Read Chimborazo Highland Quichua PROVERBIOS 6 Bible Online

PROVERBIOS 6 - Chimborazo Highland Quichua bible

PROVERBIOS 6

¹Ñuca huahualla, canhuan apanacujpaj cashpa, shujtaj runapaj cashpapish, garante tucurcanguichari.

²Chaita ari nishca cashpaca, quiquin shimihuanmi huatashca shina prezu saquirishcangui.

³Shujtajpaj maquipimari yaicushcangui. Cashna rurashpa, utca cachaririyari ñuca huahua: Canhuan apanacujpajman ri, sumajta yuyarinacushpa, chai divitaca paipaj umallapitaj saquishpa cachariri.

⁴Ashallatapish ama uniyashpa, ñahui quimllaillatapish amaraj dormishpa chaitaraj utca allichigri.

⁵Huañuchijpaj maquimanta taruga cacharirij shina, linchimanta urpi llujshishpa rij shina utca cachaririyari.

⁶Q'uilla runa, añangucunata ricui. Paicuna ima shina rurajta ricushpa yachayari.

⁷Paicunaca ñaupashpa pushajtapish, mandajtapish, amotapish mana charincunachu.

⁸Shina cashpapish tamya punllacunapi micuita charingapajca, chagra tandana usya punllacunapimi micunata tandachishpa alli huaquichincuna.

⁹Q'uilla runa, ¿maicamataj dorminguillari? ¿Ima horastaj rijcharinguiyari?

¹⁰Ashahuan dormisha, ashahuan samarisha nishpa, maquicunata ugllashpa ashahuan siricunguillamari.

¹¹Chashna dormicujllapica, imapish illaj saquirinaca puricujlla runa shinami chayamunga. Huajcha saquirishpaca huañuchij runa chayamujpi, imahuan mana mitsari tucuj shinami cangui.

¹²Millai shungu, huaglli runaca millaita rimarishpallami purin.

¹³Ñahuita quimllashpa, chaquita cuyuchishpa, maqui dedohuan señaschishpa ima millaitapish huillanllami.

¹⁴Paipaj shunguca, millai yuyaihuan jundami. Punllanta ima llaquitapish ruranallatami yuyan. P'iñanacuipi churashpami purin.

¹⁵Chashna millai runataca ñapish jatun llaquicuna japingallami. Pi mana ayudaipaj jatun llaqui tucushpami, cungaimanta chingaringa.

¹⁶Mandaj Diosca mana allita rurashcataca, cai sujtatami yallitaj p'iñan, canchistapishmari manataj ricunachin.

¹⁷Jatun tucujta, llulla c'allucunata, manapish ima millaita rurajpi yanga huañuchijta,

¹⁸millaita rurana yuyailla purijta, millaita ruranaman callpajta,

¹⁹llullashpa pitapish llaquipi churajta, huauquindijpuratapish p'iñanacuipi churajtaca, manataj ricunachinchu.

²⁰Ñuca huahualla, cambaj yaya mandashcataca cazungui. Cambaj mama yachachishcatapish, amataj cungaringuichu.

²¹Cambaj shungupi aparingui. Cunga uripi aparishca shina puringui.

²²Chashna rurajpica maita purijpipish, canta alli pushangami. Can dormicujpipish huaquichingami. Ña rijcharijpica, cambaj yuyaipi rimangami.

²³Paicuna yachachishpa mandashcaca, ninata japichishca lámpara shinami. Jarcashpa yachachishcaca causaipaj ñanta ricuchijmi.

²⁴Chaimari huainayaj shujtaj huarmicuna mishquijlla shimicunahuan inquitanamantaca huaquichinga.

²⁵Chaicunataca sumaj cajta ricushpapish, pajta shungullapipish munanguiman. Paicunapaj ñahuicunapi pajta inquitaringuiman.

²⁶Huainayashcallahuan causaj huarmicunahuan churarij c'arica huajchayanllami, amulli tanda shinallami saquirin. Cusayuj huarmicarin alli causacuj runata huañuiman chayachinllami.

²⁷Maijanpish ninata migllashpaca, ¿manachu quiquin churanallatataj rupachinman imashi?

²⁸Maijanpish nina rupacuj jahuata purishpaca, ¿manachu chaquicuna rupanman imashi?

²⁹Maijanpish shujtajpaj huarmihuan churarishpaca, chai shinamari tucun. Cusayuj huarmipi chayarishpaca, paillatajmi jatun llaquipi yaicun.

³⁰Maijanpish yaricaihuan huañucushpalla, ima micunata shuhuashpa micujpica, mana p'iñancunachu.

³¹Shina cajpipish shuhuacujta japishpaca, shuhuacushcata canchis cutin yallihuanmi tigrachichincuna. Paipaj huasipi imalla charishcatamari cuna tucunga.

³²Yuyaita mana japijllami huainayashpa purin. Chaita rurashpaca, quiquin causaitamari chingachin.

³³Macashpa chugrichishpa pingachincunami. Chashna pingai tucushcaca, manataj chingaringachu.

³⁴Cusaca nina lunyacuj shinami p'iñaringa. Maijan punlla japishpacarin, manataj causajta cacharingachu.

³⁵Canta ama huañuchichun imata cusha nijpipish, manataj chasquingachu. Caita chaita cusha nijpipish, manataj perdonangachu.