Read Chimborazo Highland Quichua CANTARES 2 Bible Online

CANTARES 2 - Chimborazo Highland Quichua bible

CANTARES 2

¹Ñucaca Sarón pambapi tiyaj rosas sisami cani. Ñucaca pugru pambapi tiyaj lirio sisami cani.

²Ñuca c'uyashcaca solteracunapaj chaupipica, casha yuracuna chaupipi lirio sisa huiñashca shinami ricurin.

³Ñuca c'uyashcaca mosocunapaj chaupipica, sacha yuracuna chaupipi huiñashca manzana yura shinami ricurin. Ñuca munashcapaj llandupimi tiyarircani. Pai p'ucushca micunaca, ñuca shimipica mishquimari.

⁴Paica jatun micuita ruracun huasimanmi pusharca. Paipaj c'uyaimi, bandera shina ñucata pacahuan.

⁵Pasasta carahuaichigari, manzanata carashpa cushichihuaichigari, paita ricunaihuan ungushcamari cani.

⁶Paipaj lluqui rigrapi ñucata saunachihuajpichari, paipaj alli rigrahuanca ñucata ugllahuajpichari.

⁷Jerusalenpi causaj solteracunalla, corzocunamantapish, sacha tarugacunamantapishmi cashna nipani: Ñuca c'uyashcataca amataj rijchachipanguichijchu, maicamapish samaricuchun saquipanguichijlla.

⁸¡Ñuca c'uyashcapaj rimashcami uyarin! Riqui, paitajmari shamucun. Paitajmari urcucunatapish, lomacunatapish saltarishpa, tushurishpa shamucun.

⁹Ñuca c'uyashcaca corzo shinapish, malta taruga shinapishmari. Riqui paica ñamari pata huashapi shayacun. Ventanacunamantami ricucun. Chijtarishca patamantamari chapacun.

¹⁰Ñuca c'uyashcaca ñucataca cashnami nirca: “Ñuca c'uyashca sumaj soltera, jatari jacu ñucahuan.

¹¹Riqui, ñamari tamya punllacuna tucurishca. Tamya maitatajshi rijpica, sumaj punllacunami tucushca.

¹²Allpapica, sisacunami huiñashca. Cantana punllacunami chayamushca. Urpicuna huacashcami ñucanchij llajtapica uyarishca.

¹³Higo yurapish ñami p'ucushca. Uva sisacunapish sumajtami ashnacun. Ñuca c'uyashca sumaj huarmi, jatariyari jacu ñucahuan.

¹⁴C'aca huaicucunapi, jutcucunapi, jahua urcucunapi miticushpa causaj ñuca c'uyashca palomita, cambaj ñahuita ricuchihuai, cambaj rimaita uyachihuai. Cambaj rimashca shimicunaca mishquijllamari uyarin. Cambaj ñahuipish sumajmari ricurin” nircami.

¹⁵Zorracunata jacu japishun, malta zorracunami uva chagrata tucuchicun. Ñucanchij uva chagraca cunan sisacunllamari.

¹⁶Ñuca c'uyashcaca ñucapajmi, ñucaca paipajmi cani. Paica lirio sisacuna chaupipi michijmi.

¹⁷Ñuca c'uyashcalla, manaraj pacarijpi manaraj achijyajpi utca tigramupai. Beter urcu jahuacunapica corzo shina, mana cashpaca malta taruga shina callpaiyari.