Read Chimborazo Highland Quichua PROVERBIOS 24 Bible Online

PROVERBIOS 24 - Chimborazo Highland Quichua bible

PROVERBIOS 24

¹Millaita rurajcuna imata charishcataca, ama munanguichu. Paicunahuan tandanacunallatapish amataj yuyanguichu.

²Paicunapaj shungupica, shuhuanallatami yuyancuna. Shimihuanpish millaillatami rimancuna.

³Alli yachaihuanmi huasita shayachirin. Alli yuyaihuan shayachishcataca, ima mana cuyuchipajchu.

⁴Alli yachashcahuanmi huasi ucucunapipish, shungu cushicuna sumaj charinacunata jundachirin.

⁵Yachaisapa runataca, ima mana atinchu. Alli yachachishca runapajca, imapish mana llashajchu.

⁶Jatun macanacuitapish alli yachashcahuanmi pushana. Achca alli yachajcuna yuyaita cushcami, macanacuitaca mishachin.

⁷Ch'ahuanyashca runapajca alli yachaicunaca, mana pajtai tucuipaj jahuamanmi tiyacun. Pueblo pungu tandanacuipica, shimillatapish mana pascanchu.

⁸Pitapish llaquichina yuyailla purijtaca: “Caica millai shungu runami” nincunami.

⁹Rumi shungu runaca juchallatami yuyan. Mana cazushpa asirijtapish, pi mana ricunachinchu.

¹⁰Imata ruranapipish mana c'ari c'ari cajpica, imapish ashtahuan ashtahuan sinchimi ricuringa.

¹¹Huañuchinaman apashcacunata cacharichingui. Huañunallapi cajcunatapish quishpichingui.

¹²Can mana yachashcanchijchu nicujpipish, tucuicunapaj shunguta ricujca ¿imamanta mana chaita rurashcataca manachu yachanga imashi? Paica tucuicunallamantajmi imata rurashca shinallatataj cunga.

¹³Ñuca huahualla, sacha chuspi huachashca mishquitaca japishpa micuilla, allimari. Cambaj shimipi churashpa mishquichiyari.

¹⁴Alli yachaita japinaca cambaj yuyaipajca, chai shinallataj mishquimari. Chaita yachashpaca can japina cashcatapish japinguimi. Imata shuyacushcatapish mana yanga shuyashpa saquiringuichu.

¹⁵Diosta mana manchaj runa, cashcata ruraj runataca ama llaquichinata yuyarichu. Paipaj huasipi ima tiyashcatapish ama shuhuagrichu.

¹⁶Cashcata ruraj runaca, canchis cutin urmachijpipish, cutin jataringallami. Ashtahuanpish Diosta mana manchajcuna jatun llaquipi huashicushpaca, ña mana jataringachu.

¹⁷Canta p'iñaj runa ima llaquipi urmajpica, ama asinguichu. Paita llaqui japijpica shungullapipish ama cushicunguichu.

¹⁸Mandaj Diosca chashnataca mana munanchu. Paita asishcamanta, p'iñarishpa llaquichicushcataca paimanta anchuchinman.

¹⁹Millaita rurajcunahuanca, ama tandanacunguichu. Diosta mana manchaj runacuna ima charishcatapish ama munanguichu.

²⁰Chai millaicunapajca q'uipataca, mana cushicui tiyangachu. Mana manchajcunapaj lamparataca huañuchingatajmi.

²¹Ñuca huahualla, Mandaj Diostapish, jatun mandajtapish cazungui. Imatapish yuyashpa purijcunahuanca, ama tandanacunguichu.

²²Paicunaca ñapish tucuringallami. Ishquindij paita tucuchinataca, pi mana yachanchu.

²³Cai sumaj yuyaicunapish jatun yachajcunallataj yachachishcami: Ima allichina cajpipish, ñahuita ricushpalla mitsanana mana allichu.

²⁴Millaita ruraj runataraj: “Canca cashcata rurajmi cangui” nij mandajtaca, tucuicunami ima llaquipish tucushca alli canman ningacuna. Shujtaj llajtacunapi causajcunapishmi p'iñangacuna.

²⁵Ashtahuanpish millaita rurajcunata jarcajcunaca cushicungami. Achca allicunatapishmi chasquinga.

²⁶Alli shimicunata cutichijpaj shimitaca, muchashcami canga.

²⁷Llujshirishpa imatapish mashcaringuiraj. Cambaj maquihuan chagrata ruranguiraj. Chashna rurashpami cambaj quiquin huasita shayachingui.

²⁸Mandajcunapaj ñaupajpi ama pitapish yanga llullashpa llaquipi churanguichu. Cambaj shimihuanca ama pita umanguichu.

²⁹Pi canta llaquichijpipish: “Paitapish chashnallatajmi rurasha, ñucata rurashcallatatajmi paimanpish cutichisha” ama ninguichu.

³⁰Shuj punllami yuyai illaj q'uilla runapaj allpa c'uchullata rircani. Yuyaita mana japishca runapaj uva chagratapishmi ricurcani.

³¹Chai chagrapica chinipish, cashacunapish jundashcami carca. Chai allpa muyundijta pircashca rumicunapish, t'unirishpa caiman chaiman urmashcami siricurca.

³²Chaita ricushpami ñuca shungupi aparircani. Chaihuanca cashna yuyaitami japircani:

³³Umata caiman chaiman singuchishpa, maquicunata cruzashpa, ashahuan dormisha, ashahuan samarisha nishpa dormicujllapimari,

³⁴Ima illaj saquirinaca, puricujlla runa shina chayamuj cashca. Chaimantamari huajcha saquirinaca, huañuchij runa shina chayamuj cashca yuyarcanimi.