Read Chimborazo Highland Quichua PROVERBIOS 18 Bible Online

PROVERBIOS 18 - Chimborazo Highland Quichua bible

PROVERBIOS 18

¹Pandarishpa causajcunaca quiquin yuyashcallatami rurashpa causan. Tucui imapipish satirishpami purin.

²Rumi shungu runaca, alli yuyaita cuchunca mana munanchu. Ashtahuanpish paipaj shungu yuyashcallatami uyachun munan.

³Diosta mana manchajca, shujtajcunatapish yangapi churanllami. Yangalla juchachijpish, pingaipi churanllami.

⁴Runacunapaj shimimanta llujshij shimicunaca, mama cucha yacu ucucuna shinami. Alli yachaica, yacu llujshishpa larcata puricuj shinami.

⁵Cashcata ruraj runamanta mana imata ricushpa, Diosta mana manchaj runataraj alli ninaca manataj allichu.

⁶Rumi shungu runaca, quiquin shimillahuantajmi p'iñanacuipi yaicun. Paipaj shimillamantatajmi azotishca causan.

⁷Rumi shungu runaca, quiquin shimillamantatajmi p'iñai tucun. Paillatajmi huascata cungapi churarin.

⁸Huashalla parlarishca shimicunaca, jillu micui shina shungucama catijmi.

⁹Q'uilla runaca imatapish tucuchij runahuanca, quiquin huauquindij shinallatajmi.

¹⁰Mandaj Diosca jatun torre shinami. Cashcata ruraj runaca paipajman callpashpaca, quishpichishca cangami.

¹¹Charij runaca achcata charishcataca, muyundijta jatun pircayuj pueblo shina, jatun torre shina huaquichij cashcatami yuyan.

¹²Jatun tucujtaca q'uipataca, llaquicunallami japin. Mana jatun tucujmari q'uipataca, alli nishca tucun.

¹³Manaraj uyashpa imatapish cutichijca, upa cashca ricurishpa pingai tucunllami.

¹⁴Causaihuan cushicujca ungüitapish mishanmi. Ashtahuanpish shungu p'aquirishca caj runaca, ña mana jatari tucunchu.

¹⁵Yuyaisapa runaca alli yachaitaca, ashtahuanmi yachashpa catin. Yachaisapacunaca yachanataca, ashtahuanmi uyanachin.

¹⁶Imallahuanpish rijpica, pungutaca pascanllami. Mandajcunapajmanpish jahualla yaicuchinllami.

¹⁷Alli llujshingapaj punta huillajca, mana llullashca shinami ricurin. Ashtahuanpish paihuan p'iñanacuj shamushpaca, llullacushcata ricuchinllami.

¹⁸Suerteta rurajpica, p'iñanacuica p'itirinmi. Jatuncunapurapi ima tiyashcatapish allichinmi.

¹⁹Huauqui llaquichishcamanta shungu chugririshca runaca, pueblo muyundij jatun pircatapish yalli sinchi shungumi tucun. P'iñanacushca huauquindijpaj shunguca, fierro aldabahuan huichcashca pungu shinami.

²⁰Maijanpish shimihuan imata tarpushca cashpaca, chaillatatajmi japishpa micunga. Shimimanta llujshij, imata p'ucushca cajpipish, chaillatatajmi huijsapi jundachinga.

²¹Quiquin c'allullatajmi causaipipish, mana cashpaca huañuipipish churan. Shimimanta ima llujshichun munashpapish, chaillatatajmi micunga.

²²Maijanpish casarashpa huarmiyuj tucujca, ima charinacunayuj tucushcatapish yallimi. Taita Dios c'uyashpa cushcatamari chasquin.

²³Huajcha runa ishqui maquita churashpa sumajta mingajpipish, charij runaca sinchi shimicunahuanmi cutichin.

²⁴Maijanpish paihuan apanacujcunamanca, apanacujtaj cashcata ricuchichun. Maijancunaca quiquin huauquindijtapish yallimi apanacuncuna.