Read Chimborazo Highland Quichua PROVERBIOS 5 Bible Online

PROVERBIOS 5 - Chimborazo Highland Quichua bible

PROVERBIOS 5

¹Ñuca huahualla, ñuca alli yachaitaca yuyaita churashpataj uyairi. Ñuca alli yuyaita cushcaman cambaj rinrinta mañachiyari.

²Chashnami ñuca cunashcataca huaquichingui. Cambaj shimihuanpish alli yachanatami rimangui.

³Shujtaj huarmica mishquijlla shimicunahuan inquitajmi. Pai rimashcaca aceitetapish yalli llambujllami.

⁴Ashtahuanpish q'uipataca ajenjotapish yalli jayajmi. Ishqui filo espadatapish yalli chugrichijmi.

⁵Paipaj chaquica huañuimanmi uriyacun, Seolmanmi chayagricun.

⁶Paica mana shuj ñanllapi purinchu. Causaiman rina ñanpi mana yuyaita churashpaca, paipaj causai chashna cajtaca mana ricunguichu.

⁷Cunanca ñucata uyaichij, huahuacuna. Ñuca shimihuan yachachishcataca, amataj cungarichijchu.

⁸Chai huarmipajmanca amataj ringuichu. Pai causacun huasi pungullamanpish amataj c'uchuyanguichu.

⁹Chashnaca canta alli nishca canatapish achca huatacunata trabajashpa japishcatapish, mana yangamanta millaita rurajcunaman cunguichu.

¹⁰Ñataj shujtajcunata cushichingapajlla cambaj fuerzata tucuchinguiman. Cambaj trabajohuan japishcataca, shujtajpaj huasillapi jundachinguiman.

¹¹Mana uyashpaca, q'uipata cambaj aicha urmarimujpimi, aij nishpa shaicujta huacacungui.

¹²Llaqui japijllapi cashna nicunguiman: “Ñucallatajmi cunashcataca p'iñashpa, mana chasquircani. Jarcashcatapish ñuca shungupica, yanga cashcatami yuyarcani.

¹³Yachachijcuna mashnata yachachishpa cunajpipish, ñucallatajmi mana uyarcani. Ñucallatajmi mana yuyaita churarcani.

¹⁴Ñuca llajtapi causajcunapaj chaupipi, tandanacushcacunapaj chaupipimari cashna tucui laya llaqui tucuni” nishpa llaquiricunguiman.

¹⁵Cambaj quiquin pugyullamanta yacuta ubyangui. Cambaj pugyu yacullahuan yacunaita parachingui.

¹⁶Cambaj pugyumanta llujshicuj yacutaca, japishcahuan mai ñancunapi, plaza pambacunapi ¿jichanguimanllachu imatagari?

¹⁷Pugyupish yacupish cambajllami, amataj shujtajcunapajpish cachun.

¹⁸Cambaj pugyullata alli ningui, huambraraj cashpa cazarashca quiquin huarmillahuan cushicungui.

¹⁹Paica c'uyanajlla llambunajlla sumaj taruga shina cashca cachun. Paipaj c'uyaihuanca pilluchishca shina cambaj tucui causaipi cushichichun. Paillahuan ugllarinacushpa cushicungui.

²⁰Ñuca huahualla, imamanta mana shujtaj huarmihuanca churarinachu cangui. Ñahui mana ricuj shinaca, shujtaj huarmipaj chuchutaca ama ugllaringuichu.

²¹Mandaj Diosca ima shina causacujtaca, tucuicunata ricuracunmi. Imata rurashpa puricujtapish, paipaj ñahuica manataj chingachinchu.

²²Diosta mana manchaj runataca, pai millaita rurashcallatajmi llaquipi urmachin. Quiquin juchacunallatajmi allita huatashpa charicun.

²³Alli tucuchun rimashcata mana uyashcamantami huañunga. Yuyai illaj shina ima millaitapish rurashcamantami chingaringa.