan ricucun.

²¹Millai runaca caya cashpa, mincha cashpa llaquichishca cangatajmi. Ashtahuanpish cashcata rurajcunaca, huahua huahuacunapish quishpichishca cangami.

²²Sumaj ñahui cashpapish, yuyai illaj huarmica, curi sarcillota c'uchi singapi apachishca shinallami.

²³Cashcata rurajcunaca allita rurana yuyaillami. Ashtahuanpish mana manchajcunaca, p'iñanacuillatami shuyancuna.

²⁴Imatapish mana mitsashpa cuj alli shungucunaca, ashtahuanmi charijyancuna. Maijancunaca aticujpipish quiquinpajlla charishpapish, huajcha tucunllacunami.

²⁵Shujtajcunapaj allita rurajcunaca charijyancunami. Shujtajcunaman carajcunaca, paicunapish chasquincunami.

²⁶Granocunata quiquinlla tucui japishpa huaquichijtaca, tucuicunami llaqui tucushpa alli canman nincuna. Ashtahuanpish mana huaquichishpa c'atujcunataca, alli nincunami.

²⁷Shujtajcunapaj allita rurajtaca, paitapish c'uyashpa alli nincunami. Ashtahuanpish pitapish llaquichina yuyailla purijtaca, paitarajmi ima llaquipish japinga.

²⁸Ima charishcacunallapi shunguta churajcunaca, yura p'anga chaquirishca shinami urmangacuna. Ashtahuanpish cashcata rurajcunaca, yura ramapi p'anga jundarij shinami jataringacuna.

²⁹Quiquin huasipaj imata mana yuyarijca, imata mana charinchu. Chashna rumi shungucunaca, yachaisapacunapajta rurajcunami tucuncuna.

³⁰Cashcata rurajcuna ima rurashcacunaca, causaita cuj yura shinami. Yachaisapa cashpamari, shujtajcunatapish alli ñanpi churancuna.

³¹Cashcata rurajcunapajpish, cai pachapi japina tiyanmi. ¡Diosta mana manchashpa juchata rurajcunapajcarin, jatun japinamari tiyan!