Read Chimborazo Highland Quichua PROVERBIOS 25 Bible Online

PROVERBIOS 25 - Chimborazo Highland Quichua bible

PROVERBIOS 25

¹Judá llajtata jatun mandaj Ezequiaspaj quillcajcunami, Salomonllataj rimashca yuyachij shimicunata cutin cashna quillcarcacuna:

²Ima yachanata pacalla charinaca, Taita Diospajca sumajmi. Chaicunata callarishpa yachanaca, jatun mandajpajca allimi.

³Jahua pacha maicama cashcatapish, ucuman cai allpaca maicama cashcatapish, jatun mandajcuna imata yuyacushcatapish, pi mana yachai tucunchu.

⁴Cullquitaca yacuyachishpa tucui mapata anchuchingui. Imatapish ruranata yachaj runaca, chuya cullquihuanmi sumaj vasota ruranga.

⁵Diosta mana manchaj runataca, jatun mandajpajta ruranamanta anchuchingui. Paita anchuchijpimi, cashcata rurashpa alli mandanga.

⁶Jatun mandajpaj ñaupajpica, ama alabaringuichu. Jatuncunalla tiyanapipish ama tiyaringuichu.

⁷Mandajpaj ñaupajpi pingachishca canapaj randica, paicunaraj cayangacama shuyanamari alli.

⁸Ama imamantapish utca p'iñanacuipi yaicunguichu. Ñataj caishuj runa canta pingachijpi, imata mana rurai tucunguiman.

⁹Canta pi imata nijpipish, chaitaca paihuan allichingui. Canlla yachana cashcataca, ama piman yachaj chayachingui.

¹⁰Can parlacujta maijan uyashpaca, canllatatajmi pingachinga. Chashna mana alli ricurishcataca, imahuan mana allichi tucunguichu.

¹¹Yachanaihuan cajpitaj cunashca alli shimicunaca curi manzanata, cullqui platopi cushca shinamari.

¹²Uyashpa cazuj, yachaisapa runata imata jarcajca curi sarcillo shinapish, ashtahuan alli curimanta rurashca sumaj aparina shinapishmi.

¹³Imata huillanaman cachajpipish, alli pajtachij runaca paipaj amotaca, yuyaita samachinmi. Chirijlla rasu yacuta rupai punllapi cuj shinami cushichin.

¹⁴Imata cushami nishpa jatun tucushpapish mana pajtachij runaca, huairapish p'uyupish shamushpa manapish tamyaj shinami.

¹⁵Mandajca p'iñarishca cashpapish, allimantalla rimajpica alli tucunllami. Blandujlla shimicunaca sinchi shungutapish chaupinllami.

¹⁶Sacha chuspi huachashca mishquita japishpapish, ama yalli micunguichu. Ñataj amijta micushpaca, tucuita shungu tigranguiman.

¹⁷Cambaj c'uchullapi causajpajmanpish ama punllanta ringuichu, ñataj jayachishpa p'iñai callarinman.

¹⁸Pitapish yanga juchachishpa mandajcunaman huillagrij runaca, martillohuan huajtaj shina, cuchillohuan satij shina, puntajlla caspihuan shitaj shinami llaquichin.

¹⁹Ima llaqui tucushpaca, mana cazuj runapica mana shunguta churanallachu. Chaica quiru p'aquirishca shina, chaqui quihuirishca shinami.

²⁰Llaquilla tiyacuj cushicuchun cantaj runaca, tamya punllapi churanata quichuj shinapish, jabonpi vinagreta churaj shinapishmi llaquichin.

²¹Canta p'iñajcuna yaricaihuan cajpica caranguilla, yacunaihuan cajpipish yacuta ubyachinguilla.

²²Can chashna rurajpica, pingarishpa llaquiringami. Mandaj Diospish canman allicunata cungami.

²³Janaj huaira shamushpaca, tamyata carcunllami. P'iña ñahuita ricushpaca, llullashpa parlarijcunapish rinllami.

²⁴Jatun sumaj huasipi cashpapish, caparirishpa rimaricujlla huarmihuan causanapaj randica, huasi jahuapi quiquinlla causanarajmi alli canman.

²⁵Caru llajtamanta alli huillai chayamushpaca, yacunaihuan huañucujman chirijlla yacuta ubyachishca shinami.

²⁶Cashcata ruraj runaca, Diosta mana manchaj runapaj ñaupajpi urmashpaca, pugyu yacu mapayashca shina, purij yacu yanayashca shinami.

²⁷Sacha chuspi huachashca mishquita yalli micunaca mana allichu. Quiquinlla yallitaj alli nishca canata mashcanapish mana jatunta ruranchu.

²⁸Jahualla p'iñarinata yuyaipi mana jarcarij runaca, muyundij pirca urmashca pueblo shinami.