Read Chimborazo Highland Quichua PROVERBIOS 19 Bible Online

PROVERBIOS 19 - Chimborazo Highland Quichua bible

PROVERBIOS 19

¹Millaita rimashpa shujtajcunata llaquichij upa runapaj randica, huajcha cashpapish ima juchachina illaj causanamari alli.

²Yachaita mana charij runaca urmanllami. Jatarishcahuan imatapish rurai callarijca, llaqui tucunllami.

³Quiquinllataj ch'ahuanyashca cashcamanta pandarishpaca, Mandaj Diostami juchachincuna.

⁴Charij cajpica, apanacujcunapish achcami tiyan. Ashtahuanpish huajcha runataca, paihuan apanacujpish cungarinllami.

⁵Pitapish yangamanta juchachishpa huillagrijtaca, llaquichishcatajmi canga. Llullacunataca manataj saquincunachu.

⁶Mana mitsashpa imatapish cuj runahuanca, tucuicunami apanacusha nincuna. Paipajmanca pipish c'uchuyanllami.

⁷Huajcha runataca quiquin huauquicunapish p'iñanllami. ¡Paihuan apanacujcunacarin cungaringallatajmari! Sumajta rogashpapish, mana japingachu.

⁸Maijanpish yuyaita japijca, quiquin causaita c'uyanmi. Alli yuyaita huaquichijca, allita japingami.

⁹Pitapish yanga juchachishpa huillaj runataca llaquichishcatajmi canga. Llullacunaca huañungatajmi.

¹⁰Rumi shungu runapajca, sumaj charinacunata charinaca mana alli ricurinchu. Shinallataj amota servij runalla mandajcunata mandaj tucushcapish, mana alli ricurinchu.

¹¹Alli yuyaiyuj runaca, p'iñarishpapish jarcarinmi. P'iñachijpipish shungupi chingachishpami, alli runa cashcata ricuchin.

¹²Jatun mandaj p'iñarishpaca, león huacarij shinami manchachin. Pai alli cajpica, shullashca q'uihua shinami.

¹³Rumi shungu churica, yayapaj shunguta nanachishpallami causan. Caparirishpa rimaricujlla huarmipish, zazan huasipi tamyashca shinami.

¹⁴Yaya mamaca huasitapish, ima charinacunatapishmi cun. Ashtahuanpish Mandaj Diosca, alli yuyaiyuj huarmitamari cun.

¹⁵Q'uillacunaca, huañuita dormicunllami. Chashna q'uillacunaca yaricaihuanmi causancuna.

¹⁶Mandashcata pajtachijca, quiquin causaitami huaquichin. Ashtahuanpish mana cazushpa causajca, huañungatajmi.

¹⁷Maijanpish huajcha runata llaquishpa imata cushpaca, Mandaj Diosman mañachishca shinami. Chai allita rurashcamantaca, cutichishcami canga.

¹⁸Cambaj huahuataca uchilla cajpirajmi, mana allitaca jarcashpa llaquichina cangui. Shina cashpapish, ama huañuchina yuyaihuan macanguichu.

¹⁹Yallitaj p'iñarishpa llaquichijca, llaqui tucunllami. Millaita rurajpi mana llaquichijpipish, ashtahuan millaita rurashpa catingallami.

²⁰Cunashcatapish uyangui, alli tucuchun rimashcatapish chasquingui. Chashnami ña yuyaj cashpaca, yachaisapa cangui.

²¹Runacunaca imatapish yuyanllami. Ashtahuanpish Mandaj Diospaj munaillami pajtan.

²²Maijanpish llaquij cajpica, cushicui tiyanmi. Chashna cajpipish llulla runapaj randica, huajcha runarajmari alli.

²³Mandaj Diosta manchanaca, alli causaita cujmari. Pipish paita manchashpaca, cushicushpami causanga. Ima llaquipish mana japingachu.

²⁴Q'uilla runaca micuita maquipi charicushpapish, shimipica mana churanchu.

²⁵Mana cazushpa asij runata macajta ricushpaca, yachai illaj runapish cazunata yachanmi. Yuyaisapa runacarin alli tucuchun rimajllapitaj, yachanapica ashtahuanmi yuyaita japin.

²⁶Yayapajta imata shuhuajpish, mamata huasimanta llujshichishpa cachajpish, pingai illaj rumi shungu churimi.

²⁷Ñuca huahualla, allita yachachij yuyaicunata jarcaj, panda yuyaicunataca ña ama ashtahuan uyaichu.

²⁸Llullashpa huillaj millai runaca, juezcunatami chanzata ruran. Chashna mana manchajcunaca, millai shimicunata amullishcami purincuna.

²⁹Mana cazushpa asijcunataca, jatun llaqui chaparacunmi. Rumi shungucunapajpish macana anguca, allichishcami shuyacun.