Read Chimborazo Highland Quichua PROVERBIOS 16 Bible Online

PROVERBIOS 16 - Chimborazo Highland Quichua bible

PROVERBIOS 16

¹Ima ruranata ñucanchij yuyarijpipish, Mandaj Diosmari imata ruranatatajca mandan.

²Tucuicunallatajmi imata rurashpapish, allitami rurani yuyancuna. Shina cajpipish Mandaj Diosmari yuyaicunataca pezashpa ricucun.

³Can imata ruranataca Mandaj Diospaj maquipi mingai. Paimi can yuyacushcataca, chashnataj rurachinga.

⁴Mandaj Diosca tucuitamari imapaj cashpapish, shuj yuyaihuan rurashca. Chaimantami Diosta mana manchaj runatapish, llaqui punllapaj charicun.

⁵Mandaj Diosca jatun tucushcacunataca, manataj ricunachinchu. Paicunataca manataj saquishpa llaquichingatajmi.

⁶Juchata ruracujtaca llaquishpa allita rurana yuyaihuanmi jarcan. Maijanpish Mandaj Diosta manchashpami, millai causaimantaca anchurin.

⁷Mandaj Diosta cushichishpa, sumajta causaj runataca paicunata p'iñajcunapish alli tucushpa mana llaquichincunachu.

⁸Ima shinapish mana allita rurashpa, yallitaj charijyanapaj randica, ashallata japishpapish, mana pita llaquichishpa japishcamari alli.

⁹Runacuna shungupi imata yuyarijpipish, Mandaj Diosmi pai munashca shina pushan.

¹⁰Jatun mandajca, Dios yuyachishcatami riman. P'iñanacuita allichinapipish mana pandata mandanchu.

¹¹Mandaj Diosca pezanacunatapish, balanzacunatapish cashcata pezajtami rurashca. Chaimantami muchilapi tiyaj pezanacunataca, cashcatataj rurashca cachun munan.

¹²Cashcata rurashpa mandajpica, mandanamantaca pi mana cuyuchingachu. Chaimantami jatun mandajcunaca Diosta mana manchashpa millaita ruranataca, manataj munancuna.

¹³Jatun mandajcunaca cashcata rurajpaj shimitaca cushicushpami uyan. Allita rimajtaca c'uyanmi.

¹⁴Jatun mandaj p'iñarishpaca, huañuchinatami huillan. Ashtahuanpish yachaisapa runaca, paita p'iñachinataca jarcarinmi.

¹⁵Jatun mandaj cushijlla ñahuihuan cajpica, huañuna manchaipish mana tiyanchu. Pai alli cashcaca, q'uipa tamya shamushca shinami.

¹⁶Alli yachaita japinaca cullquita japishcatapish yallimi. Alli yuyaita japinaca, curita japishcatapish yallimi.

¹⁷Alli runacunaca, millaimanta anchurincunami. Chashna jarcarijcunaca, quiquin causaitami huaquichincuna.

¹⁸Manaraj llaqui tucushpaca, jatun tucushcami causancuna. Manaraj urmashpaca, c'ari tucushcami causancuna.

¹⁹Jatun tucushcacunapura tucushpa, imatapish paicunahuan chaupinacunapaj randica, mana jatun tucushcacunahuan apanacuj alli shungu canamari alli.

²⁰Mandaj Diospi shunguta churashpa, paipaj shimitapish tucui yuyaihuan yachajca, allicunata japishpa cushicunmi.

²¹Yachaisapa runataca alli yuyaiyuj cashcatami rijsincuna. Paicuna rimashca mishqui shimicunaca, yuyaita pascaj uyanajlla shimicunami.

²²Yuyaita japijpajca alli yuyaita japishcaca, causaita cuj yacu shinami. Ashtahuanpish rumi shungucunapajca, rumi shungu canaca jatun yachaj canami.

²³Yachaisapa runapaj shungumantaca, shimimanpish alli yuyaita cuj shimicunami llujshin. Paicuna rimashca shimicunaca, pipajpish uyanajllami.

²⁴Sumaj shimicunaca, sacha chuspi huachashca mishqui shinami. Almatapish cushichinmi, aichatapish jambinmi.

²⁵Cai pachapi causajcunapaj ñanca quiquin yuyaipi alli ricurishpapish, huañuiman chayachigrij ñanllami.

²⁶Trabajaj runaca, paipajllatajmi trabajan. Huijsa mañajpimi, trabajanaman llujshirin.

²⁷Millai runaca mana allita ruranataca, allashpami mashcan. Paipaj shimimantapish millai shimicunami lunyacuj nina shina llujshin.

²⁸Millai runaca p'iñanacuipimi churan. Alli apanacujcunatapish huashalla parlarishpa ch'icanyachinllami.

²⁹Chai mana alli runaca, pitapish umanllami. Chashna umashpami, mana alli ñanpi churan.

³⁰Ñahuita huichcashpami, millaita ruranataca yuyarincuna. Shimita cuyuchishcahuan millaita ruranllacunami.

³¹Cashcata rurajcunaca, yuyajcamami causancuna. Chashna yuyajcama causanaca, sumaj coronata churarishca shinami.

³²Mana utca p'iñarij runaca, pitapish jahualla mishajta yalli allimari. Quiquinllataj jarcarishpa cazuchirij runaca shuj pueblota mishaj runatapish yalli allimari.

³³Migllapi suerteta rurajpipish, Mandaj Diosmi imata ruranataca ricuchin.