Read Chimborazo Highland Quichua PROVERBIOS 26 Bible Online

PROVERBIOS 26 - Chimborazo Highland Quichua bible

PROVERBIOS 26

¹Usya punllacunapi rasujpica, mana allichu. Chagrata tandana punllacunapi tamyashpapish mana allichu. Rumi shungu runata tucuicuna alli nishca canapi churanapish chashnallataj mana allichu.

²Ima mana allita, manapish rurajtaca, ima llaquipish tucushca alli canman nishcapish mana pajtanchu. Gorrioncuna tazinta chingachishpa puricuj shina, golondrinacuna huairata puricuj shinallami.

³Caballotaca azielhuanmi cazuchina. Burrotaca huascahuanmi aisana, rumi shungu runatapish anguhuanmi huanachina.

⁴Rumi shungu runa shinallataj cashca ama ricuringapajca, rumi shungu runa imata nijpipish, ama allimi nishpa cutichinguichu.

⁵Paipaj quiquin yuyaipi, ama yachaisapami cani yuyachunca, rumi shungu runataca pai upallanata rimangui.

⁶Rumi shungu runaman imata huillanata mingashpa cachajca, quiquinllataj chaquita p'aquirishpa llaquipi yaicuj shinami.

⁷Chaqui p'aqui runaca mana puri tucunchu. Shinallataj yuyachij sumaj shimicuna cashpapish, rumi shungu runa rimajpica, ima yuyaita mana cunchu.

⁸Rumi shungu runata alli nishca canapi churanaca, rumita huaracapi huatashpa shitasha nicushca shinami.

⁹Machashca runaca cashapi taunarishpapish, mana nanachinchu. Rumi shungu runacunapish yuyachij shimicunata rimacushpaca, ima cashcata mana yachanchu.

¹⁰Puricujlla ch'ahuan runacunata cullqui jahua ima ruranapi chasquij runaca, puntasapa caspihuan shitashpa pitapish chugrichij shinami.

¹¹Allcuca pai shungu tigrashcallatataj cutin tigrachishpa micunllami. Rumi shungu runapish paipaj rumi shungu yuyashcataca cutin cutin ruranllami.

¹²Paipaj quiquin yuyaipi ¿yachaisapamari cani nirij runataca imallatapish rurajta ricushcanguichu? Chaipaj randica, rumi shungu runarajmi imallatapish ruranman.

¹³Q'uilla runaca: “Leonmari ñanpi chapacun, canllapica leonmari shayacun” ninmi.

¹⁴Punguca bisagrapi muyucunllami. Q'uilla runapish camapica, caiman chaiman muyurishpa singucunllami.

¹⁵Q'uilla runaca micunata maquihuan japishpapish, shimipi churanataca shaicunmi.

¹⁶Q'uilla runaca paipaj shungupica alli cunaj, canchis runacunatapish yalli yachaisapa cashcatami yuyan.

¹⁷Ñanta ricushcahuan shujtajcunapaj p'iñanacuipi chagrurinaca, allcuta rinrinpi lutsashca shinami.

¹⁸Maijanca paihuan apanacujta imatapish nishpa umashpaca, pugllarcanillami ninmi. Chaica loco runa nina sindishca puntajlla caspicunahuan shitashpa huañuchishca shinallatajmi.

²⁰Yanta illajpica ninapish huañunllami. Huashalla parlarijcuna illajpica, p'iñanacuipish tucurinmi.

²¹Carbonca brazusta rurangapajmi, yantaca lunyashpa rupachinapajmi, caparirishpa rimarij runaca p'iñanacuita jatarichijmi.

²²Huashalla parlarishca shimicunaca, jillu micui shina cashpapish, ucu shungucama catijmi.

²³Mana alli shunguhuan sumajta rimashca shimicunaca yacuyachishca cullquihuan allpa manga jahuata churashca shinallami.

²⁴P'iñaj runaca, mishqui shimi tucushcami purin. Ashtahuanpish shungupica, llaquichinallatami yuyarin.

²⁵Sumajta rimajpica ama cringuillachu. Paipaj shungupica, canchis jatun millai yuyaicunahuan jundami.

²⁶Pai p'iñacushcata shimihuan pacacujpipish, millaita yuyacushcaca tandanacuipica ricuringallami.

²⁷Shujtaj runa urmachun jutcuta allajca, paillatajmi chaipi urmanga. Shujtajta llapichun jatun rumita singuchicujpipish paillatatajmi llapinga.

²⁸Llulla shimica chugrichishcallatatajmi llaquichin. Mishqui shimi tucushpa rimashcaca, paillatatajmi urmachin.