Read Chimborazo Highland Quichua PROVERBIOS 30 Bible Online

PROVERBIOS 30 - Chimborazo Highland Quichua bible

PROVERBIOS 30

¹Jaqué runapaj churi Agurmi cai sumaj shimicunataca, Dios huillachun nijpi Itielman, Itielman Ucalman cashna nishpa huillarca:

²Ñucaca, tucuicunata yalli ch'ahuan runami cani. Mana shujtajcuna shina yuyaita japi tucunichu.

³Alli yachaitaca imata mana yacharcanichu. Jucha illaj Diosmantacarin, ima yachanata mana uyashcanichu.

⁴¿Pitaj jahua pachaman rishpa cutin tigramushcari? ¿Pitaj huairataca maquipi lutsashpa chari tucungari? ¿Pitaj mama cucha yacutapish paipaj jahua churanapi pillushpa chari tucungari? ¿Pitaj cai allpa maicama canatapish alli ricushpa churarcari? ¿Tucui chaita rurajtaca, pi cashcata yachanguichu? ¿Paipaj churitapish rijsinguichu?

⁵Mandaj Dios rimashca shimicunaca chuya shimicunami. Diosca paipi shunguta churajcunapajca, pacaj escudomi.

⁶Paipaj shimicunataca, imata ama mirachinguichu. Ñataj canta jarcashpa, can llulla cashcata ricuchinman.

⁷Taita Dioslla, ñucaca ishquillatami mañani. Chaitaca ñuca causacujpitaj cuhuayari. Ama mana cushpa saquihuaichu.

⁸Ñucataca yangapi yuyaita churanamantapish, llulla canamantapish huaquichihuayari. Shinallataj yalli huajchatapish, yalli charijtapish ama rurahuaichu. Micunapaj pajtallata carahuayari.

⁹Yalli charijyashpaca canta cungarishpa: “¿Mandaj Diosca pipishchari?” nipajmi cani. Yalli huajcha cashpapish shuhuashpa, can ñuca Diosta c'amichipajmi cani.

¹⁰Amota servij runataca, ama cashnami chashnami nishpa amoman huillangui. Ñataj canta ima llaqui japishca alli canman nijpi llaquita apanguiman.

¹¹Quiquin yayallatataj ima llaqui japishpa, alli canman nijcuna tiyanmi. Chaicunaca mamatapish ima allita mana nincunachu.

¹²Millaita ruranata mana saquishpapish, ima jucha illajmi canchij yuyajcunapish tiyanmi.

¹³Jatun tucushpa, shujtajcunataca p'iña ñahuihuan yurajman ricujcunapish tiyanmi.

¹⁴Ñaupaj quiruta shinaca espadata, jashlin quiruta shinaca cuchillota charijcunapish tiyanmi. Chaicunaca llajtapi causaj huajchacunata, mana mitsari tucujcunatami tucuchincuna.

¹⁵Sanguijuela nishca c'uruca, manataj sajsashpa, mañacujlla ishqui ushushitami charin. Chai shinallataj manataj shaicurijcunaca, quimsapishmi tiyan. Manataj chailla nij shujhuancarin chuscupishmi.

¹⁶Chaicunaca: Seolmi mana huachaj huarmimi, mashnata tamyajpipish chaquirijlla allpami. Ninacarin rupashpapish, manataj chailla ninchu.

¹⁷Yayata mana cazushpa yurajman ricuj churica, mama yachachishcatapish p'iñanmi. Chai ñahuicunataca, angacuna surcushca cachun. Paicunatapish cuervocuna micushca cachun.

¹⁸Ñucaca quimsatami mashnata yuyashpapish, manataj yachai tucuni. Mana yachashcallataj shujhuancarin chuscupishmi.

¹⁹Huairata águila purishcapish, c'aca quinricunapi culebracuna purishcapish, mama cuchapi jatun barcocuna huambushcapish, c'arita manaraj rijsij huarmipi c'ari chayarishcapish, ima mana ricurinchu.

²⁰Maijan huarmi huainayashpaca: “Ima millaita mana rurashcanichu” ninmi. Micushca q'uipa, shimita p'icharishca shina saquirinllami.

²¹Quimsamantami cai pachapi causajcunaca, mancharishpa chujchuncuna. Chashna mancharinacunaca chuscupishmari:

²²Servij runalla llajtata jatun mandaj tucujpi, rumi shungu runa achca micunata charijpi,

²³tucuicuna millashca huarmi casarajpi, catishpa causaj huarmi paipaj amapajta quichujpimi mancharincuna.

²⁴Cai pachapi tiyaj yachaisapacunatapish, yalli yachaisapa chuscu uchilla animalcunami tiyan:

²⁵Añangucunaca ima sinchita mana rurai tucushpapish, usya punllacunapimi micunataca sumajta tandancuna.

²⁶Cunucunaca mana sinchicuna cashpapish, jatun rumi quinricunapimi huasichishpa causancuna.

²⁷Langostacunapish jatun mandajta mana charishpapish, ch'ican ch'ican achcacunapura tandanacushpami shamuncuna.

²⁸Maquihuan llapinalla arañacunapish, jatun mandaj tiyana ucupimi tiyan.

²⁹Sumajta purijcunaca quimsami tiyan. Ashtahuan jatun ricuj shujhuancarin chuscupishmi:

³⁰Tucui animalcunata yalli c'ari c'arica leonmi. Paica imata ricushpapish, mana siquiman tigranchu.

³¹Alli chumbillirishca runapish, c'ari chivopish, pi mana c'ariyaipaj jatun mandajpishmi.

³²Rumi shungu runa shina, jatun tucunata yuyarishca cashpapish, pita llaquichinata yuyarishca cashpapish, shimita huichcashpa yuyaringuiraj.

³³Maijanpish lecheta batishpaca, mantequillata surcunmi. Singata yalli c'acushpapish yahuaryachinmi. Pita yalli p'iñachishpapish macanacuipi churanmi.