Read Chimborazo Highland Quichua PROVERBIOS 7 Bible Online

PROVERBIOS 7 - Chimborazo Highland Quichua bible

PROVERBIOS 7

¹Ñuca huahualla, ñuca cushca yuyaicunataca, huaquichishpataj causangui. Ñuca mandashcacunataca, curita shina huaquichingui.

²Ñuca yachachishpa mandashcacunataca cambaj ñahui lulunta alli cuidaraj shina chai yuyai cazushpami, sumajta causai tucungui.

³Cai shimicunataca maquipi huatashca shina, shungupi quillcashca shina chai yuyailla causangui.

⁴Cai alli yachaitaca, ñuca panimi cangui niyari. Alli yuyaitaca, ñuca huasi ucupurami cangui niyari.

⁵Chashna rurajpimi cai shimicunaca, huainayaj huarmicuna sumaj shimicunahuan inquitanamanta huaquichinga.

⁶Ñuca huasi ventanamanta ricucushpaca, manataj yuyaita japij tauca mosocunatami ricurcani.

⁷Paicunamanta shujtami yallitaj yuyai illaj, upa cashcata ricurcani.

⁸Chai mosomi shuj esquinamantaca pai ricushca ñanmanta ch'imbashpa, chai huarmipaj huasiman rirca.

⁹Chaica ña tucui guiñiyacujpimi carca. Chashna tutayashcatami chai huasiman rirca.

¹⁰Ñapish chai huarmica huainayaj huarmi shina churarishpami, inquitana yuyaihuantaj chai mosohuan tupanaman llujshirca.

¹¹P'iñanacuita mashcaj, shimi cacharishca cashpami, huasipica mana tiyai tucun.

¹²Ricurijta inquitangapajmi mai plaza pamba esquinacunapi, mai ñan esquinacunapi chapangapaj tiyarin.

¹³Chai huarmica chai mosohuan tupashpaca, ugllarishcahuanmi mucharca. Chaimantaca imata mana pingashpami cashna nirca:

¹⁴“Ñucaca Dioshuan alli cangapaj animalta huañuchishpa cusha nishpamari, chai yuyailla puricurcani. Chaitaca cunanmari pajtachircani.

¹⁵Chaimantamari canhuan tupanaman llujshimuni. Cambaj ñahuita ricunaihuan huañucurcanica, cunantajca tupanitajmari.

¹⁶Ñuca camatapish Egipto llajta sumaj lino linsohuanmi mantamurcani.

¹⁷Ñuca dormina ucupipish, sumaj mishquijllata ashnaj mirrata, aloeta, canelatamari churamurcani.

¹⁸Shamuilla, pacaringacama tucui tuta c'uyanacushpa amijta cushicushun.

¹⁹Ñuca cusaca mana huasipichu, carutamari rirca.

²⁰Muchila cullquita maquipi aisashcamari rirca. Pai ima punlla huasiman tigramunataca yachanimi” nircami.

²¹Chashna mishquijlla shimicunahuan inquitacushpallami, chai mosotaca mana uyacujta ari nichishpataj alli carca.

²²Ña ari nishcahuan catishpa rircallami. Huañuchinaman apacushca huagra shina, rumi shungu runa cajpi prezu apacujpi shina rircallami.

²³Linchipi urpi paipaj chaquihuan yaicuj shinami tucurca. Paillataj huañuipi yaicucushcata, puntajlla caspi paipaj shunguta chaupina cashcatapish mana yacharcachu.

²⁴Huahuacuna, cancunapish ama chashna tucungapajca, ñuca shimihuan yuyaita cushcataca, rinrinta mañachishpa uyaichigari.

²⁵Chashna millai huarmipica, ama yuyaita churanguichijchu. Paicunapajman rishpaca chingaringuimari.

²⁶Paica ñami achcacunata jatun llaquipi churashca. Ashtahuan c'ari c'aricunatapish paica huañuchishcallami.

²⁷Chai huarmipaj huasica, Seolman apaj ñanmi. Huañushcacunapaj ucucunaman chayachijmi.