Read Chimborazo Highland Quichua PROVERBIOS 29 Bible Online

PROVERBIOS 29 - Chimborazo Highland Quichua bible

PROVERBIOS 29

¹Jarcacushca jahua mana cazuj runaca, ñapish chingaringallami. Paipajca ima jambi mana tiyangachu.

²Cashcata rurajcuna mandajpica, tucuicunami cushicuncuna. Ashtahuanpish Diosta mana manchaj runa mandajpica, llaquihuan aij nincunami.

³Alli yachaita c'uyaj churica, yayatamari cushichin. Ashtahuanpish huainayaj huarmicunahuan puricujlla runaca tucui charishcatami tucuchinga.

⁴Cashcata ruraj jatun mandajca, llajtataca sinchitami shayachin. Ashtahuanpish cullquita yalli mañajca, tucui llajtatami huajchayachin.

⁵Maijanpish shujtajta alli nij tucujca, ñaupajpi linchita churaj shina umanllami.

⁶Millai runaca juchallapitaj tsagnarishpa urmanllami. Ashtahuanpish cashcata ruraj runaca, cushicuihuan cantashpami causan.

⁷Cashcata ruraj runaca, huajchacunapaj llaquita ricunmi. Ashtahuanpish Diosta mana manchaj runaca, chai alli yachaitaca mana charinchu.

⁸Pitapish mana cazushpa asijcunaca, tucui pueblocunapimi ninata japichincuna. Ashtahuanpish alli yachajcunaca, p'iñanacuitapish anchuchinmi.

⁹Yachaisapa cashpapish rumi shungu runahuan p'iñanacuipi yaicushpaca, asijpipish p'iñarijpipish mana allichi tucungachu.

¹⁰Pitapish mana llaquishpa huañuchijcunaca, ima pandata mana ruraj runataca p'iñanmi. Ashtahuanpish alli runacunaca, paita cushichinatami mashcancuna.

¹¹Rumi shungu runa p'iñarishpaca, shungu yuyashcata ruranllami. Ashtahuanpish yachaisapa runaca, jarcashpa upallachinmi.

¹²Mandajllataj llulla huillashcata chasquijpica, tucui paita servijcunami Diosta mana manchangacuna.

¹³Huajcha runahuan, cullquita alquilachij runahuanca ishquimi purin. Mandaj Diosmi ishquindijman causaita cun.

¹⁴Huajchacunapajpish allita ruraj jatun mandajca, mandanapica huiñaitami tiyacungalla.

¹⁵Alli tucuchun anguhuan llaquichijpimi, huahuacunaca alli yachaj huiñancuna. Ashtahuanpish imata rurachunpish saquijllapica, mamallatatajmi pingachinga.

¹⁶Diosta mana manchajcuna llajtapi jundarijpica, ashtahuan llaquicunami tiyan. Ashtahuanpish cashcata rurajcunaca, paicuna llaqui tucujtaca ricungacunami.

¹⁷Cambaj churitaca, alli tucuchun llaquichingui. Chashna rurajpimi cantaca samachinga. Cambaj shungu cushicunatamari causanga.

¹⁸Dios ima nishcata pipish mana huillajpica, tucuicunamari cacharishcacuna tucun. Ashtahuanpish Dios mandashcata pajtachijca cushicunmi.

¹⁹Servij runataca mana rimashpalla, allichi tucuipajchu. Rimajllapica, entendishpapish mana cazunchu.

²⁰¿Manapish alli yuyarishpa rimarijlla runa imata rurajta ricushcanguichu? Chaipaj randica rumi shungu runarajchari imallatapish ruranman.

²¹Uchillamantapacha amo yallitaj c'uyashpa, imata mana mitsashca huiñaj runaca q'uipataca amo charishcataca quichunllami.

²²Yallitaj p'iñarijlla runaca, p'iñanacuita callarichinllami. Yalli pi'ñarij runaca, ima llaquitapish ruranllami.

²³Jatun tucujtaca, chaillataj pingaipi churanllami. Ashtahuanpish mana jatun tucushca runataca, pai alli cashcallatajmi huaquichin.

²⁴Shuhua runahuan shuj yuyailla tucujca, quiquin causaitami p'iñan. Chaimantami llaqui tucushca alli canman nijta uyashpapish, manataj huillan.

²⁵Runata manchanaca tsagnarishpa urmana linchimi. Ashtahuanpish Mandaj Diosca, paipi shunguta churajtaca huaquichingami.

²⁶Achcacunami mandajtaca quiquinpajlla allita rurachun mashcancuna. Shina cajpipish Mandaj Diosmari tucuicunallamantaj ima shina cashcata ricushpa cun.

²⁷Millai runaca cashcata rurajcunapajca, p'iñananami ricurin. Allita rurashpa causajpish, Diosta mana manchaj runapajca, p'iñananami ricurin.