Read Chimborazo Highland Quichua PROVERBIOS 15 Bible Online

PROVERBIOS 15 - Chimborazo Highland Quichua bible

PROVERBIOS 15

¹Sumajta cutichishca shimica, p'iñarishcatapish anchuchinmi. Ashtahuanpish maipish cachun rimashca shimica ashtahuan p'iñachinllami.

²Yachaisapacunapaj shimica alli yachaicunatami sumajta riman. Ashtahuanpish rumi shungucunaca, manapish canatami rimancuna.

³Mandaj Diosca allicunatapish, millaicunatapish maipi imata ruracujta ricuracunmi.

⁴C'uyaihuan sumajta rimashca shimicunaca, causaita cuj yura shinami. Ashtahuanpish millai shimicunaca, shungutami chugrichin.

⁵Rumi shungu churica, yaya cunashcatapish p'iñashpa mana chasquinchu. Ashtahuanpish jarcashcata cazujca, alli yuyaiyujmi tucunga.

⁶Cashcata ruraj runapaj huasipica, achca charinacunami tiyan. Ashtahuanpish mana manchaj runa imata charishcaca paillatatajmi muspachin.

⁷Yachaisapacunaca, alli yachaitami muyuta shina tarpuncuna. Ashtahuanpish rumi shungucunaca, mana chashna yuyanchu.

⁸Mandaj Diosca, paita mana manchajcuna cushpa rupachishcataca manataj ricunachinchu. Ashtahuanpish alli runacuna mañashcataca, cushicushpami uyan.

⁹Mandaj Diosca, paita mana manchaj runa imata rurashcataca manataj ricunachinchu. Ashtahuanpish cashcata rurashpa causajtaca c'uyanmi.

¹⁰Alli ñanta saquijpajca, alli tucuchun rimashcaca, sinchita llaquichishca shinami. Alli tucuchun rimashcata mana munashpa p'iñajca huañungatajmi.

¹¹Seolpish, Abadonpish Mandaj Diospaj ñahuipimi. ¡Cai pachapi causajcunatacarin shungupi imata yuyashcatapish callarishpami ricucun!

¹²Mana cazushpa asijca, imata jarcajtaca p'iñanmi. Yachaisapacunahuanca mana tandanacunallapishchu.

¹³Cushijlla shunguyuj runaca, ñahuipish cushijllami purin. Ashtahuanpish shungutaj llaquilla cajpica, yuyaipish llaquillami tucun.

¹⁴Yuyaisapa runaca, ashtahuan alli yachanatami munan. Ashtahuanpish rumi shungucunaca, rumi shungu cashcahuanmi sajsajta micuj shina saquirincuna.

¹⁵Llaquilla caj runapaj causaica, punllanta sinchillatajmi. Ashtahuanpish cushicui shunguhuan causajpajca, punllanta jatun micuita rurashca shinami.

¹⁶Charishcacunahuan musparinapaj randica, ashallata charishpapish, Mandaj Diosta cazushpa causanamari alli.

¹⁷Yuyu calditollata micushpapish, c'uyanacushpa causanamari alli. Ashtahuanpish huirayashca huagra aicha cusashcallata micushpapish, p'iñanacushpalla causashpaca ima allitaj cangari.

¹⁸Imamantapish jahualla p'iñarijca, macanacuitarajmi callarichin. Ashtahuanpish mana utca p'iñarij runaca, p'iñanacuitapish allichinmi.

¹⁹Allita ruracujpaj ñanca, rumihuan llambujllata rurashca ñan shinami. Ashtahuanpish q'uilla runapajca, ñanpish casha jundashca shinami.

²⁰Yachaisapa churica, paipaj yayatami cushichin. Ashtahuanpish rumi shungu runaca, mamata p'iñanmi.

²¹Yuyaita mana japijpajca, rumi shungu canaca cushicunami. Ashtahuanpish yuyaisapa runaca, pandarishpapish allichirinmi.

²²Imapish alli cachunca taucapura yuyarinacushpami callarina. Pita mana tapushpalla alli ruranata yuyashpaca, llaqui tucunllami.

²³Alli yuyaicunata cuj runaca, allita rimashcamantami cushicun. Alli punllapitaj yuyaita cushcaca sumajmari.

²⁴Yuyaisapa runaca causaiman apaj ñantami huichiman catin. Chaimantami Seolman apaj uri ñanmanta anchurin.

²⁵Viuda huarmicuna imalla charishcacunataca, Mandaj Diosmari huaquichin. Ashtahuanpish jatun tucujcunapajtaca, Mandaj Diosllatajmi chingachicun.

²⁶Millai runa yuyarishcataca, Mandaj Diosca manataj ricunachinchu. Ashtahuanpish ima millai yuyaita mana charij runa rimashca shimicunaca chuyami.

²⁷Umashpa charijyanata mana munajcunallami, causaita japingacuna. Ashtahuanpish jahuanpi jahuanpi charijyana yuyaihuan millaita rurajcunaca, paipaj tucui huasitatajmi jatun pingaipi churan.

²⁸Cashcata ruraj runaca imata tapujpipish, shungupiraj alli yuyarishpami cutichin. Ashtahuanpish Diosta mana manchajcunaca, shimita cacharishpa millaita rimanllami.

²⁹Mandaj Diosca, paita mana manchajcunamantaca carupimi. Ashtahuanpish cashcata rurajcunataca, mañashcata cutichingapaj uyaracunmi.

³⁰Cushijlla ñahuihuan ricujpica, shungupish cushicunmi. Cushicunata huillashcacarin shaicushca cajpipish, mushuj yuyaita cunmi.

³¹Causanata yachachun cunashcata chasquijcunaca, yachaisapacunahuanmi causanga.

³²Cazuchun rimashcata yangata ruraj runaca, quiquin causaillatatajmi p'iñan. Ashtahuanpish yuyaita japishca runaca, alli tucuchun rimashcatapish cazunmi.

³³Mandaj Diosta manchanaca, alli yachajta ruraj yachanami. Alli nishca cangapajca, mana jatun tucushca canachu.