Read Chimborazo Highland Quichua PROVERBIOS 20 Bible Online

PROVERBIOS 20 - Chimborazo Highland Quichua bible

PROVERBIOS 20

¹Vinopish, sidrapish mana cazushpa asijta, caparirishpa rimarijta ruranllami. Panda yuyaita japishpa chashna machashpalla purijca, yachaisapa cashcataca mana ricuchinchu.

²Jatun mandaj p'iñarijpica, huacaricuj león shina manchananami. Pipish paita p'iñachishpaca, quiquinllatajmi huañuita mashcan.

³P'iñanacuipi yaicunata jarcarinaca, pitapish alli nishcatami ruran. Ashtahuanpish ch'ahuanyashcacunaca, p'iñanacuipi yaicunllami.

⁴Q'uilla runaca tamyacunmi nishpa mana yapunchu. Chai runaca chagrata tandana punlla llujshirishpapish, imata mana japinchu.

⁵Shungullapi charishca yuyaicunaca, ucujman tiyacuj yacu shinami. Shina cajpipish, yuyaisapa runallami chaitaca llujshichinga.

⁶Achcacunami allitami ruranchij nincuna. Shina cashpapish allita ruraipajtaj runataca ¿pitaj japingari?

⁷Cashcata rurashpa, ima pandata mana rurajca, huahuacunatapish cushi causaipimi saquin.

⁸Ima rurashcata ricungapaj jatun mandaj tiyarishpaca, millaita rurashcataca ñahui ricuillahuantaj llujshichinllami.

⁹¿Pitaj: “Ñucaca ñami juchataca saquircani, chuya shungumi cani” ni tucungari?

¹⁰Pizanapi shuhuachunpish, medinapi shuhuachunpish, Mandaj Diosca manataj ricunachinchu.

¹¹Huambraraj cashpapish chuya, alli shungu cashcataca pai rurashcapi ricunallami.

¹²Ricuj ñahuitapish, uyaj rinrintapish, Mandaj Diosmi churashca.

¹³Ama huajcha causangapajca, dormicunallataca ama yalli munangui. Dormicunallata saquishpaca, micunapajllapish pajtatami charingui.

¹⁴Randij runaca randinataca, mana allichu nishpami huahuayan. Shina cashpapish ña randishpaca, alli nishpami cushicun.

¹⁵Curipish, achij nicuj sumaj rumicunapish achcami tiyan. Alli yuyaiyujcunapaj shimicarin, achca valij charinamari.

¹⁶Mana rijsishca runapaj garante tucujtaca, cullquita cungacama churanatapish, imatapish quichushpa saquichingui.

¹⁷Umashpalla imata japishpaca, mishqui micuita micuj shinami cushicuncuna. Chashna cashpapish q'uipataca, rumi allpata shimi jundata amullishca shinami saquirin.

¹⁸Imata yuyarinacushcapish, cunashcahuanmi alli llujshin. Alli pushajcunahuanmi jatun macanacuitapish rurarin.

¹⁹Parlarijlla runaca shujtajcuna mana yachanatapish cacharinllami. Chashna c'allu cacharishca runahuanca, pajta tandanacunguiman.

²⁰Quiquin yaya mamata llaqui tucushca alli canman nij runaca, mancharina amsa tuta shinapimi jatun llaquipi huañunga.

²¹Jahualla japishca charinacunaca, q'uipataca ima cushicuita mana cunchu.

²²Canta llaquichijpica, tigra llaquichishami ama niringuichu. Ashtahuanpish Mandaj Diosllapi shunguta churangui. Paimi cantaca llaquimanta llujshichinga.

²³Mandaj Diosca pizashpa shuhuajcunataca, manataj ricunachinchu. Mana alli balanzacunata charinaca, mana allichu.

²⁴Mandaj Diosmi tucuicunapaj causaita paipaj maquipi charicun. Pipish quiquin causai ima shinalla canataca ¿ima shinataj yachangari?

²⁵Mandaj Diosman imata cusha ningapajca, alli yuyaringuiraj. Yuyarishcahuan quiquin shimihuan ari nishca q'uipa, mana pajtachinaca urmana linchi shinami.

²⁶Yachaisapa jatun mandajca, Diosta mana manchajcunataca trillana fierrocunapi granota ñutuchishpa, ujshata huairapi cachaj shinami chingachin.

²⁷Mandaj Dios cushca almaca, ñucanchij shunguta achijyachichun pai japichishca lámpara shinami. Chaimantami ñucanchij shungupi imalla yuyai tiyashcataca callarishpa ricucun.

²⁸Jatun mandajca, llaquishpataj tucuicunapaj allita ruraj, c'uyaj cashpallami, pai mandanataca piman mana quichuchishpa mandashpa causanlla.

²⁹Huambrarajcunaca, fuerzasapa cashpami cushicuncuna. Yuyajcunaca, yurajlla ajchahuanmi sumaj ricurincuna.

³⁰Sinchita macashpa chugrichishcaca, millai runapajca jambimi. Sinchita llaquichishcami shungutaca allichin.