Read Chimborazo Highland Quichua PROVERBIOS 27 Bible Online

PROVERBIOS 27 - Chimborazo Highland Quichua bible

PROVERBIOS 27

¹Caya punllaca chashna rurasha nishpa ama jatun tucunguichu. Caya ima tucunataca manamari yachanguichu.

²Canllatajca ama allimari cani nirichu. Ashtahuanpish shujtajcuna alli nishca cangui. Quiquin shimihuan alli nirinapaj randica, canllamanta ricujcuna alabashca cangui.

³Rumipish llashajmi, t'iyu allpapish llashajllatajmi. Rumi shungu runa p'iñarishcacarin, chai ishquindijtapish yalli llashajmi.

⁴P'iñarishca yuyaipica, pita llaquina yuyaipish mana tiyanchu. Yallitaj p'iñarishca cajpicarin, jarcarina yuyaipish mana tiyanchu. ¿Imata charijpi p'iñajpaj ñaupajpicarin, pitaj shayari tucungari?

⁵Shungullapi c'uyanapaj randica, ima jarcanataca rimashpa jarcanatajmi alli.

⁶P'iñacushpapish muchaj tucuj runapi shunguta churanapaj randica, shunguta chugrichishpapish c'uyajtaj runahuanmi apanacuna.

⁷Maijanpish huijsa junda cajpica, sacha chuspi huachashca mishquitapish mana micunachinchu. Ashtahuanpish yaricaihuan caj runapaj shimipica, jayajpish mishquishpami yaicun.

⁸Quiquin llajtamanta caruta rijcunaca, tazinta shitashpa rij urpi shinami.

⁹Mishquijllata ashnaj sumaj jambicunahuan churarishcaca, shunguta cushichinmi. Alli apanacuj runa sumajta cunashcacarin, yuyaitamari cushichin.

¹⁰Canhuan apanacujtapish, cambaj yayahuan apanacujtapish ama cungaringuichu. Chashnaca llaqui japijpipish, mana cambaj huauquipajman rina tucunguichu. Cambaj llaquicunata huauquiman huillagrinapaj randica, c'uchullapi causaj canhuan alli apanacujpajman ringui.

¹¹Ñuca huahualla, yachaisapa cayari. Chashna cashpamari ñucataca cushichingui. Ñucata p'iñashpa rimajmanpish ima cutichinata charishamari.

¹²Alli yuyaiyuj runaca, ima llaqui japina cajpica anchurinmi. Ashtahuanpish yachai illajcunaca, quiquin chaquihuan llaquipi yaicunllami.

¹³Mana rijsishca runapaj, mana cashpaca huarmipaj garante tucujtaca, cullquita cungacama churanatapish, imatapish quichushpa saquichingui.

¹⁴Maijan runaca paihuan apanacujtaca, utcapimi caparirishpa allillachu cangui nin. Chashna rurashcaca llaqui tucushca alli cachun nishca shinallatajmi.

¹⁵Tamya punllacunapi zazan huasipi tiyanahuan, caparishpa rimaricujlla huarmihuan causanahuanca chai shinallataj llaquimi.

¹⁶Chashna huarmita jarcanaca, huairata jarcasha nishca shina, mana cashpaca aceiteta alli maquihuan lutsasha nishca shinami.

¹⁷Fierrotaca fierrollahuantajmi puntajllata rurarin. Runatapish paihuan apanacujmi cushijllata ruran.

¹⁸Higo yuracunata alli cuidashpa causajca, chai yurapi p'ucushcatami micunga. Amopajta alli ruraj runapish allicunata chasquingami.

¹⁹Ima shinami yacupi ñucanchij ñahui ricurin, chashnallataj shuj runapaj shungutaca, caishuj runapaj shungumi ricuchin.

²⁰Seolpish, Abadonpish manataj shaicunchu. Chashnallataj runapaj ñahuicunapish manataj shaicunchu.

²¹Curitapish, cullquitapish pailapi churashpa hornopi rupachishpami, alli cashcata ricun. Runa alli cashcataca, shujtajcuna alli nijpimi yacharin.

²²Rumi shungu runaca, cutana rumipi trigota cutaj shina cutin cutin tigrachishpa tacajpipish, rumi shungu canataca manataj cungaringachu.

²³Cambaj ovejacuna ima shinalla puricujta ricurangui. Cambaj canlla ovejacunataca yuyaipi michingui.

²⁴Sumaj charinacunapish, coronata churarishca canapish, huiñaipaj cashcataca ama yuyanguichu.

²⁵Michinacunapi grama huiñashpaca, q'uihua jundaringami. Chai punllacunapi urcumanta q'uihuata tandashpa huaquichingui.

²⁶Carnerocunahuanmi cambaj churanata charingui. Cambaj chitacunahuanmi allpata randingui.

²⁷Huarmi chitacunapish, cambaj micunapajca yalli yallitami lecheta cunga. Cambaj huasipi caj tucui huahuacunapaj, canta servij huarmicunapajpish, pajtamari tiyanga.