Read Chimborazo Highland Quichua PROVERBIOS 17 Bible Online

PROVERBIOS 17 - Chimborazo Highland Quichua bible

PROVERBIOS 17

¹Huasipi sumaj micunacuna achca tiyajpipish, p'iñanacushpalla causanapaj randica, yangallata micushpapish sumajta causanamari alli.

²Alli yuyaiyuj servijca, amopaj mana cazuj churitapish mandangallami. Amoca pai imalla charishcatapish, paipaj caishuj churicunaman shinallatajmi chaupinga.

³Curipish, cullquipish pailapi churashpa hornopi rupachijpimi, alli cashcaca ricurin. Ashtahuanpish runacunapaj shungutacarin Mandaj Diosmari ricucun.

⁴Millaita rurajca, llullacunatami alli uyan. Llulla runapica, millai yuyaicunata cujcunatami cushicushpa uyancuna.

⁵Huajcha runata asijca, paita ruraj Diostamari p'iñachin. Huajcha runapaj llaquimanta cushicujca, paipish llaqui tucungallatajmi.

⁶Yuyajcunapajca, nietocunaca sumaj corona shinami. Shinallataj huahuacunapish, yaya mamamantami cushicuncuna.

⁷Sumaj shimicunata rimanaca, mana rumi shungu runapajmi. Llulla shimicunata rimanacarin mana mandajpajchu.

⁸Imapajpish huashalla camarij runapajca, camarinaca achca valij sumaj rumita cushca shinami. Huashalla camarishpaca, imatapish jahuallami japin.

⁹Llaquichijpipish chaita cungarishpa c'uyajca, alli tucunatami mashcan. Ashtahuanpish parlarishpa purijca, paihuan apanacujtapish caruyachinmi.

¹⁰Yuyaisapa runataca jarcashpa rimashcaca, rumi shungu runata patsaj cutin azotishcatapish yallimi allichin.

¹¹Mana cazushpa pitapish p'iñachij runaca, macanacuillatami mashcan. Paita llaquichingapajca, millai runami chayanga.

¹²Rumi shungu runa ima millaita ruracujpi tupanapaj randica, huahuacunata quichushcamanta p'iñarishca huarmi osohuan tupashcarajchari mana ima canman.

¹³Maijanpish paita ayudajta llaquichijpica, paipaj huasimantapish llaquicunaca manataj anchuringachu.

¹⁴P'iñanacuita callarichijca, jatun yacuta cacharij shinami. P'iñanacui manaraj callarijpi anchuringui.

¹⁵Diosta mana manchajta cacharishpa, cashcata rurajtaraj llaquichijcunataca, Mandaj Diosca manataj ricunachinchu.

¹⁶Rumi shungu runaca alli yachaj cangapaj, achca cullquita cushpapish, yuyaita mana japishcamantaca, mana yachai tucunchu.

¹⁷Alli apanacuj runaca paihuan apanacujtaca, tucui causaipimi c'uyan. Ima llaqui japijpipish, quiquin huauqui shinami llaquin.

¹⁸Yuyaita mana japij runaca, quiquinhuan apanacuj cashcamanta garante tucunllami.

¹⁹P'iñanacuita munajca, juchata ruranatami munan. Punguta alli pascajpish, quiquinpajllatajmi llaquita mashcan.

²⁰Millai shungu runaca, manataj sumaj causaita japingachu. Shimi cacharishca llulla runapish, jatun llaquipimi urmanga.

²¹Ch'ahuanyashca churita charij yayaca, huacashpami causan. Rumi shungu churita charij yayapish, mana cushicui tucunchu.

²²Cushijlla shunguhuan causanaca, aichapajpish alli jambimi. Ashtahuanpish llaqui shungullahuan causajpica, tullucamami chaquichin.

²³Diosta mana manchaj runaca, camarita pacalla japishpami, manapish mitsana cashcataraj mitsan.

²⁴Yuyaisapa runa alli yachaj cashcataca, ñahuillapitaj ricunallami. Ashtahuanpish rumi shungu runaca, tucui cai pachata muyucuj shina imatapish yuyacunllami.

²⁵Rumi shungu churica yayapajca, llashaj quipi shinami. Huachaj mamatapish huacachishpallami causan.

²⁶Cashcata ruraj runata huañuipi churanaca mana allichu. Allita ruraj, alli runacunata chugrichinapish mana allichu.

²⁷Alli yachajcunaca, ashallatami rimancuna. Yuyaisapacunaca, imapajpish alli yuyaiyujmi.

²⁸Uyashpalla tiyacujpica, rumi shungu runatapish yachaisapa cashcata yuyanllacunami. Yuyaisapa runaca, mana shimi cacharishcachu.