Read Chimborazo Highland Quichua ECLESIASTÉS 2 Bible Online

ECLESIASTÉS 2 - Chimborazo Highland Quichua bible

ECLESIASTÉS 2

¹Ñuca shungupica: “Cunanca tucui laya cushicushpa, alli causashpa ricusha” yuyarcanipishmi. Chashna causajpipish yangallatajmi ricurirca.

²Asishpapish: “Loco shinamari cani” nircanimi, cushicushpapish: “Imata mana surcunichu” nircanimi.

³Yachaj canata shungupi aparishpami, vinota ubyajpi ima caj cashcata ricungapaj, vinohuan cutin cutin macharcani. ¿Runacunapajca inti achijyachicunpi causacushpa, huañungacama chaita ruranachu alli imashi? yuyashpami, yachaj chayangapaj chaita rurarcani.

⁴Ñucapajca mandashpa tiyana sumaj huasicunatami rurarcani. Uva chagracunatapish ñuca quiquinpajtami achcata charircani.

⁵Quiquin huertacunatapish, jardincunatapishmi charircani. Chaicunapica tucui laya granocunata p'ucuj yuracunatami tarpurcani.

⁶Shinallataj jatun tanquecunata rurashpa yacuta tandashpami, chai tarpushca yuracunapica regarcani.

⁷Ñucapajta rurajcuna cachun c'aricunatapish, huarmicunatapishmi randircani. Ñuca huasillapitaj huacharishca servijcunatapishmi charircani. Shinallataj vacacunatapish, ovejacunatapish Jerusalenpi ñuca ñaupa causajcuna charishcata yallimi charircani.

⁸Curitapish, cullquitapish ñaupa shujtaj jatun mandajcunapaj cashcatami ñucaca japircani. Shujtaj uchilla llajtacunamantapishmi jatun montoncunata tandachircani. Cantaj c'aricunatapish, cantaj huarmicunatapishmi charircani. Tocanacunatapish tucui layatami charircani. Chashnami ñucaca runacuna cushicuna cashca shinaca tucui laya cushicurcani.

⁹Ñucaca Jerusalenpi ñuca ñaupa causajcunamantaca, tucuicunata yalli charijmi tucurcani. Tucuicuna alli nishpa jatunyachishcapishmi carcani. Yachaipish ñucamantaca mana anchurircachu.

¹⁰Ñuca ñahuihuan ricushpa imata munashpapish, mana jarcarircanichu. Ima shina cushicusha nishpapish chashnatajmi cushicurcani. Ñuca tucui imalla rurashcahuanmi tucui shunguhuan cushicurcani, ñuca trabajomantaca chaitami japircani.

¹¹Chashna cushicushca q'uipami achca shaicuihuan ñuca imalla rurashcacunaca imapaj cashcata alli yuyarircani. Chashna yuyarishpami tucui chaicunaca yangalla cashcata ricurcani, yuyaita yanga shaicuchinallami cashca carca. Chashna cashcamantaca inti achijyachicun pachapica imapish yangallami.

¹²Ñucapaj q'uipa yaicuj jatun mandajca: ¿Ima mushujtataj rurangari? Ña rurashca tiyacujllatatajmi ruranga yuyarcanimi. Chai q'uipaca yachaihuan, musparinahuan, ch'ahuan shungu canahuanmi ch'imbapurarcani.

¹³Chashna alli yuyarishpami, amsapaj randica achij alli caj shinallataj, ch'ahuan canapaj randica yachaj cana alli cashcata ricurcani.

¹⁴Yachaj runaca alli ricushpami purin, upa runaca ñahui huichcashca shinami purin. Shina cajpipish tucuripica shujta shuyacujllataj, caishujtapish shuyaj cashcatami ricurcani.

¹⁵Chaita ricushpami cashna nircani: “Ch'ahuan runata shuyacujllatajmi, ñucatapish shuyacun. Mashna jatun yachaj cashcapish yangallamari. Yachaj canapish yuyaita yanga shaicuchinallami.

¹⁶Yachaj runapish, ch'ahuan runapish huañunllatajmi. Yachaj runatapish ch'ahuan runatapish pi mana huiñaita yuyaricunllachu. Asha huatacuna q'uipaca, maijantapish ña mana yuyarincunachu” nircanimi.

¹⁷Inti achijyachicun pachapica tucui imapish yuyaita yanga shaicuchinalla cashcata yuyarishpami llaquirircani. Chaimantaca ñucaca causanataca p'iñarcanimi. Alli yuyarijpica imapish yuyaita yanga shaicuchishca, yanga charishcallami.

¹⁸Inti achijyachicun pachapi ñuca imallata rurashcacunaca ñucapaj q'uipa yaicuj mandajpajllami saquiringa. Chaimantami tucuita yangapi charishpa p'iñarcani.

¹⁹Ashtahuantajcarin yachaj cashcacunahuan, tucui yuyaihuan shaicuita ñuca imallata rurashcata japijca, ¿jatun yachajchari canga, upa runachari canga imapishchari? Paillaman tucui imatapish saquina cashcamantaca, ñucallataj rurashca tucui imatapish ña mana munarcanichu.

²⁰Ñuca yachashcahuan, tucui yuyaita churashpa cai pachapi yanga tucui chaicunata rurashcata alli yuyarishpaca, jatuntami llaquirircani.

²¹Shujcunaca alli yuyaihuan, alli ricushpa, alli yachaihuanmi imatapish rurancuna. Chaitaca manapish imata ruraj shujtajcunallami japincuna. Chaimanta, tucui ima rurashcapish yangallami. Chaipish shuj jatun llaquimari.

²²Inti achijyachicun pachapi causajcunaca yangallami imatapish mana samashpa, chai yuyai rurancuna. Chai tucui rurashcacunamantaca, imata mana japincunachu.

²³Tucui causaipimi llaquita nanaita apancuna. Paicunapaj causaica llashajta aparishca shinami. Imata rurangapajpish tutapish mana dormishpami, achcata yuyaricunllacuna.

²⁴Quiquin trabajomantaca micushpa, ubyashpa cushicunamari alli. Chashna cushicunapish Dios cujllapi tiyaj cashcatami ricurcani.

²⁵¿Pitaj ñucata yalli allita micungari? ¿Pitaj ñucata yalli alli causangari?

²⁶Diosca paipaj ñaupajpi alli caj runallamanmi yachaitapish, alli yuyaitapish, cushicuitapish cun. Ashtahuanpish juchata rurashpa causaj runataca, achcata charinacunata jahuanpi jahuanpi tandashpa huaquichichun saquinllami. Chai huaquichishca charinacunataca paipaj ñaupajpi alli caj runapaj cachunmi, Diosca chashna ruran. Chashna cashcamantaca tucui imata rurashpapish, yuyaita yanga shaicuchishpallami causan.