Read Chimborazo Highland Quichua ECLESIASTÉS 11 Bible Online

ECLESIASTÉS 11 - Chimborazo Highland Quichua bible

ECLESIASTÉS 11

¹Cambaj tandataca yacupi cacharilla. Ña unipica, cutin japinguillami.

²Canchismanpish, pusajmanpish carailla. Llajtapaj ima llaqui shamucunataca mana yachanguichu.

³P'uyuca achca yacuta amullishca cashpaca, allpapimi cacharinga. Yuraca uriman urmashpa, huichiman urmashpapish, urmashcallapitajmi saquiringa.

⁴Huairata chapajca, mana tarpunchu. P'uyupi ñahuita churajpish, chagrataca mana tandanchu.

⁵Huaira maita rijtapish, mamapaj huijsapi huahuapaj tullucuna ima shina huiñajtapish mana yachanguichu. Chashnallatajmari tucuita ruraj Dios tucui imatapish ima shina ruracujtaca mana yachangui.

⁶Muyutaca tutamantapish tarpuilla, chishitapish ama samaricuichu. Punta tarpui cashpa, q'uipa tarpui cashpa, mana cashpaca ishqui tarpuitaj alli canataca mana yachanguichu.

⁷Achij punllaca sumajmari, achij intita ñahuihuan ricunaca allimari.

⁸Shina cajpipish, uni huatacunata causashpa, chai tucui huatacunapi cushicushca cashpapish ashtahuan unita amsapi canataca yuyarichun. Q'uipataca tucui imapish yangallami canga.

⁹Q'uipa huiñaicunalla, cancuna chairaj cashcapi cushicuichijlla. Cambaj shungu cushicuchun saquilla. Cambaj shungu munashcata rurailla, ñahui pajtashcata ricuilla. Chashna cashpapish can imallata rurashcataca, Diosman ricuchina cashcataca yachanami cangui.

¹⁰Cambaj shungumantaca p'iñarijlla canata anchuchi, cambaj aichahuan ima mana allita ruranamantapish ch'icanyailla. Q'uipa huiñaicuna chairaj cashca punllacunapi cushicunaca utca tucurij yangallami.