Read Chimborazo Highland Quichua PROVERBIOS 22 Bible Online

PROVERBIOS 22 - Chimborazo Highland Quichua bible

PROVERBIOS 22

¹Alli nishca canaca jatun charij canatapish yallimari. Tucuicuna rijsishca alli runa canaca cullquita, curita charishcatapish yallimari.

²Charij runahuan huajcha runahuan ishquimi purin. Mandaj Diosllatajmi ishquitataj rurashca.

³Alli yuyaiyuj runaca, ima llaqui japina cajpica anchurinmi. Ashtahuanpish yachai illaj runaca, quiquin chaquihuan llaquipi yaicunllami.

⁴Mandaj Diosta manchashpa mana jatun tucujcunaca charijyancunami. Alli nishca canatapish, sumaj causaitapishmi japincuna.

⁵Millaita ruraj runapaj ñanpica cashacunapish, tsagnarinacunapishmi tiyan. Quiquin causaita cuidajca, chai ñanmanta anchurinmi.

⁶Cambaj huahuataca uchilla cajpiraj, alli yachachingui. Chashna yachachijpica, yuyajyashpapish manataj cungaringachu.

⁷Charij runaca, huajchacunapaj jatun mandajmi. Cullquita surcujcunapish cullquiyujpajta rurajmi tucun.

⁸Mana allita tarpujca, llaquicunatami tandanga. Manchanayajta jatun tucushpa causacushcataca, tucuchishca cangami.

⁹Llaquishpataj huajchaman carajmanca, allicunatami cunga.

¹⁰Mana cazushpa asij runataca, llujshichishpa cachailla. Pai rijpica p'iñanacushpa rimanacuipish tucuringami. Pingaipi churajpish illangami.

¹¹Shungupi ima millaita mana yuyashpa, sumajta rimaj runataca, jatun mandajpish c'uyashpa paihuan apanacungami.

¹²Mandaj Diosca alli yachana tiyachunmi ricuracun. Ashtahuanpish mana cazujcuna imata ruracujtaca pandachinllami.

¹³Q'uilla runaca, imata mana rurangaraicullami: “Ñanpi león chapacunca, ñucata japishpa huañuchingamari” nin.

¹⁴Huainayaj millai huarmi rimashca shimicunaca, urmana jatun jutcu shinami. Mandaj Dios p'iñashcacunami chai huarmihuan juchapi urmancuna.

¹⁵Huambracunapaj shungupica, rumi shungu canaca aichayashpa tiyanllami. Shina cajpipish anguhuan macajpica, chai yuyaicunata cungarinmi.

¹⁶Quiquinllataj charijyangapaj cashpapish, charijcunaman tigra cungapaj cashpapish, huajchacunata quichujca huajchallatajmi saquiringa.

¹⁷Yachaisapacuna yachachishca shimicunataca, tucui yuyaihuan uyangui. Ñuca cushca alli yachaitapish, tucui shunguta churashpa yachangui.

¹⁸Cai shimicunata shungupi aparishpaca, mishquichij shinami cushicungui. Shujtajcunaman yachachingapajpish, shimi jahuami charingui.

¹⁹Cai shimicunataca Mandaj Diospi shunguta churachunmi canmanpish cunantaj yachachini.

²⁰Cunashpapish, alli yachanata cushpapish ¿manachu quimsa cutin quillcarcani imatagari?

²¹Cai shimicunataca mana llulla cashcata yachachunpish, cai mana llullaj shimicunataca, canta cachajcunaman tigra huillagrichunpishmi quillcarcani.

²²Huajcha runataca huajcha cashcamanta, ama imatapish quichunguichu. Imahuan mana mitsaripaj cajta ricushpa, mandajcunapajman apashpa ama llaquichinguichu.

²³Paicunata quichujcunataca, Mandaj Diosmari paicunata mitsashpa causaita quichunga.

²⁴Jahualla p'iñarijhuanca, amataj apanacunguichu. Chashna p'iñarijllahuanca, ama tandalla puringuichu.

²⁵Ñataj paicunahuan tandanacushpa, paicuna shina purinata yachanguiman. Chaita yachashpaca canllatajmari huascata cungapi churaringui.

²⁶Ama shujtajcuna shina pipajpish garante tucushpa, canllataj huataringuichu.

²⁷¿Maitataj shujtajllamantaca cullquita mana cui tucushpa, can dormina camandij quichuchinguiyari?

²⁸Cambaj allpa muyundijpi, ñaupa cambaj yayacuna churashca rumicunataca ama caishujpaj allpaman tanganguichu.

²⁹¿Imata ruranatapish alli yachaj runa maipi cajta ricushcanguichu? Paica yanga runacunapajtaca mana ruranchu, ashtahuanpish jatun mandajpajmari imatapish ruran.