Read Chimborazo Highland Quichua PROVERBIOS 9 Bible Online

PROVERBIOS 9 - Chimborazo Highland Quichua bible

PROVERBIOS 9

¹Yachaica pai causanapajca, sumajta labrashca canchis pilarcunahuanmi huasita shayachirca.

²Jatun micuipajca, animalcunata huañuchircami. Mezatapish sumajta allichishpami, vinotapish chagrushpa churarca.

³Chaimantaca paipaj huiñachishcacunatami, pueblo muyundij ashtahuan jatun pircacuna jahuamanta cashna caparichun cacharca: “Yachai illajcunapish, alli yuyaita mana charijcunapish caiman shamuichij.

⁵Cancunapaj ñuca allichishca micunata micuj shamuichij. Ñuca sumajta chagrushca vinota ubyaj shamuichij.

⁶Yachai illaj canataca ña saquichigari. Alli yuyaita japishpa, sumajta causana ñanpi yaicuichij” nishpami caparincuna.

⁷Mana cazushpa asijta alli tucuchun rimajca, pingai tucungapajllami riman. Diosta mana manchajcunata jarcajca, mapayangapajllami jarcan.

⁸Ama p'iñai tucungapajca, mana cazushpa asijtaca, alli tucui nishpa ama rimanguichu. Ashtahuanpish yachaisapa runa pandaricujpi, paita jarcangui. Paica canta c'uyangamari. Yachajman yuyaita cui, paica ashtahuan yachajmi tucunga.

⁹Yachaisapa runata yachachijpica, ashtahuanmari yachaj tucunga. Cashcata rurajman yachachiyari, paica ashtahuanmari yachanga.

¹⁰Alli yachaipaj callarica, Mandaj Diosta manchanami. Ima jucha illaj Diosta rijsinaca, alli yuyaimi.

¹¹Ñuca yachachishcata yuyaipi charishpami, unita causangui. Uni huatacunahuanmi cambaj causaica miranga.

¹²Can allita yachashcaca, cambaj allipajllatajmi. Mana cazushpa asishpapish, canllatajmi llaqui tucungui.

¹³Ch'ahuanyashca huarmica shimi cacharishca, yachai illaj upa huarmimi.

¹⁴Paipaj huasica tucuicuna ricunallapimi. Chai huasi pungupimi shuj sumaj tiyanapi tiyarin.

¹⁵Chaipimi imata mana yuyashpa, ñanta alli ricujcunata cayashpa tiyan.

¹⁶Yachai illajcunataca: “Caiman shamuichij” ninmi. Alli yuyaita mana charijcunataca:

¹⁷“Shuhuashca yacuca mishquimari, pacallapi tandata micunaca manataj amipajmari” ninmi.

¹⁸Ashtahuanpish chaiman rishcamanta, taucacuna huañushcataca mana yachancunachu. Pai cayashcacunaca, Seol ucupimi.