Read Chimborazo Highland Quichua ECLESIASTÉS 10 Bible Online

ECLESIASTÉS 10 - Chimborazo Highland Quichua bible

ECLESIASTÉS 10

¹Mishquijllata ashnaj jambicunata ruraj runa rurashca jambicunapi shuj chuspilla urmashpa huañushpapish, tucuipi mapa ashnaita churanllami. Tucuicuna alli nishca runapish chashnallataj imapi ashata pandarishpaca, yallitaj mana allimi ricurin.

²Yachaj runapaj shunguca alli ladotami yuyan. Rumi shungu runapaj shunguca, lluqui ladotami yuyan.

³Rumi shungu runaca ñanta puricushpapish, alli yuyaiyuj shinaca mana purinchu. Chashnami rumi shungu cashcataca tucuicunaman ricuchin.

⁴Mandaj canhuan p'iñarijpica, can imata ruracushcataca ama shitashpa saquinguichu. Casijlla saquirijpica, yallitaj p'iñarishca cashpapish alli tucungallami.

⁵Ñucaca inti achijyachicun cai pachapica, shujtami panda tiyashcata ricuni. Mandajllatajmi cashna pandata ruraj cashca:

⁶Rumi shungu runacunatami mandanapi jahuaman tiyachin. Ashtahuanpish charijcunarajmi yanga ruranacunapi tiyacuncuna.

⁷Caitapishmari ricuni: Servij runami caballopi tiyarishca purin. Mandajcunarajmi servij runa shina chaquillahuan purincuna.

⁸Jutcuta ruraj runaca, paillataj chaipi urmangallami. Pircata urmachijtapish, culebra llujshishpa caningallami.

⁹Rumita p'aquishpa allichijpish, chaillapitaj chugririnllami. Yantata hachajpish imapish tucunllami.

¹⁰Hacha filo tucurijpi mana cutin molashpaca, ashtahuan sinchitami shitana tucun. Ashtahuanpish alli yachaica alli pushanapajmari.

¹¹Culebrata japingapaj muspachij yumbu manaraj muspachijpi culebra canijpica, muspachij yumbu cashcapish yangallami.

¹²Yachaj runapaj shimicunaca, tucuicunapaj uyanajllami. Ashtahuanpish rumi shungu runataca, paipaj shimillataj llaquipi churanllami.

¹³Rimai callarimantapachami rumi shungu cashcata ricuchin. Tucuchinatacarin musparishpa, jatun mana allicunata rimarishpami tucuchin.

¹⁴Q'uipata imalla tucunata pi mana yachajpipish, rumi shungu runaca achcata rimarinllami. Q'uipata ima tucunataca ¿pitaj yachaj chayachi tucungari?

¹⁵Rumi shungu runacunaca, mana samarishpa trabajacunllami. Puebloman rina ñanllatapish mana rijsinchu.

¹⁶¡Huambraraj jatun mandajta charij llajtalla, aij, imachari tucungui! Pai churashca mandajcunapish, tutamantamanmi jatun micuita callarincuna.

¹⁷¡Alli yaya mamamanta huacharishca jatun mandajta charij llajtalla, cushicuiyari! Cambaj mandajcunapish machanapaj randica yaricaita parachingapaj, micuna horallapimi micuncuna.

¹⁸Q'uilla runaca huasi c'ata urmajpipish saquinllami. Tucui huasi urmachunpish siricunllami.

¹⁹Cushicui tiyashcamantami, jatun micuitaca rurarin. Causaj runacunataca, vinomi cushichin. Tucui chaicunapajpish cullquitajmari.

²⁰Jatun mandajtaca, yuyaillapipish ama ima mana allita rimanguichu. Charijcunatapish dormina ucupi canlla tiyacushpapish, ama ima mana allita rimanguichu. Ñataj pajarocuna uyashpa yachaj chayachigrinman. Alasyujcunaca utca huillagringallatajmari.